ជប៉ុន ប្រឈមគ្រោះមហន្តរាយធំធេង ពេលព្យុះទីហ្វុងកាចបំផុតប្រចាំឆ្នាំ ទៅដល់

ព្យុះទីហ្វុង សានសាន បានទៅដល់ប្រទេសជប៉ុនហើយ ដោយវាយប្រហារតំបន់ភាគខាងត្បូងយ៉ាងដំណំ ជាហេតុបង្ខំឲ្យប្រជាពលរដ្ឋរាប់ម៉ឺននាក់ត្រូវជម្លៀសខ្លួន ហើយអាជ្ញារថែមទាំងចេញការព្រមានអំពីគ្រោះមហន្តរាយធំធេងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ NHK, សានសាន គឺជាព្យុះទីហ្វុងកាចបំផុតដែលវាយប្រហារប្រទេសក្នុងឆ្នាំនេះ ដោយវានាំមកជាមួយនូវខ្យល់កន្ត្រាក់ល្បឿន២៥២គីឡូម៉ែត្រក្នុងមួយម៉ោង និងបង្កជាបំណាក់ដីនៅម៉ោង៨ព្រឹកថ្ងៃព្រហស្បតិ៍ទី២៩ខែសីហាឆ្នាំ២០២៤។

គិតត្រឹមពេលនេះ ព្យុះទីហ្វុង សានសាន បានសម្លាប់មនុស្ស៣នាក់រួចទៅហើយ និងបង្កទុក្ខលំបាកដល់អ្នកកោះKyushu ដោយផ្ទះ២៥៤ ៦១០ខ្នង មិនមានអគ្គិសនីប្រើប្រាស់ឡើយ។

ស្របពេលជាមួយគ្នានោះ ក្រុមហ៊ុន​រថយន្ត Toyota បាន​ផ្អាក​ផលិតកម្ម​នៅ​រោងចក្រ​ទាំង ១៤ របស់​ខ្លួន​ក្នុង​ប្រទេស​ជប៉ុន។ ចំណែកក្រុមហ៊ុនអាកាសចរណ៍ Japan Airlines បានលុបចោលជើងហោះហើរក្នុងស្រុកចំនួន ១៧២ជើង និងជើងហោះហើរអន្តរជាតិ៦ជើងនៅថ្ងៃព្រហស្បតិ៍។

ក្រុមហ៊ុន ANA ក៏លុបចោលជើងហោះហើរក្នុងស្រុក ២១៩ជើងនិងជើងហោះហើរអន្តរជាតិ ៤ជើងផងដែរដល់ថ្ងៃសុក្រ ខណៈការលុបចោលនេះ ប៉ះពាល់ដល់មនុស្សប្រហែល ២៥ ០០០នាក់។

ក្រៅពីជើងអាកាស, ក្រុមហ៊ុនផ្លូវដែក Kyushu បញ្ជាក់ថា ខ្លួនសម្រេចផ្អាកសេវារថភ្លើងល្បឿនលឿន Shinkansen ពីស្ថានីយ Kumamoto ទៅដល់ Kagoshima Chuo ហើយអាចមានការផ្អាកនៅកន្លែងផ្សេងទៀត។

លើសពីនេះ សេវារថភ្លើងពី Tokyo ទៅ Fukuoka ដែលជាទីក្រុងមានប្រជាជនច្រើនជាងគេនៅលើកោះ Kyushu ក៏អាចលុបចោលផងដែរ អាស្រ័យលើលក្ខខណ្ឌអាកាសធាតុក្នុងសប្តាហ៍នេះ៕

អត្ថបទ៖ សុខ សុវណ្ណ

ចុចអាន៖ ជប៉ុន លុបចោលជើងហោះហើរនិងសេវារថភ្លើង ដោយសារព្យុះ សានសាន