មនុស្សរត់ជាន់គ្នាស្លាប់ក្នុងពិធីបុណ្យសាសនានៅឥណ្ឌា កើនដល់ជាង ១០០នាក់

យោងតាមតួលេខចុងក្រោយពី Reuters នៅថ្ងៃពុធទី៣ខែកក្កដាឆ្នាំ២០២៤, ចំនួនមនុស្សស្លាប់ក្នុងហេតុការណ៍រត់ជាន់គ្នា អំឡុងពិធីបុណ្យ Satsang របស់សាសនាហិណ្ឌូ នៅស្រុក Hathras នៃរដ្ឋ Uttar Pradesh ភាគខាងជើងប្រទេសឥណ្ឌា បានកើនឡើងដល់ ១១៦នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលិសបានឲ្យដឹងថា ជនរងគ្រោះភាគច្រើនជាស្រ្តីនិងមានមួយចំនួនទៀតជាកុមារ ខណៈមន្ត្រីជំនាញ កំពុងព្យាយាមកំណត់អត្តសញ្ញាណពួកគេ។

ទោះបីជាយ៉ាងណាក៏ដោយ ភ្លាមៗ មិនទាន់មាននរណាដឹងច្បាស់អំពីមូលហេតុដែល ឈានដល់កើតមានសោកនាដកម្មនេះទេ ប៉ុន្តែសាក្សីនៅកន្លែងកើតហេតុ បានប្រាប់ទៅ​ Reuters ថា មានមនុស្សប្រហែល ៥ ០០០នាក់នៅទីនោះ។ កន្លែងចាកចេញពីទីតាំងប្រារព្ធពិធីគឺមានភាពតូចចង្អៀត ហើយម្យ៉ាងវិញទៀត ពេលនោះក៏កើតមានខ្យល់កួចផងដែរ ជាហេតុនាំឲ្យគ្រប់គ្នាភ័យស្លន់ស្លោ រត់ជាន់លើគ្នាតែម្តង។

យ៉ាងណាមិញ លោក Yogi Adityanath ប្រមុខរដ្ឋ Uttar Pradesh ក៏បានប្រាប់អ្នកសារព័ត៌មានដែរថា ការរត់ជាន់គ្នា កើតឡើងនៅពេលអ្នកចូលរួមចាប់ផ្តើមរុញគ្នា ដើម្បីឲ្យបានប៉ះគ្រូសាសនាម្នាក់ ដែលកំពុងធ្វើដំណើរចុះពីលើឆាករៀបចំពិធី។

ពេលដឹងដំណឹងដ៏សោកសៅនេះភ្លាម លោកនាយករដ្ឋមន្ត្រី Narendra Modi បានប្រកាសផ្តល់ជាជំនួយ និងសំណងជាទឹកប្រាក់ចំនួន ២០០ ០០០ រូពី (២ ៤០០ ដុល្លារ) ដល់គ្រួសារអ្នកស្លាប់ និង ៥០ ០០០ រូពីសម្រាប់អ្នករងរបួស។

គ្មានអ្វីថ្មីទេ គ្រោះថ្នាក់អំឡុងពិធីសាសនានៅប្រទេសឥណ្ឌា គឺឧស្សាហ៍កើតឡើងណាស់ ព្រោះថា មនុស្សយ៉ាងច្រើនណែនតាន់តាប់ តែងប្រមូលផ្តុំគ្នានៅក្នុងទីតាំងដ៏តូចចង្អៀត ទាំងដែលមិនសូវមានអ្នកគោរពតាមវិធានការសុវត្ថិភាពឲ្យបានខ្ជាប់ខ្ជួន។

ជាក់ស្តែង ក្នុងឆ្នាំ២០១៨ មនុស្សប្រហែល៦០នាក់បានស្លាប់ បន្ទាប់ពីរថភ្លើងបុកហ្វូងមនុស្សដែលកំពុងមើលការប្រារព្ធពិធីបុណ្យសាសនាហិណ្ឌូឈ្មោះថា Dusshera។ ចំណែកក្នុងឆ្នាំ ២០១៣ ការរត់ជាន់គ្នាក្នុងពិធីបុណ្យហិណ្ឌូមួយទៀត នៅកណ្តាលរដ្ឋ Madhya Pradesh បានផ្តាច់ជីវិតមនុស្ស១១៥នាក់៕

អត្ថបទ៖ សុខ សុវណ្ណ

ចុចអាន៖ ទៅយកអំណោយ បែរជារត់ជាន់គ្នាស្លាប់ ៧៨នាក់ នៅ យេម៉ែន