ការ​វាយប្រហារនៅស៊ូដង់​បណ្តាល​ឱ្យស្លាប់​និង​របួស៥៥​នាក់​

យ៉ាងហោចណាស់មនុស្ស២៥នាក់បាន​បាត់​បង់​ជីវិត​និង៣០នាក់​បានរងរបួសនៅក្នុងការវាយប្រហារដោយកាំភ្លើងធំដោយកងកម្លាំងRSFកាលពីថ្ងៃចន្ទនៅក្នុងទីក្រុង El Fasher រដ្ឋ Darfur ភាគខាងលិចប្រទេសស៊ូដង់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី២៨ខែសីហានេះ។

យោងតាមលោក Ibrahim Khatir ប្រធានផ្នែកសុខភាពនៃរដ្ឋ Darfur បានឲ្យដឹងថា RSF បានកំណត់គោលដៅទីផ្សារ Abu Shouk ជាមួយនឹងកាំភ្លើងធំចំនួន៤គ្រាប់ កាលពីម្សិលមិញ ដែលបណ្តាលឱ្យមនុស្ស២៥នាក់បានស្លាប់ និងប្រហែល៣០នាក់ផ្សេងទៀតបានរងរបួស។

ជាមួយគ្នានេះ កងកម្លាំងរបស់​RSFកាលពីថ្ងៃចន្ទបានទម្លាក់គ្រាប់បែកលើមហាវិទ្យាល័យឯកជនមួយនៅ El Fasher ដោយបំផ្លាញសាលធំ បន្ទប់ពិសោធន៍ កន្លែងបញ្ចុះសព និងកន្លែងផ្សេងៗទៀត។ ទោះយ៉ាងណាRSF មិន​ទាន់​ចេញ​សេចក្តី​អធិប្បាយ​ណា​មួយ​ទាក់​ទង​នឹង​ការវាយប្រហារនេះ​នោះទេ ខណៈចាប់តាំងពីថ្ងៃទី១០ ខែឧសភា ការប៉ះទង្គិចគ្នាយ៉ាងខ្លាំងក្លាបានកើតឡើងនៅក្នុងទីក្រុង El Fasher រវាងកងកម្លាំងប្រដាប់អាវុធស៊ូដង់ (SAF) និង RSF។

គួរបញ្ជាក់ថាប្រទេសស៊ូដង់បាននិងកំពុងជួបប្រទះជម្លោះដ៏សាហាវរវាង SAF និង RSF ចាប់តាំងពីថ្ងៃទី ១៥ ខែមេសាឆ្នាំ ២០២៣ ដែលបណ្តាលឱ្យមានការបាត់បង់ជីវិតមនុស្សយ៉ាងហោចណាស់ ១៦៦៥០នាក់ ។ ហើយបើយោងតាមទិន្នន័យចុងក្រោយរបស់អង្គការសហប្រជាជាតិបានឱ្យដឹងថា មនុស្សប្រមាណ ១០,៧ លាននាក់ឥឡូវនេះត្រូវបានផ្លាស់ទីលំនៅក្នុងប្រទេសស៊ូដង់ ដោយមានប្រហែល ២,២ លាននាក់ផ្សេងទៀតកំពុងស្វែងរកការជ្រកកោននៅក្នុងប្រទេសជិតខាង។

ក្រៅពីបញ្ហាសង្គ្រាមប្រទេសនេះក៏កំពុងជួបវិបត្តិទឹកជំនន់ផងដែរ ដែលបណ្ដាលឲ្យមនុស្សប្រមាណ១៣៨នាក់ហើយបានបាត់បង់ជីវិត និង មនុស្សរាប់រយនាក់នៅតែបន្តបាត់ខ្លួនបន្ទាប់មានការបាក់ទំនប់វារីអគ្គិសនី៕

អត្ថបទ៖ ប៊ុន សុភាព