ត្រាំ៖ បើជាប់ឆ្នោត ខ្ញុំនឹងបន្ថយទណ្ឌកម្មលើប្រទេសនានា បើមិនអ៊ីចឹង ប្រាក់ដុល្លារនឹងស្លាប់

តាមសេចក្តីរាយការណ៍របស់ RT កាលពីថ្ងៃសៅរ៍ទី៧ខែកញ្ញាឆ្នាំ២០២៤, បេក្ខភាពជនប្រធា​នាធិបតីអាមេរិកមកពីគណបក្សសាធារណរដ្ឋ លោក ដូណាល់ ត្រាំ បានសន្យាថានឹងបន្ថយទណ្ឌកម្មដែលទីក្រុងវ៉ាស៊ីនតោនដាក់លើប្រទេសនានា ប្រសិនបើគាត់ឈ្នះការបោះឆ្នោតខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អំឡុងពេលបង្ហាញខ្លួននៅក្លឹបសេដ្ឋកិច្ចទីក្រុងញូវយ៉ក គេសួរទៅលោក ត្រាំ ថាតើលោកមានផែនការបង្កើនឬបន្ថយការរឹតត្បិតផ្នែកសេដ្ឋកិច្ចរុស្ស៊ី និងប្រទេសដទៃទៀតដែរឬក៏អត់។ លោកក៏ឆ្លើយថា «ខ្ញុំចង់ប្រើទណ្ឌកម្មឲ្យតិចបំផុតតាមដែលអាចធ្វើទៅបាន ព្រោះវាអាចមានបញ្ហាជាមួយប្រាក់ដុល្លារ។ បើទណ្ឌកម្មនៅតែខ្លាំង ប្រាប់ដុល្លាររបស់អ្នកនឹងត្រូវស្លាប់។ គ្រប់យ៉ាងដែលប្រាក់ដុល្លារតំណាងឲ្យនឹងត្រូវចប់ ដូច្នេះវាមានសារៈសំខាន់ណាស់ ចំពោះការដែលរក្សាប្រាក់ដុល្លារឲ្យនៅតែជាឈរជារូបិយប័ណ្ណបម្រុងអន្តរជាតិ»។

លោកបន្តថា «ប្រសិនបើយើងបាត់បង់ប្រាក់ដុល្លារជារូបិយប័ណ្ណពិភពលោកហើយនោះ ខ្ញុំគិតថា វាស្មើនឹងការចាញ់សង្រ្គាម ដែលនឹងធ្វើឲ្យយើងក្លាយជាប្រទេសលោកទីបី អ៊ីចឹងយើងមិនអាចអនុញ្ញាតឲ្យរឿងនេះកើតឡើងបានជាដាច់ខាត»។

តាមពិតទៅ លោក ត្រាំ នេះហើយដែល​បាន​ដាក់​ទណ្ឌកម្មខ្លាំងដៃ​លើ​រុស្ស៊ី អ៊ីរ៉ង់ និង​កូរ៉េ​ខាង​ជើង​ ​អំឡុង​ពេល​កាន់​តំណែង​​ចន្លោះ​ឆ្នាំ២០១៧ដល់​ឆ្នាំ២០២១ ប៉ុន្តែក្រោយមកលោកទទួលស្គាល់ថា លោកសម្រេចចិត្តដកការរឹតត្បិតចេញវិញ ព្រោះ​មើល​ទៅ អាមេរិកហាក់​ចាញ់​អ៊ីរ៉ង់ និង​រុស្ស៊ី។ ជាពិសេសដោយសារទណ្ឌកម្មនេះឯង ទើបជំរុញចិត្តប្រទេសចិន ឲ្យព្យាយាមប្រែក្លាយរូបិយប័ណ្ណរបស់ពួកគេក្លាយជារូបិយប័ណ្ណលេចធ្លោ លើពិភពលោក។

សូមបញ្ជាក់ថា សហរដ្ឋអាមេរិកនិងសម្ព័ន្ធមិត្ត បានដាក់ទណ្ឌកម្មចំនួន ២២ ០០០ លើទីក្រុងមូស្គូ ចាប់តាំងពីឆ្នាំ២០១៤មក នៅពេលរុស្ស៊ីកាត់យកតំបន់គ្រីមៀ និងពេលផ្ទុះជម្លោះអ៊ុយក្រែន-Donbass បន្ទាប់ពីរដ្ឋប្រហារនៅទីក្រុងកៀវ។ ក្រោយមកទៀត អាមេរិកដាក់ទណ្ឌកម្មរឹតខ្លាំងបន្ទាប់ពី ទីក្រុងមូស្គូ បើកប្រតិបត្តិការសឹកលើអ៊ុយក្រែនក្នុងខែកុម្ភៈឆ្នាំ២០២២។

ដោយឡែកកាលពីខែកក្កដា កាសែត Washington Post បានរាយការណ៍ថា មួយភាគបីនៃប្រជាជាតិលើពិភពលោក ក្នុងនោះរួមទាំង៦០%នៃបណ្តាប្រទេសដែលមានប្រាក់ចំណូលទាបផងដែរ ដែលបច្ចុប្បន្នកំពុងស្ថិតក្រោមការដាក់ទណ្ឌកម្មរបស់សហរដ្ឋអាមេរិក៕

អត្ថបទ៖ សុខ សុវណ្ណ