លោក ត្រាំ គំរាមដាក់គុកមេ Facebook មួយជីវិត

តាមការចុះផ្សាយរបស់ Daily Mail កាលពីថ្ងៃព្រហស្បតិ៍ទី២៩ខែសីហាឆ្នាំ២០២៤, អតីតប្រធានាធិបតីអាមេរិក ដូណាល់ ត្រាំ បានគំរាមដាក់គុកលោក Mark Zuckerberg មួយជីវិតប្រសិនបើបណ្តាញសង្គម Facebook លូកដៃក្នុងការបោះឆ្នោតខែវិច្ឆិកាខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសៀវភៅ Save America ដែលគ្រោងបោះពុម្ភផ្សាយនៅសប្តាហ៍ក្រោយ លោក ត្រាំ ចោទថា លោក ​Zuckerberg​ ព្យាយាមយក Facebook ធ្វើជាអាវុធប្រឆាំងរូបគាត់ អំឡុងយុទ្ធនាការឃោសនាបោះឆ្នោតឆ្នាំ២០២០។

លោក ត្រាំ អះអាងថា «កាលខ្ញុំកាន់តំណែង, Zuckerberg និងភរិយាបានមកលេងខ្ញុំដល់ការិយាល័យអូវ៉ាល់ ហើយ​ថែមទាំងទទួលទានអាហារពេលល្ងាចជាមួយគ្នាទៀតផង។ មហាសេដ្ឋីបច្ចេកវិទ្យារូបនេះ ធ្វើល្អដាក់មនុស្សរាល់គ្នា ប៉ុន្តែតាមពិតគេមានផែនការប្រឆាំងប្រធានាធិបតីរួចទៅហើយ។ នៅលើ Facebook គាត់ប្រាប់គេឯងថា គ្មាននរណាដូចត្រាំទេ ប៉ុន្តែនៅពេលជាមួយគ្នានោះ គាត់បែរយក Facebook ប្រឆាំងខ្ញុំទៅវិញ»។

ដូច្នេះហើយ ទើបយើងតាមដានគាត់យ៉ាងយកចិត្តទុកដាក់ ហើយប្រសិនបើគាត់ធ្វើអ្វីខុសច្បាប់ទៀតនៅពេលនេះ គាត់នឹងត្រូវជាប់គុកមួយជីវិតដូចអ្នកបំផ្លាញការបោះឆ្នោតដទៃទៀតដែរ។

សូមជម្រាបថា អំឡុងយុទ្ធនាការឃោសនាបោះឆ្នោតឆ្នាំ២០២០ ក្រុមហ៊ុនបច្ចេកវិទ្យាយក្សមួយនេះបានបិទការផ្សាយពាណិជ្ជកម្មជុំវិញការចោទប្រកាន់ក្លែងបន្លំការបោះឆ្នោត។

Facebook ក៏បានដាក់បម្រាមលើគណនីរបស់លោក ត្រាំ ផងដែរបន្ទាប់ពីកុបកម្មថ្ងៃទី៦ខែមករានៅ Capitol Hill ប៉ុន្តែពីរឆ្នាំក្រោយមក ក៏សម្រេចដកបម្រាមនោះវិញ។

យ៉ាងណា ចាប់តាំងពីពេលនោះមក Facebook បានផ្លាស់ប្តូរគោលនយោបាយ ថែមទាំងអនុញ្ញាតឲ្យផ្សព្វផ្សាយមាតិកានានា រួមទាំងការអះអាងដោយគ្មានមូលដ្ឋានរបស់លោក ត្រាំ និងអ្នកគាំទ្ររបស់គាត់ដែលថា ការបោះឆ្នោតឆ្នាំ ២០២០ គឺជាការក្លែងបន្លំផងដែរ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា ការព្រមានផ្ទុះសង្គ្រាមលោកលើកទី៣ របស់លោក ត្រាំ ពិតជាត្រឹមត្រូវណាស់