ក្រុមចោរចូលប្លន់ដល់អណ្តូងរ៉ែរបស់ចិន នៅហ្គាណា យកបានមាស១២គីឡូក្រាម តម្លៃ ៩០ម៉ឺនដុល្លារ

ក្រុមហ៊ុនរុករករ៉ែមាសរបស់ចិនឈ្មោះ Beijing Xiaocheng Technology Stock Co បានលាតត្រដាងថា ខ្លួនបាត់មាសអស់១២គីឡូក្រាម តម្លៃ៩០ម៉ឺនដុល្លារអាមេរិក ក្នុងអំពើប្លន់ប្រដាប់អាវុធនៅតំបន់ Esaase នៃទីក្រុង Kwahu West ភាគខាងកើតប្រទេសហ្គាណា ដែលហេតុការណ៍នេះ កើតឡើងកាលពីថ្ងៃទី១៨ខែមេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ South China Morning Post, ក្នុងរបាយការណ៍ហិរញ្ញវត្ថុពាក់កណ្តាលឆ្នាំដែលចេញផ្សាយកាលពីថ្ងៃពុធទី១៤ខែសីហា ក្រុមហ៊ុនចុះបញ្ជីនៅទីក្រុងសិនជិនបង្ហាញថា ក្នុងករណីនេះ ប៉ូលិសហ្គាណា ក៏ចាប់បានជនសង្ស័យពី៥ទៅ៦នាក់ ហើយឃុំខ្លួននៅប៉ុស្តិផងដែរ ខណៈភ្នាក់ងារសន្តិសុខនៃប្រទេសអាហ្វ្រិកខាងលិចមួយនេះ កំពុងបន្តស្វែងរកកន្លែងលាក់មាស។

ស្របពេលជាមួយគ្នានោះ ភ្នាក់ងារសន្តិសុខហ្គាណា ក៏បានប្រកាសផ្តល់រង្វាន់ សម្រាប់ព័ត៌មានឈានដល់ការចាប់ខ្លួនអ្នកដែលពាក់ព័ន្ធផ្សេងទៀត ក្នុងករណីប្លន់នេះផងដែរ។

តាមសេចក្តីរាយការណ៍ មានមនុស្សចំនួន១១នាក់ ត្រូវគេជឿថា ជាប់ពាក់ព័ន្ធក្នុងការវាយប្រហារប្រដាប់អាវុធទៅលើក្រុមហ៊ុនដែលជាបុត្រសម្ព័ន្ធរបស់ក្រុមហ៊ុនចិន Akroma Gold Mining Co។ ក្រុមចោរបានកំណត់គោលដៅលើរោងចក្រកែច្នៃរបស់ក្រុមហ៊ុន ដោយលួចយកមាស ថែមទាំងវាយដំនិងបង្ករបួសស្នាមដល់កម្មករជាច្រើននាក់ ទៀតផង ប៉ុន្តែមិនមានមនុស្សស្លាប់ទេ។

សូមបញ្ជាក់ថា បើយោងតាមទិន្នន័យរបស់ Observatory, ហ្គាណា គឺជាប្រទេសនាំចេញមាសដ៏កំពូលមួយ ដោយរកចំណូលបាន ៩.៥៣ពាន់លានដុល្លារក្នុងឆ្នាំ២០២២ ហើយស្ទើរតែពាក់កណ្តាលនៃមាសរបស់ប្រទេសនេះ គឺត្រូវបាននាំចេញទៅអារ៉ាប់រួម ខណៈស្វីស ឥណ្ឌា និងហុងកុង ក៏ជាអ្នកទិញដ៏សំខាន់ដែរ៕

អត្ថបទ៖ សុខ សុវណ្ណ

ចុចអាន៖ ផ្ទុះអណ្តូងរ៉ែមាស ស្លាប់មនុស្ស៦០នាក់ នៅប្រទេស បួគីណាហ្វាសូ