ព័ត៌មានអន្ដរជាតិ

ម៉ាឡេស៊ីឆ្លាតខ្លាំង យករូប Fan Bingbing អង្គុយញ៉ាំទុរេន កេនទេសចរចិន បុកទៅលេងព្រមគ្នា

បានផុស

៨ ខែ មុន

នៅ

ថ្ងៃសៅរ៍ ១០ សីហា ២០២៤

ដោយ

យោងតាមអាជ្ញាធរក្នុងតំបន់បានឲ្យដឹងថា តារាសម្តែង Fan Bingbing បានបង្កការចាប់អារម្មណ៍យ៉ាងខ្លាំងចំពោះផ្លែទុរេនក្នុងចំណោមភ្ញៀវទេសចរចិន ដែលមកលេងរដ្ឋ Melaka របស់ប្រទេសម៉ាឡេស៊ីនាប៉ុន្មានថ្ងៃនេះ រហូតតូបខ្លះរកលក់សឹងមិនផង។

សារព័ត៌មាន The Star រាយការណ៍ដោយដកស្រង់នូវសម្ដីរបស់លោក Low Chee Leong សមាជិកសភានីតិបញ្ញត្តិរដ្ឋ Melaka ខណៈដែលគាត់បានទៅមើលតូបលក់ទុរេននៅផ្លូវ Jalan Tun Perak ក្នុងទីក្រុង Melaka ដើម្បីសម្ភាសភ្ញៀវចិននៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបាននិយាយកាលពីថ្ងៃព្រហស្បតិ៍ថា «ម្ចាស់តូបចង់ឲ្យខ្ញុំមើលឃើញចំនួនភ្ញៀវទេសចរចិន ដែលមកគាំទ្រតូបនៅតាមផ្លូវរបស់គាត់ បន្ទាប់ពីមានការកើនឡើងនៃការផ្ទុះទុរេន បន្ទាប់ពីការផ្សព្វផ្សាយរបស់តារាសម្ដែងនិងម៉ូដែលចិន Fan Bingbing »។

លោកបាននិយាយបន្ថែមទៀតថា «យើងបានឃើញការកើនឡើងយ៉ាងខ្លាំងនៃអ្នកទេសចរមកពីប្រទេសចិន ក្នុងរយៈពេលប៉ុន្មានសប្តាហ៍នេះ ហើយមនុស្សជាច្រើនបានប្រាប់ខ្ញុំថា ពួកគេចង់ភ្លក់ធុរេនដូចគ្នាដែលតារាស្រីចិនបានបង្ហោះក្នុងទំព័រប្រព័ន្ធផ្សព្វផ្សាយសង្គមរបស់នាង ពេលមកលេងនៅទីនេះកាលពីខែមិថុនា»។

លោក Low ក៏បានកត់សម្គាល់ពីការកើនឡើងគួរឲ្យកត់សម្គាល់នៃចំនួនភ្ញៀវទេសចរចិន ដែលមកទស្សនាតូបក្នុងអំឡុងពេលថ្ងៃឈប់សម្រាករដូវក្តៅរបស់ពួកគេចាប់ពីថ្ងៃទី ០១ ខែកក្កដាដល់ខែសីហាឆ្នាំនេះ។ លោកបានលើកឡើងថា សម្រាប់អ្នកចូលចិត្តធុរេនមកពីប្រទេសចិន ការភ្លក់ពូជ Musang King និង Black Thorn បានក្លាយជាសកម្មភាពដែលគួរឲ្យកត់សម្គាល់បំផុតក្នុងដំណើរកម្សាន្តរបស់ពួកគេ។

លើសពីនេះ លោកបានសង្កេតឃើញថា ភ្ញៀវទេសចរទាំងនេះរកឃើញថា ធូរេនមានតម្លៃសមរម្យជាងនៅក្នុងប្រទេសម៉ាឡេស៊ី បើធៀបនឹងប្រទេសចិន ហើយផ្តល់តម្លៃដល់បទពិសោធន៍រសជាតិពិសេសដែលផ្តល់ដោយពូជចម្រុះដែលមាន។ អ្នកទេសចរទាំងនេះអាចរីករាយនឹងផ្លែធុរេនស្រស់បំផុត ក្នុងពេលសម្រាកនៅទីនេះ ក៏ដូចជាការភ្លក់ផ្លែឈើក្នុងស្រុកផ្សេងៗគ្នា។

ទន្ទឹមនោះទៅទៀត ទីភ្នាក់ងារទេសចរណ៍ក្នុងស្រុក កំពុងឆ្លើយតបទៅនឹងចំណាប់អារម្មណ៍នេះដោយរួមបញ្ចូលការទទួលទានធុរេននៅក្នុងការផ្តល់ជូនទេសចរណ៍របស់ពួកគេ នេះបើយោងតាមលោក Low ហើយមគ្គុទ្ទេសក៍ទេសចរណ៍បានទទួលមតិកែលម្អជាវិជ្ជមាន ពីការធ្វើដំណើរទាំងនេះ។

ទោះបីជាយ៉ាងណា វាក៏មិនមែនជារឿងចម្លែកទេដែលតារាស្រីវ័យ៤២ឆ្នាំបានធ្វើឲ្យផ្លែទុរេនក្នុងប្រទេសម៉ាឡេស៊ីផ្ទុះការគាំទ្រយ៉ាងភ្លូកទឹកភ្លូកដីបែបនេះ។ កាលពីប៉ុន្មានខែមុន នាងត្រូវបានតែងតាំងជាទូតសុឆន្ទៈទេសចរណ៍សម្រាប់ Melaka ហើយនាងត្រូវបានគេរំពឹងថានឹងបង្កើនប្រជាប្រិយភាពខ្លួនដើម្បីបង្កើនវិស័យទេសចរណ៍ក្នុងស្រុក ដូចដែលបានសន្យាកន្លងមកជាមួយនឹងថ្នាក់ដឹកនាំប្រទេសម៉ាឡេស៊ី៕