សេដ្ឋកិច្ច

ក្រុមហ៊ុនអណ្តូងរ៉ែមាសអូស្ត្រាលី គ្រោងពង្រីកការវិនិយោគរបស់ខ្លួនបន្ថែមទៀតនៅកម្ពុជា

បានផុស

៩ ខែ មុន

នៅ

ថ្ងៃចន្ទ ២៥ សីហា ២០២៥

ដោយ

ក្រុមហ៊ុន Renaissance Minerals (Cambodia) Ltd របស់ប្រទេសអូស្ត្រាលី ដែលធ្វើពាណិជ្ជកម្មអណ្ដូងរ៉ែមាស គ្រោងពង្រីកលទ្ធភាពនៃការវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជា។ នេះបើតាមការបញ្ជាក់ពី
លោក Morgan Hart នាយកគ្រប់គ្រង Renaissance Minerals ក្នុងឱកាសចូលជួបសម្តែងការគួរសម ជាមួយលោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជានៅព្រឹកថ្ងៃទី២៥ ខែសីហា ឆ្នាំ២០២៥ នេះ នាប្រទេសអូស្ត្រាលី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសនៃជំនួបនោះ លោក Morgan Hart បានថ្លែងអំណរគុណដល់លោកឧបនាយករដ្ឋមន្ត្រី ដែលបានអនុញ្ញាតឱ្យលោកចូលជួបសម្ដែងការគួរសម ពិភាក្សាការងារ និងទទួលអនុសាសន៍អំពីការវិនិយោគរបស់ខ្លួននៅប្រទេសកម្ពុជា។

លោកឧបនាយករដ្ឋមន្ត្រី ស៊ុន ចាន់ថុល បានលើកឡើងអំពីវឌ្ឍនភាពថ្មីៗរបស់កម្ពុជា និងលើកបង្ហាញដល់ដៃគូវិនិយោគិនអំពីសក្តានុពលផ្សេងទៀតរបស់ប្រទេសកម្ពុជា និងចក្ខុវិស័យរបស់រាជរដ្ឋាភិបាលកម្ពុជាក្នុងការធ្វើឱ្យប្រទេសកម្ពុជាក្លាយទៅជាប្រទេសដែលមានចំណូលខ្ពស់ត្រឹមឆ្នាំ២០៥០។

ជាការឆ្លើយតប នាយកគ្រប់គ្រងក្រុមហ៊ុន Renaissance Minerals ក៏បានលើកឡើងអំពីលទ្ធភាពក្នុងការពង្រីកការវិនិយោគរបស់ខ្លួនបន្ថែមទៀតនៅក្នុងប្រទេសកម្ពុជា។

សូមជម្រាបថា ក្រុមហ៊ុន Renaissance Minerals (Cambodia) Ltd. ដែលជាក្រុមហ៊ុនបុត្រសម្ព័ន្ធរបស់ Emerald Resources NL របស់ប្រទេសអូស្ត្រាលី បានបើកដំណើរការជាផ្លូវការនូវអណ្តូងរ៉ែមាសពាណិជ្ជកម្មដំបូងបង្អស់របស់កម្ពុជា គម្រោងអូវ៉ូមាស នៅថ្ងៃទី២១ ខែមិថុនា ឆ្នាំ២០២១ នៅស្រុកកែវសីមា ខេត្តមណ្ឌលគិរី។

គ្រឿងបរិក្ខារដែលមានតម្លៃ ១២០ លានដុល្លារបានចាប់ផ្តើមកែច្នៃរ៉ែ និងការរុករ៉ែមាសដែលមានផ្ទុកមាសរហូតដល់ ៩០% ដែលជាព្រឹត្តិការណ៍ដ៏សំខាន់មួយនៅក្នុងវិស័យរុករករ៉ែរបស់ប្រទេសកម្ពុជា។

ជាមួយនឹងសមត្ថភាពកែច្នៃរ៉ែជិត ២ លានតោនក្នុងមួយឆ្នាំ អណ្តូងរ៉ែនេះត្រូវបានគេរំពឹងថានឹងផលិតមាសជាមធ្យម ៣ តោនក្នុងមួយឆ្នាំ ក្នុងរយៈពេល ៨ ឆ្នាំដំបូង។ ប្រតិបត្តិការនេះប្រើប្រាស់កម្មករចំនួន ៤៦២នាក់ ក្នុងនោះមានប្រជាជនកម្ពុជាចំនួន ៤២៧នាក់ និងប្រកាន់ខ្ជាប់នូវស្តង់ដារអន្តរជាតិសម្រាប់កិច្ចគាំពារបរិស្ថាន និងការចូលរួមសហគមន៍។

អតីតនាយករដ្ឋមន្ត្រីកម្ពុជា សម្តេចហ៊ុន សែន បានសាទរគម្រោងនេះថាជារបកគំហើញមួយបន្ទាប់ពីការរុករកអស់រយៈពេល ១៤ ឆ្នាំ ដោយសង្កត់ធ្ងន់លើសក្តានុពលរបស់ខ្លួនក្នុងការរកចំណូលបាន ១៨៥ លានដុល្លារក្នុងលំហូរសាច់ប្រាក់មុនបង់ពន្ធប្រចាំឆ្នាំ និងរួមចំណែក ៤០ លានដុល្លារជាសួយសារអាករ និងពន្ធចូលថវិកាជាតិ៕

ដោយ៖ ឌិន ថារី