អ៊ីស្រាអែល វាយប្រហារលើសាលារៀន UN នៅហ្គាហ្សា ស្លាប់មនុស្សច្រើននាក់

យោងតាមការចេញផ្សាយរបស់សារពត៌មាន Al Jazeera នៅថ្ងៃទី១៥ ខែ​កក្កដា មនុស្សចំនួន១៥នាក់បានស្លាប់ក្នុងការទម្លាក់គ្រាប់បែករបស់អ៊ីស្រាអែល លើសាលារៀន Abu Oreiban គ្រប់គ្រងដោយទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ដែលផ្តល់ជម្រកដល់ពលរដ្ឋប៉ាឡេស្ទីន នៅកណ្តាលតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរក្នុងតំបន់បានឲ្យដឹងថា ក្រៅពីមនុស្សស្លាប់ ក៏មានអ្នករបួស៨០នាក់ផ្សេងទៀតផងដែរ ខណៈជនរងគ្រោះភាគច្រើនគឺជាកុមារនិងស្ត្រី។ 

តាមការបញ្ជាក់ពីកងទ័ព​អ៊ីស្រាអែល, ការ​វាយ​ប្រហារនេះគឺដើម្បី​កម្ទេចសាលារៀនដែលប្រើ​ជា​កន្លែង​លាក់​ខ្លួន និង​ហេដ្ឋារចនាសម្ព័ន្ធ​ប្រតិបត្តិការ​សម្រាប់​ការ​វាយ​ប្រហារ​ប្រឆាំង​នឹង​កង​កម្លាំង​របស់​ខ្លួន។

សូមបញ្ជាក់ថា ការវាយប្រហារនេះ កើតឡើងត្រឹមតែមួយថ្ងៃប៉ុណ្ណោះ បន្ទាប់ពីមនុស្សយ៉ាងតិច ៩០ នាក់បាត់បង់ជីវិត និងជិត ៣០០ នាក់ផ្សេងទៀតរងរបួសក្នុងការវាយប្រហាររបស់អ៊ីស្រាអែល លើតំបន់មនុស្សធម៌សម្រាប់ជនភៀសខ្លួនប៉ាឡេស្ទីននៅភាគខាងត្បូងហ្គាហ្សា។

ដោយសារបដិសេធសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលទាមទារឲ្យមានបទឈប់បាញ់ជាបន្ទាន់, អ៊ីស្រាអែលត្រូវប្រឈមមុខនឹងការថ្កោលទោសជាអន្តរជាតិ ចំពេលមានការបន្តវាយលុកយ៉ាងឃោរឃៅឥតឈប់លើតំបន់ហ្គាហ្សា ចាប់តាំងពីការវាយប្រហារថ្ងៃទី៧ខែតុលាដោយក្រុមហាម៉ាសមក។

អ៊ីស្រាអែល ក៏ត្រូវចោទប្រកាន់ពីបទប្រល័យពូជសាសន៍នៅតុលាការយុត្តិធម៌អន្តរជាតិផងដែរ ខណៈសេចក្តីសម្រេចចុងក្រោយរបស់តុលាការនេះ បញ្ជាឲ្យបញ្ឈប់ជាបន្ទាន់នូវប្រតិបត្តិការយោធាក្នុងទីក្រុង Rafah ភាគខាងត្បូង៕

អត្ថបទ៖ ប៊ុន សុភាព