មហាសេដ្ឋីអូទ្រីសអាយុ៩១ឆ្នាំ ទទួលមរណភាព ក្រោយរៀបការប្រពន្ធទី៦ បាន២ខែ

​មហាសេដ្ឋីសញ្ជាតិអូទ្រីសឈ្មោះ Richard Lugner បានលាចាកលោកក្នុងអាយុ៩១ឆ្នាំដោយរោគាពាធ ហើយ​ការទទួល​មរណភាពនេះកើតឡើងត្រឹម២ខែប៉ុណ្ណោះ ក្រោយគាត់រៀបអា​ពាហ៍ពិពាហ៍ជាមួយអ្នកស្រី Simone Reiländer វ័យ៤២ឆ្នាំ ហើយនោះជាប្រពន្ធទី៦របស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន People, លោក Lugner បានទទួលមរណភាពកាលពីថ្ងៃចន្ទទី១២ខែសីហា នៅឯវីឡារបស់គាត់ក្នុងទីក្រុង វីយែន នៃប្រទេសអូទ្រីសផ្ទាល់។

សហគ្រិនរូបនេះ ត្រូវបានគេដឹងថា មានបញ្ហាសុខភាពរ៉ាំរ៉ៃ និងទទួលការវះកាត់ជាប់ជានិច្ច នារយៈពេលប៉ុន្មានខែចុងក្រោយនេះ។

ក្រៅពីភាពល្បីល្បាញក្នុងវិស័យជំនួញ, លោក Lugner ក៏ធ្លាប់ឈរឈ្មោះក្នុងការបោះឆ្នោតប្រធានាធិបតីអូទ្រីសបានពីរដងដែរ ក្នុងនាមជាបេក្ខជនឯករាជ្យ ដោយម្តងនៅឆ្នាំ១៩៩៨ និងម្តងទៀតនៅឆ្នាំ២០១៦។

តាមការចុះផ្សាយរបស់គេហទំព័រ Celebrity Networth, លោក Richard Lugner មានទ្រព្យសម្បត្តិ ២០០លានដុល្លារ គិតត្រឹមពេលគាត់ស្លាប់។

ក្រៅពីអ្នកស្រី Reiländer ជាភរិយាទី៦ ដែលរៀបការជាមួយគ្នាកាលពីថ្ងៃទី១ខែមិថុនាឆ្នាំ២០២៤, ពីមុនលោក Lugner ធ្លាប់បានរៀបការជាមួយអ្នកស្រី Christine Gmeiner (រួមរស់ចាប់ពីឆ្នាំ១៩៦១ដល់១៩៧៨), Cornelia Laufersweiler (១៩៧៩-១៩៨៣), Susanne Dietrich (១៩៨៤-១៩៨៩), Christina Lugner (១៩៩០-២០០៧) និងអ្នកស្រី Cathy Schmitz ដែលជាតារាម៉ូដែល Playboy និងជាតារាសម្តែង (២០១៤-២០១៦)។

លោកក៏មាន​កូន​បួន​នាក់​ផងដែរឈ្មោះ Jacqueline, Nadine, Alexander និង Andreas៕

អត្ថបទ៖ សុខ សុវណ្ណ

ចុចអាន៖ បាងកក ជាទីក្រុងមានមហាសេដ្ឋីច្រើនជាងគេបំផុត នៅអាស៊ីអាគ្នេយ៍