ព័ត៌មានអន្ដរជាតិ

ស្លាប់១១នាក់ នៅក្នុងបាតុកម្មប្រឆាំងនឹងលទ្ធផលបោះឆ្នោតនៅវ៉េណេស៊ុយអេឡា

បានផុស

២ years មុន

នៅ

ថ្ងៃពុធ ៣១ កក្កដា ២០២៤

ដោយ

Chheang

យ៉ាងហោចណាស់មនុស្សចំនួន១១នាក់ បានបាត់បង់ជីវិតនៅក្នុងបាតុកម្មប្រឆាំងនឹងលទ្ធផលបោះឆ្នោតដ៏ចម្រូងចម្រាសកាលពីថ្ងៃអាទិត្យរបស់វ៉េណេស៊ុយអេឡា បន្ទាប់ពីមេបក្សកាន់អំណាច លោក នីកូឡាស ម៉ាឌូរ៉ូ (Nicolás Maduro) បានប្រកាសពីជោគជ័យសម្រាប់អាណត្តិទី៣របស់ខ្លួន និងបន្តកាន់តំណែងរយៈពេល៦ឆ្នាំថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាតុករបានប្រមូលផ្ដុំគ្នានៅតាមតំបន់ជាច្រើនក្នុងប្រទេសវ៉េណេស៊ុយអេឡា កាលពីថ្ងៃអង្គារ ដោយទាមទារឲ្យលោក ម៉ាឌូរ៉ូ ទទួលស្គាល់ថាគណបក្សប្រឆាំងដែលដឹកនាំដោយលោក Edmundo Gonzalez ជាអ្នកឈ្នះការបោះឆ្នោត ផ្ទុយពីលទ្ធផលត្រូវបានប្រកាសកាលពីថ្ងៃចន្ទរបស់រដ្ឋាភិបាល ដែលមិនបានបង្ហាញពីការរាប់សន្លឹកឆ្នោតលម្អិតនៅតាមមណ្ឌលនីមួយៗនោះទេ។

គណបក្សប្រឆាំង បានបញ្ជាក់ថា ស្ថាប័នរៀបចំការបោះឆ្នោតស្ថិតនៅក្រោមការគ្រប់គ្រងរបស់បក្សកាន់អំណាច ហើយនិយាយថា លោក Gonzalez ទទួលបានសម្លេងគាំទ្រច្រើនជាងទ្វេដងឯណោះ បើប្រៀបធៀបនឹងលោក ម៉ាឌូរ៉ូ ដោយផ្អែកតាមទិន្នន័យសន្លឹកឆ្នោតចំនួន៩០%ដែលបក្សប្រឆាំងបានទទួល។

រដ្ឋាភិបាលវ៉េណេស៊ុយអេឡារបស់លោក ម៉ាឌូរ៉ូ បានចាត់ទុកបាតុកម្មនេះថាជា «រដ្ឋប្រហារ» ហើយចោទប្រកាន់មេបក្សប្រឆាំង និងបក្ខពួកថាជាអ្នកនៅពីក្រោយការបង្កអំពើហិង្សា។ លោក ម៉ាឌូរ៉ូ បានថ្លែងតាមប៉ុស្តិ៍ទូរទស្សន៍រដ្ឋថា បាតុករបក្សប្រឆាំងបានវាយដំលើជនស៊ីវិល និងដុតភ្លើង ហើយលោក ម៉ាឌូរ៉ូ បានទាមទារឲ្យមានការបកស្រាយពីលោក Gonzalez។

ពាក់ព័ន្ធនឹងបញ្ហានេះ សហរដ្ឋអាមេរិក និងបណ្តាប្រទេសមួយចំនួនជុំវិញពិភពលោក បានប្រកាសមិនទទួលស្គាល់លទ្ធផលនៃការបោះឆ្នោតរើសប្រធានាធិបតីថ្មីនៅប្រទេសវេណេស៊ុយអេឡា។ រដ្ឋបាលរបស់ប្រធានាធិបតីសហរដ្ឋអាមេរិក បាននិយាយថា រដ្ឋាភិបាលលោក ម៉ាឌូរ៉ូ ប្រឈមនឹងហានិភ័យនៃភាពឯកោខាងការទូត ខណៈដែលប្រទេសកាន់តែច្រើន សូម្បីតែសម្ព័ន្ធមិត្តសំខាន់ៗមួយចំនួន បានចោទសួរពីកង្វះតម្លាភាពនៃការបោះឆ្នោតដែលហាក់ដូចជាបានបំពានលើបទដ្ឋានអន្តរជាតិ។

ជាចំណាត់ការតបត លោក ម៉ាឌូរ៉ូ បានកោះហៅទូតខ្លួន និងបណ្តេញទូតនៃប្រទេសស្ទើរទាំងអស់នៅអាមេរិកឡាទីន ដោយសារតែការមិនទទួលស្គាល់លទ្ធផលបោះឆ្នោតប្រធានាធិបតីដ៏ចម្រូងចម្រាស និង ចោទប្រទេសទាំងនោះថា ជ្រៀតជ្រែកកិច្ចការប្រទេសខ្លួន។

គណកម្មាធិការរៀបចំការបោះឆ្នោតវ៉េណេស៊ុយអេឡា ដែលគ្រប់គ្រងដោយបក្សកាន់អំណាច បានប្រកាសកាលពីព្រឹកថ្ងៃចន្ទថា លទ្ធផលបោះឆ្នោតនៅថ្ងៃអាទិត្យបង្ហាញថា លោក ម៉ាឌូរ៉ូ បានទទួលសម្លេងគាំទ្រចំនួន ៥១,២% ហើយជាអ្នកឈ្នះលើការបោះឆ្នោតដែលមិនអាចប្រកែកតវ៉ាបាន រួចលោកនឹងត្រូវឡើងកាន់តំណែងបន្តរយៈពេល៦ឆ្នាំបន្ថែមទៀត។ លោក ម៉ាឌូរ៉ូ បានកាន់តំណែងជាប្រធានាធិបតីចាប់តាំងពីឆ្នាំ២០១៣។ ចំណែកឯបក្សប្រឆាំងដែលដឹកនាំដោយលោក Edmundo Gonzalez មានសម្លេងគាំទ្រ ៤០,២%។

បក្សប្រឆាំងនៅវ៉េណេស៊ុយអេឡា បានជំទាស់នឹងលទ្ធផលបោះឆ្នោត ហើយទាមទារឲ្យលោក ម៉ាឌូរ៉ូ ប្រគល់ក្រដាសព្រីននូវកំណត់ត្រាលទ្ធផលឆ្នោតចំនួន ៣ម៉ឺនសន្លឹក ដែលបានចុះហត្ថលេខា និងចុះកាលបរិច្ឆេទដោយបុគ្គលិកបោះឆ្នោត និងអ្នកសង្កេតការណ៍បក្សប្រឆាំង។ បក្សប្រឆាំង បានសង្កត់ធ្ងន់ទៀតថា តួលេខនៃលទ្ធផលមិនត្រូវបង្ហាញតែនៅលើវិបសាយរដ្ឋាភិបាលនោះទេ៕

ដោយ៖ ឈាង

ចុចអាន៖ ផ្ទុះបាតុកម្មនៅវ៉េណេស៊ុយអេឡា ក្រោយប្រកាសលទ្ធផលបោះឆ្នោតដ៏ចម្រូងចម្រាស

Related Topics:ប្រទេសវ៉េណេស៊ុយអេឡា

ព័ត៌មានអន្ដរជាតិ១៩ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

ព័ត៌មានជាតិ១ សប្តាហ៍ ago

រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា