ហ្វីលីពីន​​នឹង​​ប្តឹង​​ចិន ​​ជុំវិញ​ឧប្បត្តិហេតុ​​ផ្លូវអាកាស​​នៅ​​សមុទ្រ​ចិន​​ខាងត្បូង

រដ្ឋមន្ត្រីការបរទេសក្រុងម៉ានីល លោក Enrique Manalo បាននិយាយកាលពីថ្ងៃទី១២​ខែសីហាថា ហ្វីលីពីននឹង​ដាក់​ពាក្យ​បណ្ដឹង​ការទូតជាមួយប្រទេសចិន ជុំវិញឧប្បត្តិហេតុថ្មីៗនេះពាក់ព័ន្ធនឹងយន្តហោះកងទ័ព​របស់​ចិន​នៅក្នុងដែនអាកាសលើ​ផ្ទៃ​សមុទ្រចិនខាងត្បូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេ​បញ្ជាការ​យោធា​ហ្វីលីពីន​លោក Romeo Brawner បានប្រាប់អ្នកយកព័ត៌មានថា រដ្ឋាភិបាល​ក្រុង​ម៉ានីល នឹងបន្តការល្បាតដែនសមុទ្រនៅសមុទ្រចិនខាងត្បូង បើទោះបីជាមាន​សកម្មភាព «គ្រោះថ្នាក់ និងបង្កហេតុ» របស់កងទ័ពអាកាសចិនកាលពីសប្តាហ៍មុនក៏ដោយ។

យោធាហ្វីលីពីនបានត្អូញត្អែរពីសកម្មភាពដ៏គ្រោះថ្នាក់ដោយយន្តហោះចិនពីរគ្រឿង ដែលបានទម្លាក់អណ្តាតភ្លើងនៅលើ​ផ្លូវ​អាកាស​របស់យន្តហោះកងទ័ពហ្វីលីពីន ដែលកំពុងធ្វើការល្បាតតាមទម្លាប់នៅលើ​តំបន់​ឆ្នេរ Scarborough Shoal កាលពីថ្ងៃទី​៨​ខែសីហា។

រដ្ឋមន្ត្រីការពារជាតិ លោក Gilberto Teodoro បាន​​បង្ហាញ​ក្ដី​សង្ឃឹម​ថា ប្រទេសចិននឹងអនុវត្តតាមច្បាប់អន្តរជាតិ និងលើតម្រូវការក្នុងការ​កាត់​បន្ថយភាពតានតឹង។

កាលពីថ្ងៃទី១១​ខែសីហា ប្រធានាធិបតីហ្វីលីពីន លោក Ferdinand Marcos បាននិយាយថា សកម្មភាពរបស់ប្រទេសចិន «មិនសមហេតុផល ខុសច្បាប់ និងព្រហើន»។

ស្ថានទូត​ចិន​នៅ​ទីក្រុង​ម៉ានីល​មិន​បាន​ឆ្លើយ​តប​ភ្លាមៗ​ចំពោះ​សំណើ​សុំ​ការ​អត្ថាធិប្បាយ​ទេ។ ប៉ុន្តែ​កាលពីថ្ងៃទី១០ខែសីហា បញ្ជាការភាគខាងត្បូងនៃកងទ័ពរំដោះប្រជាជនចិន បាន​ប្រកាស​ថា យន្តហោះហ្វីលីពីនបានឈ្លានពានដោយខុសច្បាប់ ទោះបីជាមានការព្រមានម្តងហើយម្តងទៀតក៏ដោយ៕

ដោយ៖ ឈាង