អាមេរិកចេញគោលការណ៍ណែនាំថ្មី អ្នកចាក់វ៉ាក់សាំងកូវីដរួច អាចជួបជុំដោយមិនចាំបាច់ពាក់ម៉ាស់បាន

មជ្ឈមណ្ឌលគ្រប់គ្រងនិងបង្ការជំងឺសហរដ្ឋអាមេរិក (CDC) បានប្រកាសថា ជនជាតិអាមេរិកដែលបានទទួលវ៉ាក់សាំងពេញលេញ អាចវិលត្រឡប់មករកភាពធម្មតាវិញបានហើយ។

យោងតាមគោលការណ៍ណែនាំថ្មីបានឲ្យដឹងថា អ្នកដែលទទួលបានវ៉ាក់សាំងតាមការតម្រូវ គឺអាចទៅលេងជាមួយមនុស្សចាក់ថ្នាំបង្ការផ្សេងទៀត និងមនុស្សដែលមិនទាន់ទទួលការចាក់ថ្នាំមួយចំនួនបាន។

CDC និយាយថា ប្រជាជនត្រូវបានគេគិតថា មានការការពារក្នុងរយៈពេលពីរសប្តាហ៍បន្ទាប់ពីពួកគេបានទទួលចាក់វ៉ាក់សាំងចុងក្រោយ។

រហូតមកដល់ពេលនេះ ជនជាតិអាមេរិកជាង៣០លាននាក់ បានទទួលថ្នាំបង្ការពេញលេញ។

ក្រុមមន្រ្តីសុខាភិបាលបានប្រកាសពីគោលការណ៍ណែនាំសុវត្ថិភាពថ្មីនេះ នៅឯសន្និសីទកាសែតរបស់ក្រុមការងារប្រយុទ្ធប្រឆាំងនឹងវីរុសកូរ៉ូណា របស់សេតវិមានកាលពីថ្ងៃចន្ទ។

អនុសាសន៍នេះនិយាយថា ជនជាតិអាមេរិកដែលចាក់វ៉ាក់សាំងពេញលេញ អាច៖

• ជួបជាមួយអ្នកចាក់វ៉ាក់សាំងពេញលេញផ្សេងទៀត នៅក្នុងផ្ទះដោយមិនបាច់ពាក់ម៉ាស់ឬវិធានការគម្លាតសង្គម។
• អាចជួបនៅក្នុងផ្ទះជាមួយមនុស្សដែលមិនបានទទួលវ៉ាក់សាំងមកពីគ្រួសារតែមួយ ប្រសិនបើពួកគេមានហានិភ័យទាបពីវីរុសនេះ។ 
• មិនបាច់ធ្វើតេស្តឬធ្វើចត្តាឡីស័កនៅពេលប៉ះពាល់ជាមួយអ្នកឆ្លងជំងឺកូវីដ១៩ លើកលែងតែមានរោគសញ្ញាលេចចេញមក។

ទោះបីជាយ៉ាងណាក៏ដោយ អ្នកដែលទទួលវ៉ាក់សាំងរួច នៅតែតម្រូវឲ្យអនុវត្តតាមវិធានការសុវត្ថិភាពមូលដ្ឋានផ្សេងទៀតដូចជាពាក់ម៉ាស់និងគម្លាតសង្គមនៅក្នុងទីសាធារណៈ ក៏ដូចជាការចៀសវាងពីហ្វូងមនុស្សធំៗនិងការធ្វើដំណើរផងដែរ៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ លោក មាស ឬទ្ធីបញ្ជាក់អ្នកឆ្លងកូវីដ​១៩ នៅហង្ស មាស

ចុចអាន៖ បុគ្គលិកហាងម៉ាស្សា ៣នាក់ឆ្លងកូវីដ១៩ អតិថិជនមួយចំនួនតម្រូវឲ្យទៅធ្វើតេស្តរកមេរោគថ្ងៃនេះ