ត្រាំ ថា ប្រកួតជាមួយ ហារីស ស្រួលឈ្នះជាង បៃដិន ទៅទៀត!

ក្រោយប្រធានាធិបតីអាមេរិក ចូ បៃដិន ប្រកាសដកបេក្ខភាពមិនបានប៉ុន្មាននាទីផង, បេក្ខជនឈរឈ្មោះខាងគណបក្សសាធារណរដ្ឋ លោក ដូណាល់ ត្រាំ ស្រាប់តែផ្តល់បទសម្ភាសតាមទូរស័ព្ទជាមួយ CNN តែម្តង ដោយនិយាយថា លោក ជឿថា អ្នកស្រី កាម៉ាឡា ហារីស នឹងក្លាយជាគូប្រជែងដែលលោកស្រួលយកឈ្នះជាង ចូ បៃដិន ទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង លោកក៏ផ្លែផ្កាដាក់ ចូ បៃដិន ផងដែរដោយនិយាយថា “លោក បៃដិន នឹងត្រូវគេចងចាំថាជា ប្រធានាធិបតីតែមួយរូបគត់ ដែលអាក្រក់បំផុតក្នុងប្រវត្តិសាស្ត្រនៃប្រទេសរបស់យើង”។

លើសពីនេះ លោកត្រាំ ថែមទាំងបង្ហោះនៅលើបណ្តាញសង្គម Truth Social របស់គាត់ ដើម្បីវាយប្រហារយ៉ាងចាស់ដៃទៅលើច្បាប់របស់លោក បៃដិន ហើយសន្យាថា ពេលខ្លួនចូលកាន់តំណែងវិញ ខ្លួននឹងជួសជុលរាល់ការខូចខាតដែលអ្នកកាន់តំណែងមុនបានធ្វើដាក់សហរដ្ឋអាមេរិក។

លោក ត្រាំ សរសេរថា “លោក ចូ បៃដិន មិនស័ក្តិសមក្នុងការឈរឈ្មោះជាប្រធានាធិបតីទេ ហើយក៏មិនស័ក្តិសមកាន់តំណែងជាប្រធានាធិបតីដែរ! គាត់គ្រាន់តែទទួលបានតំណែងជាប្រធានាធិបតីដោយសារព័ត៌មានកុហកបោកប្រាស់ប៉ុណ្ណោះ។ យើង​នឹង​រង​ទុក្ខ​វេទនា​ខ្លាំង​ដោយ​សារ​តែ​ការ​កាន់​តំណែង​ជា​ប្រធានាធិបតី​របស់​គាត់”។

សូមបញ្ជាក់ថា លោក ចូ បៃដិន បានប្រកាសដកខ្លួនចេញពីការឈរឈ្មោះជាបេក្ខជនគណបក្សប្រជាធិបតេយ្យ ទៅប្រកួតប្រជែងក្នុងការបោះឆ្នោតប្រធានាធិបតីខែវិច្ឆិកា ហើយបានបង្ហាញការគាំទ្រយ៉ាងមុតមាំទៅលើអនុប្រធានាធិបតី កាម៉ាឡា ហារីស វិញ។

ទោះយ៉ាងណាក្តី ត្បិតលោក បៃដិន ដកបេក្ខភាពក៏ពិតមែន ប៉ុន្តែលោកប្រកាសថា លោកនឹងបន្តកាន់តំណែងជាប្រធានាធិបតី ហើយបំពេញភារកិច្ចរហូតដល់ចប់អាណត្តិ៕

អត្ថបទ៖ សុខ សុវណ្ណ

ចុចអាន៖ ទីបំផុត ចូ បៃដិន ដកខ្លួនចេញ ហើយគាំទ្រ កាម៉ាឡា ហារីស ឲ្យទៅប្រកួតជាមួយ ដូណាល់ ត្រាំ