ព័ត៌មានអន្ដរជាតិ

ហុងគ្រីផ្តល់បណ្ណជាតិដល់ជនជាតិរុស្ស៊ីនិងបេឡារុស ខណៈអឺរ៉ុបបារម្ភសន្តិសុខ

បានផុស

១១ ខែ មុន

នៅ

ថ្ងៃចន្ទ ១៩ សីហា ២០២៤

ដោយ

ប្រទេសហុងគ្រីចាប់ពីពេលនេះនឹងដាក់បញ្ចូលប្រជាពលរដ្ឋរុស្ស៊ីនិងបេឡារុសនៅក្នុងកម្មវិធី«បណ្ណជាតិ (National Card)» ដែលនឹងអនុញ្ញាតឱ្យប្រជាពលរដ្ឋនៃប្រទេសទាំំងពីរនោះស្នាក់នៅប្រទេសរបស់ខ្លួន ឬធ្វើដំណើរដោយសេរីនៅក្នុងតំបន់ Schengen ទាំងមូលរយៈពេលយូរ។

នាយករដ្ឋមន្ត្រីហុងគ្រី លោក Viktor Orban។ បណ្តាញសង្គម Viktor Orban

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការបរទេសហុងគ្រី លោក Peter Szijjarto បានការពារគំនិតនៃការចេញ «បណ្ណជាតិ» សម្រាប់ប្រជាជនបេឡារុស និងរុស្ស៊ី ទោះបីជាប្រទេសមួយចំនួនចេញមុខតវ៉ាចំពោះការសម្រេចចិត្តរបស់រដ្ឋាភិបាលហុងគ្រី ដែលជាមិត្តជិតស្និទ្ធរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន។

សារព័ត៌មានអាល្លឺម៉ង់ DW រាយការណ៍ថា ដោយស្រង់សម្តីរដ្ឋមន្ត្រីការបរទេសហុងគ្រី ដែលអះអាងថា ការសម្តេចនេះមិនបង្កគ្រោះថ្នាក់ដល់អឺរ៉ុបទេ។

យោងតាមរដ្ឋមន្ត្រីការបរទេសហុងគ្រី ការចេញ«បណ្ណជាតិ» ដល់ប្រជាជនមកពីប្រទេសរុស្ស៊ី និងបេឡារុស «មិនបង្កហានិភ័យដល់សន្តិសុខនៃតំបន់ Schengen» នោះទេ។ តំបន់ Schengen គឺសំដៅដល់តំបន់ដែលគ្របដណ្តប់លើប្រទេស២៩នៅតំបន់អឺរ៉ុប ដែលពួកគេអាចធ្វើដំណើរចេញចូលគ្រប់ប្រទេសដោយគ្មានព្រំដែន។

យោងតាមលោក Szijjarto ជនជាតិរុស្សី និងបេឡារុសនឹងបន្ត«ស្ថិតនៅក្រោមការត្រួតពិនិត្យហ្មត់ចត់នៅពេលចូល និងស្នាក់នៅក្នុងប្រទេសហុងគ្រី»។

ក្នុងពេលជាមួយគ្នានោះ រដ្ឋមន្ត្រីការបរទេសហុងគ្រីបានចោទប្រកាន់ប្រទេសមកពីអឺរ៉ុបខាងជើង និងរដ្ឋបាល់ទិក អំពី«យុទ្ធនាការភូតកុហក» ប្រឆាំងនឹងទីក្រុង Budapest។ យុទ្ធនាការនេះរួមបញ្ចូលការចោទប្រកាន់ណាមួយអំពីអវត្តមាននៃការត្រួតពិនិត្យបែបនេះ។

តាមរយៈការទទួលបានបណ្ណជាតិនោះ ជនជាតិរុស្ស៊ី និងបេឡារុស នឹងមិនត្រូវបានទទួលការត្រួតពិនិត្យពិសេសនៅពេលចូលប្រទេសនោះទេ។ លើសពីនេះ ពួកគេអាចធ្វើដំណើរទៅកាន់ប្រទេសជាច្រើនទៀតរហូតដល់ជិត៣០ប្រទេស នៅក្នុងអឺរ៉ុបទាំងមូល ដោយគ្មានការត្រួតពិនិត្យ ព្រោះប្រទេសទាំងអស់នោះបានបើកចំហព្រំដែន។

បន្ទាប់ពីការសម្រេចចិត្តរបស់រដ្ឋាភិបាលហុងគ្រី ប្រទេសលីទុយអានីនៅសមុទ្របាល់ទិកបានដាក់ពាក្យបណ្តឹងទៅកាន់គណៈកម្មការអឺរ៉ុប។ រដ្ឋមន្ត្រីការបរទេសលីទុយអានី លោក Gabrielius Landsbergis បាននិយាយថា ទង្វើបែបនេះអាចគំរាមកំហែងដល់សន្តិសុខនៃសហភាពអឺរ៉ុបទាំងមូល។

កាលខែមុន ដោយសារការទៅទស្សនកិច្ចរបស់នាយករដ្ឋមន្ត្រី ហុងគ្រី លោក Viktor Orban ទៅកាន់ប្រទេសរុស្ស៊ី ជួបជាមួយប្រធានាធិបតី វ្ល៉ាឌីមៀរ ពូទីន ថ្នាក់ដឹកនាំអឺរ៉ុបបានសម្រេចលើកទីតាំងប្រជុំពីទីក្រុង Budapest ទៅកាន់ទីក្រុបប្រ៊ុចសែល ប្រទេសបែលហ្ស៊ិកវិញ៕