ព័ត៌មានអន្ដរជាតិ

ការវាយប្រហារដោយដ្រូនសម្លាប់ជនជាតិរ៉ូហ៊ីងយ៉ារាប់សិបនាក់ ពេលប៉ងភៀសខ្លួន

បានផុស

២ years មុន

នៅ

ថ្ងៃអង្គារ ១៣ សីហា ២០២៤

ដោយ

មានការវាយប្រហារដោយយន្តហោះគ្មានមនុស្សបើក(ដ្រូន) បានសម្លាប់ជនភៀសខ្លួនរ៉ូហ៊ីងយ៉ាជាច្រើននាក់ដែលភៀសខ្លួនចេញពីប្រទេសមីយ៉ាន់ម៉ា ខណៈអ្នកនៅរស់រានមានជីវិតមិនអាចកំណត់អត្តសញ្ញាណសាច់ញាតិរបស់ពួកគេដែលបានបាត់បង់ជីវិតក្នុងគំនរសាកសពដ៏ច្រើន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការដកស្រង់សម្ដីសាក្សីបួននាក់ សកម្មជន និងអ្នកការទូតម្នាក់ ពួកគេបានពណ៌នាការវាយប្រហារដោយដ្រូនកាលពីថ្ងៃចន្ទទៅលើក្រុមគ្រួសារដែលកំពុងរង់ចាំឆ្លងព្រំដែនចូលទៅក្នុងប្រទេសបង់ក្លាដែស។ ក្នុងនោះមានស្ត្រីមានផ្ទៃពោះជិតគ្រប់ខែ និងកូនស្រីអាយុ២ឆ្នាំរបស់នាង ស្ថិតក្នុងចំណោមជនរងគ្រោះក្នុងការវាយប្រហារដ៏សាហាវនេះ។ ហេតុការណ៍នេះជាការវាយប្រហារដ៏សាហាវបំផុតតែមួយគត់លើជនស៊ីវិលក្នុងរដ្ឋរ៉ាឃីន ក្នុងរយៈពេលប៉ុន្មានសប្តាហ៍នៃការប្រយុទ្ធគ្នារវាងកងទ័ពរបស់របបយោធាមីយ៉ាន់ម៉ា និងក្រុមតស៊ូប្រឆាំងរបបយោធា។

ទីភ្នាក់ងារ Reuters បានរាយការណ៍ថា កងទ័ព អារ៉ាកាន(Arakan) បានបដិសេធចំពោះការវាយប្រហារនេះ ខណៈកងជីវពល និងយោធាមីយ៉ាន់ម៉ា បានស្តីបន្ទោសគ្នាទៅវិញទៅមក។ Reuters មិនអាចផ្ទៀងផ្ទាត់ថាតើមានមនុស្សប៉ុន្មាននាក់បានស្លាប់នៅក្នុងការវាយប្រហារនោះទេ តែយ៉ាងណាវីដេអូដែលបានបង្ហោះលើប្រព័ន្ធផ្សព្វផ្សាយសង្គមបានបង្ហាញពីគំនរសាកសពរដូករណែលលើដីភក់ វ៉ាលី និងកាបូបស្ពាយរបស់ពួកគេបានរាយប៉ាយនៅជុំវិញសាកសព។ អ្នកនៅរស់រានមានជីវិតចំនួន៣នាក់បាននិយាយថា មនុស្សជាង២០០នាក់បានស្លាប់ ខណៈអ្នកផ្សេងក្នុងកន្លែងកើតហេតុថាបានឃើញសាកសពយ៉ាងហោចណាស់៧០នាក់។

លើសពីនេះ យោងតាមសាក្សីពីរនាក់និងប្រព័ន្ធផ្សព្វផ្សាយបង់ក្លាដែសបានឱ្យដឹងថា ទូកដឹកជនភៀសខ្លួនរ៉ូហ៊ីងយ៉ា ដែលជាសមាជិកនៃជនជាតិភាគតិចមូស្លីម ដែលប្រឈមមុខនឹងការធ្វើទុក្ខបុកម្នេញយ៉ាងខ្លាំងនៅក្នុងប្រទេសមីយ៉ាន់ម៉ា ក៏បានលិចនៅក្នុងទន្លេ Naf កាលពីថ្ងៃចន្ទស្លាប់មនុស្សរាប់សិបនាក់ថែមទៀតផងដែរ។

ជនជាតិរ៉ូហ៊ីងយ៉ាត្រូវបានគេធ្វើទុក្ខបុកម្នេញជាយូរមកហើយនៅក្នុងប្រទេសមីយ៉ាន់ម៉ាដែលកាន់សាសនាព្រះពុទ្ធភាគច្រើន។ ពួកគេជាង ៧៣ម៉ឺននាក់បានភៀសខ្លួនចេញពីប្រទេសនេះក្នុងឆ្នាំ២០១៧ បន្ទាប់ពីការបង្ក្រាបដែលដឹកនាំដោយយោធាដែលអង្គការសហប្រជាជាតិថ្កោលទោសថាមានចេតនាប្រល័យពូជសាសន៍។

ប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីយោធាបានដណ្តើមអំណាចពីរដ្ឋាភិបាលជាប់ឆ្នោតតាមបែបប្រជាធិបតេយ្យនៅឆ្នាំ២០២១ ហើយការតវ៉ាទ្រង់ទ្រាយធំបានវិវត្តទៅជាការតស៊ូប្រដាប់អាវុធយ៉ាងទូលំទូលាយ។ជនជាតិរ៉ូហ៊ីងយ៉ាបានចាកចេញពីរដ្ឋរ៉ាឃីនអស់ជាច្រើនសប្តាហ៍ ខណៈដែលកងទ័ពអារ៉ាកាន (Arakan) ដែលជាក្រុមប្រដាប់អាវុធមួយក្នុងចំណោមក្រុមប្រដាប់អាវុធជាច្រើនដែលកំពុងប្រយុទ្ធគ្នាយ៉ាងខ្លាំងនៅភាគខាងជើង ដែលជាជម្រករបស់ប្រជាជនមូស្លីមរ៉ូហ៊ីងយ៉ាយ៉ាងច្រើន៕