ព័ត៌មានអន្ដរជាតិ

លោក Medvedev៖ ទាល់មានសង្គ្រាមធំ ទើបតំបន់មជ្ឈិមបូព៌ា អាចទទួលបានសន្តិភាព

បានផុស

២ years មុន

នៅ

ថ្ងៃសុក្រ ២ សីហា ២០២៤

ដោយ

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev និយាយថា សង្គ្រាមទ្រង់ទ្រាយធំនៅមជ្ឈិមបូព៌ា អាចជាមធ្យោបាយតែមួយគត់ ដើម្បីរកសន្តិភាពជូនតំបន់នោះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការបង្ហោះលើបណ្តាញសង្គម X កាលពីថ្ងៃព្រហស្បតិ៍ទី១ខែសីហាឆ្នាំ២០២៤ លោក Medvedev ក៏បានសម្តែងភាពសោកស្ដាយផងដែរ ចំពោះការបាត់បង់ជីវិតមនុស្សស្លូតត្រង់ ដោយសារតែអ្វីដែលលោកចោទប្រកាន់ថា ជាភាពតានតឹងដែលបញ្ឆេះដោយសហរដ្ឋអាមេរិក។

ទន្ទឹមនោះ លោកបានសរសេរថា «ច្បាស់ណាស់សម្រាប់មនុស្សគ្រប់គ្នាគឺថា មានតែសង្រ្គាមពេញទំហឹងប៉ុណ្ណោះ ដែលជាមធ្យោបាយតែមួយគត់ ដើម្បីសម្រេចបានសន្តិភាពដ៏ផុយស្រួយនៅក្នុងតំបន់នេះ»។

ការបង្ហោះរបស់លោក Medvedev កើតឡើងស្របពេល ក្រសួងការបរទេសរុស្ស៊ី ថ្កោលទោសខ្លាំងៗចំពោះការធ្វើឃាតមេក្រុមហាម៉ាស លោក Ismail Haniyeh ដែលត្រូវសម្លាប់ក្នុងការវាយប្រហារពីអាកាសរបស់អ៊ីស្រាអែល ក្នុងទីក្រុង តេហេរ៉ង់ កាលពីថ្ងៃពុធទី៣១ខែកក្កដា។

ក្នុងសេចក្តីថ្លែងការណ៍នោះ ក្រសួងបានជំរុញឲ្យភាគីទាំងអស់ត្រូវអត់ធ្មត់ ចំពេលស្ថានការណ៍នៅមជ្ឈិមបូព៌ាកាន់តែអាក្រក់ និងសូមចៀសវាងសកម្មភាព ដែលអាចបង្កអស្ថិរភាពក្នុងតំបន់បន្ថែមទៀត ឬបង្កឲ្យមានជម្លោះប្រដាប់អាវុធទ្រង់ទ្រាយធំ។

លើសពីនេះ ក្រសួងបានសង្កត់ធ្ងន់ថា ការធ្វើឃាតលោក Haniyeh អាចជះឥទ្ធិពលអាក្រក់ដល់កិច្ចចរចាបទឈប់បាញ់ហ្គាហ្សាដែលកំពុងដំណើរការ និងរាំងស្ទះដល់កិច្ចព្រមព្រៀងដោះដូរអ្នកទោសរវាងរដ្ឋាភិបាលអ៊ីស្រាអែល និងចលនាតស៊ូប៉ាឡេស្ទីន ហាម៉ាស។

សូមបញ្ជាក់ជាថ្មី លោក Haniyeh ត្រូវបានសម្លាប់ ក្រោយទៅចូលរួមក្នុងពិធីស្បថឡើងកាន់តំណែងថ្មីរបស់ប្រធានាធិបតីអ៊ីរ៉ង់ Masoud Pezeshkian។ ក្រុមហាម៉ាស បានបន្ទោសអ៊ីស្រាអែលចំៗចំពោះការលួចវាយប្រហារមេដឹកនាំរបស់ខ្លួន ហើយនិយាយថា លោក Haniyeh ត្រូវបានសម្លាប់ដោយក្រុមជនក្បត់ «Zionist»៕

អត្ថបទ៖ សុខ សុវណ្ណ

ចុចអាន៖ អាមេរិកប្រកាសថា ការស្លាប់មេក្រុមហាម៉ាសមិនជាប់ពាក់ព័ន្ធនឹងខ្លួនទេ