ព័ត៌មានអន្ដរជាតិ

ម៉ិកស៊ិក ប្រកាសផ្អាកទំនាក់ទំនងការទូតជាមួយអាមេរិក និងកាណាដា

បានផុស

២ years មុន

នៅ

ថ្ងៃពុធ ២៨ សីហា ២០២៤

ដោយ

Chheang

ប្រធានាធិបតីម៉ិកស៊ិក លោក Andres Manuel Lopez Obrador បានប្រកាសកាលពីថ្ងៃទី២៧ខែសីហាថា រដ្ឋាភិបាលរបស់លោកបានផ្អាកទំនាក់ទំនងជាមួយឯកអគ្គរដ្ឋទូតសហរដ្ឋអាមេរិក និងកាណាដា។ ការសម្រេចនេះ ធ្វើឡើងបន្ទាប់ពីមានការរិះគន់ជុំវិញសំណើកំណែទម្រង់ប្រព័ន្ធតុលាការដ៏ធំមួយក្នុងប្រទេសម៉ិកស៊ិក។

ប្រធានាធិបតីម៉ិកស៊ិក លោក Andres Manuel Lopez Obrador (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lopez Obrador បាននិយាយនៅក្នុងសន្និសីទសារព័ត៌មានថា ការផ្អាកទំនាក់ទំនងជាមួយស្ថានទូតនេះ មិនសំដៅលើទំនាក់ទំនងរវាងប្រទេសនិងប្រទេសនោះឡើយ ហើយការផ្អាកនេះទៀតសោតក៏ដោយសារតែមានការរិះគន់ពីស្ថានទូតទាំងនោះលើកំណែទម្រង់ប្រព័ន្ធតុលាការរបស់លោក។

ផែនការកែលម្អប្រព័ន្ធតុលាការដែលត្រូវបានស្នើឡើងដោយប្រធានាធិបតីម៉ិកស៊ិក បានបង្កឲ្យមានការតវ៉ា និងបាតុកម្ម ព្រមទាំងការរិះគន់ពីអ្នកវិនិយោគ និងស្ថាប័នហិរញ្ញវត្ថុជាច្រើន។

កាលពីសប្តាហ៍មុន ឯកអគ្គរដ្ឋទូតសហរដ្ឋអាមេរិកប្រចាំម៉ិកស៊ិក លោក Ken Salazar បានហៅសំណើរផ្លាស់ប្តូរប្រព័ន្ធតុលាការថាជា «ហានិភ័យ» ចំពោះលទ្ធិប្រជាធិបតេយ្យ ដែលនឹងធ្វើឲ្យមានគ្រោះថ្នាក់ដល់ទំនាក់ទំនងពាណិជ្ជកម្មរបស់ម៉ិកស៊ិកជាមួយរដ្ឋាភិបាលក្រុងវ៉ាស៊ីនតោន។

លោក Lopez Obrador បានស្ដីបន្ទោសឯកអគ្គរដ្ឋទូតអាមេរិក ដោយនិយាយថាវាជារឿងដែលរំលោភលើអធិបតេយ្យភាពម៉ិកស៊ិក។

យ៉ាងណា លោក Salazar បានបន្ទន់ឥរិយាបថរបស់លោក ហើយបានសរសេរនៅលើបណ្ដាញសង្គម X ថាលោកបើកចំហសម្រាប់កិច្ចសន្ទនា។ លោកបានបន្ថែមកាលពីថ្ងៃអង្គារថា៖ «យើងតែងតែធ្វើការដោយការគោរពបំផុតចំពោះអធិបតេយ្យភាពរបស់ប្រទេសម៉ិកស៊ិក»។

ប្រធានាធិបតីម៉ិកស៊ិក បានលើកឡើងថា ក្រសួងការបរទេសសហរដ្ឋអាមេរិកជាអ្នកនៅពីក្រោយការរិះគន់របស់លោក Salazar។ លោក Lopez Obrador បានបន្តថា៖ «យើងនឹងមិនប្រាប់គាត់ (Salazar) ឲ្យចាកចេញពីប្រទេសនោះទេ។ ខ្ញុំសង្ឃឹមថា ពួកគេសន្យាថានឹងគោរពឯករាជ្យភាពរបស់ប្រទេសម៉ិកស៊ិក និងអធិបតេយ្យភាពរបស់ប្រទេសយើង។ ប៉ុន្តែដរាបណាវានៅតែកើតឡើង ហើយពួកគេបន្តគោលនយោបាយទាំងនេះ យើងនៅតែផ្អាក (ទំនាក់ទំនងការទូត)»។

បន្ថែមពីនេះ លោក Lopez Obrador ក៏បានចោទប្រកាន់ឯកអគ្គរដ្ឋទូតកាណាដាថាបានជ្រៀតជ្រែកចូលកិច្ចការផ្ទៃក្នុងរបស់ម៉ិកស៊ិកផងដែរ ដោយបង្ហាញពីការភ័យខ្លាចចំពោះសំណើកំណែទម្រង់ប្រព័ន្ធតុលាការ។

សូមបញ្ជាក់ថា បើយោងតាមការិយាល័យតំណាងពាណិជ្ជកម្មសហរដ្ឋអាមេរិក ទំនាក់ទំនងពាណិជ្ជកម្មរវាងម៉ិកស៊ិក សហរដ្ឋអាមេរិក និងកាណាដា មានទំហំទឹកប្រាក់ប្រមាណ ១,៨ទ្រីលានដុល្លារកាលពីឆ្នាំ២០២២៕

ដោយ៖ ឈាង