ស្ថានភាពទឹកជំនន់នៅហាណូយ ធូរស្រាលបន្តិច ប៉ុន្តែ វៀងចន្ទន៍ កំពុងធ្ងន់ធ្ងរ

ស្ថានភាពទឹកជំនន់នៅទីក្រុងហាណូយនៃប្រទេសវៀតណាម ហាក់ធូរស្បើយបន្តិចហើយ បន្ទាប់ពីទឹកទន្លេក្រហម បានស្រកចុះ ប៉ុន្តែបើនិយាយពីទីក្រុងវៀងចន្ទន៍ឯណោះវិញ ស្ថានការណ៍កំពុងធ្ងន់ធ្ងរនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅហាណូយ បន្ទាប់ពីទឹកទន្លេក្រហម បានឡើងដល់កម្រិតខ្ពស់បំផុតក្នុងរយៈពេល២០ឆ្នាំកាលពីដើមសប្តាហ៍នេះ ឥឡូវទឹកបានស្រកចុះវិញ ខណៈពលរដ្ឋមួយចំនួន បានវិលទៅគេហដ្ឋាន ដើម្បីបោសសម្អាតនិងចូលទៅនៅវិញ។

និយាយពីវៀងចន្ទន៍, កម្ពស់ទឹកក៏បានឈានដល់កម្រិតគ្រោះថ្នាក់ធ្ងន់ធ្ងរដែរ ហើយនាយកដ្ឋានឧតុនិយមនិងជលសាស្ត្រ នៃក្រសួងធនធានធម្មជាតិនិងបរិស្ថាន បានជូនដំណឹងដល់ប្រជាពលរដ្ឋត្រូវប្រុងប្រយ័ត្ន និងត្រៀមខ្លួនជម្លៀសជានិច្ច។

ស្ថានីយ​ក្រុង​វៀងចន្ទន៍​ ​បាន​វាស់​កម្ពស់​ទឹក​ទន្លេ​មេគង្គ​ឈានដល់១២.៥៧ម៉ែត្រ គិតត្រឹមរសៀលថ្ងៃសុក្រ ដែលនេះគឺជាកម្រិតប្រកាសអាសន្នធ្ងន់ធ្ងរ។

សូមបញ្ជាក់ថា មនុស្សរាប់លាននាក់នៅទូទាំងតំបន់អាស៊ីអាគ្នេយ៍ កំពុងរងទុក្ខវេទនាដោយទឹកជំនន់ បំណាក់ដីនិងការដាច់ចរន្តអគ្គិសនី បន្ទាប់ពីត្រូវវាយប្រហារពេញទំហឹងដោយព្យុះកំណាច យ៉ាកជី។

ក្នុងនោះ វៀតណាម ជាប្រទេសដែលរងគ្រោះខ្លាំងបំផុត ដោយមានមនុស្សស្លាប់រហូតដល់ទៅ២៥៤នាក់ និងបាត់ខ្លួន៨២នាក់ គិតត្រឹមរាត្រីថ្ងៃសុក្រទី១៣ខែកញ្ញាឆ្នាំ២០២៤៕

អត្ថបទ៖ សុខ សុវណ្ណ

ចុចអាន៖ ខេត្តភាគខាងជើង វៀតណាម ជម្លៀសមនុស្សជាង ៥ម៉ឺននាក់ជាបន្ទាន់ ព្រោះទឹកជំនន់