ទើបផុតរញ្ជួយដី ពេលនេះជប៉ុន ត្រូវជួបគ្រោះធម្មជាតិធំមួយទៀត

រញ្ជួយដីកម្រិត៧.១រ៉ិចទ័រទើបតែកន្លងផុត ពេលនេះប្រទេសជប៉ុន ត្រូវត្រៀមខ្លួនប្រឈមមុខជាមួយគ្រោះធម្មជាតិដ៏ធំមួយទៀត នោះគឺ ព្យុះត្រូពិក ម៉ារីយ៉ា។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ NHK ដោយដកស្រង់ប្រភពពីមន្ត្រីឧតុនិយម, ព្យុះត្រូពិកធ្ងន់ធ្ងរនេះ អាចបង្កឲ្យមានបំណាក់ដីនៅតំបន់ Tohoku ភាគឦសាន នៅថ្ងៃចន្ទ ហើយក្នុងរយៈពេលប៉ុន្មានថ្ងៃខាងមុខ ព្យុះនេះអាចនាំមកនូវទឹកភ្លៀង ដែលឈានដល់កម្រិតខ្ពស់។

ស្របពេលជាមួយគ្នានោះដែរ ដោយសារតែហានិភ័យនៃគ្រោះមហន្តរាយ ប្រជាជនត្រូវបានណែនាំឲ្យប្រុងប្រៀបខ្លួន ដើម្បីការពារសុវត្ថិភាព មុនពេលព្យុះបង្កើនឥទ្ធិពលខ្លាំង។

តាមការព្យាករ ទឹកភ្លៀងអាចឈានដល់កម្រិត ៣០០មិល្លីម៉ែត្រក្នុងរយៈពេល២៤ម៉ោងបន្ទាប់ ​ខណៈខេត្ត Niigata និង Hokkaido ក៏អាចមានភ្លៀងធ្លាក់ខ្លាំងផងដែរ រួមជាមួយខ្យល់បក់ខ្លាំងចាប់ពីថ្ងៃចន្ទដល់ថ្ងៃអង្គារ។

មិនត្រឹមប៉ុណ្ណឹង ទឹករលកអាចឡើងដល់កម្ពស់៧ម៉ែត្រនៅឆ្នេរសមុទ្រ Tohoku ហើយមន្ត្រីអាកាសធាតុ ក៏ចេញការព្រមានអំពីបំណាក់ដី និងទឹកជំនន់នៅតំបន់ទំនាបផងដែរ។

ពាក់ព័ន្ធគ្រោះធម្មជាតិនេះ ប្រជាជនត្រូវបានណែនាំឲ្យតាមដានព័ត៌មាននិងពិនិត្យមើលផែនទីដែលបង្ហាញពីតំបន់គ្រោះថ្នាក់ ព្រមទាំងរកកន្លែងជម្លៀសខ្លួន ហើយត្រូវវេចខ្ចប់របស់របរចាំបាច់ឲ្យហើយ ដើម្បីជាវិធានការការពារទុកជាមុន៕

អត្ថបទ៖ សុខ សុវណ្ណ

ចុចអាន៖ ជប៉ុន ព្រមានថា មហាគ្រោះរញ្ជួយដីនាពេលអនាគត អាចសម្លាប់មនុស្សដល់ទៅជាង ២៣ម៉ឺននាក់ ឯណោះ