ព័ត៌មានអន្ដរជាតិ

រុស្ស៊ីហាមមន្ត្រីនិងអ្នកជំនួញជប៉ុន១៣រូបទៀត ដែលជាប់ពាក់ព័ន្ធនឹងការជួយកសាងអ៊ុយក្រែនឡើងវិញ

បានផុស

២ years មុន

នៅ

ថ្ងៃពុធ ២៤ កក្កដា ២០២៤

ដោយ

ក្រសួងការបរទេសរុស្ស៊ីហាមជនជាតិជប៉ុន១៣នាក់បន្ថែមទៀតមិនឲ្យចូលប្រទេសរុស្ស៊ី ដោយសារតែទំនាក់ទំនងរបស់ពួកគេជាមួយប្រទេសអ៊ុយក្រែននិងការធ្វើអាជីវកម្មដែលពាក់ព័ន្ធនឹងការស្តារនិងគាំទ្រការកសាងអ៊ុយក្រែនឡើងវិញ។ យោងតាមការចេញផ្សាយរបស់ទូរទស្សន៍ជាតិជប៉ុនNHK នៅថ្ងៃទី២៤ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសរុស្ស៊ីបានប្រកាសកាលពីថ្ងៃអង្គារថា ការសម្រេចចិត្តនេះគឺជាផ្នែកមួយនៃវិធានការសងសឹកប្រឆាំងនឹងការដាក់ទណ្ឌកម្មរបស់រដ្ឋាភិបាលជប៉ុនជុំវិញ«ប្រតិបត្តិការយោធាពិសេស»របស់រុស្ស៊ី។ តាមរយៈបញ្ជីរាយនាមបុគ្គលដែលត្រូវហាមឃាត់នេះ រុស្ស៊ីនឹងហាមឃាត់ ប្រធានទីភ្នាក់ងារសហប្រតិបត្តិការអន្តរជាតិជប៉ុន លោក Tanaka Akihiko ដែលបានទៅទស្សនកិច្ចនៅអ៊ុយក្រែនក្នុងខែកក្កដាឆ្នាំ២០២៣និង លោក Mikitani Hiroshi នាយកប្រតិបត្តិក្រុមហ៊ុន Rakuten Group ដែលបានធ្វើដំណើរទៅប្រទេសអ៊ុយក្រែនក្នុងខែកញ្ញាឆ្នាំមុនជាមួយរដ្ឋមន្ត្រីការបរទេសជប៉ុនលោក Hayashi Yoshimasa ។

ការហាមប្រាមនេះក៏អនុវត្តចំពោះលោក Toyoda Akio ប្រធានក្រុមហ៊ុន Toyota Motor និងលោក Amemiya Makoto ប្រធានក្រុមហ៊ុនផលិតម៉ាស៊ីនបោសសម្អាតមីនដែលត្រូវបានប្រគល់ឱ្យអ៊ុយក្រែនកាលពីដើមខែនេះ។

រុស្ស៊ីធ្លាប់បានដាក់បម្រាមមិនចូលប្រទេសរួចទៅហើយលើនាយករដ្ឋមន្ត្រីជប៉ុន Kishida Fumio សមាជិកគណៈរដ្ឋមន្ត្រី និងអ្នកសារព័ត៌មានជប៉ុន។ ចំណែកប្រភពការទូតជប៉ុន បាននិយាយថា ការឆ្លើយតបរបស់ទីក្រុងមូស្គូគឺជាការខឹងសម្បារ និងចាត់វិធានការដែលគិតថាអាចនឹងដាក់សម្ពាធលើក្រុមហ៊ុនជប៉ុនដែលកំពុងពិចារណាគាំទ្រការជួយកសាងអ៊ុយក្រែនឡើងវិញ៕

អត្ថបទ៖ ប៊ុន សុភាព