ខេត្តភាគខាងជើង វៀតណាម ជម្លៀសមនុស្សជាង ៥ម៉ឺននាក់ជាបន្ទាន់ ព្រោះទឹកជំនន់

ខេត្តNinh Binh ភាគខាងជើងប្រទេសវៀតណាម បានជម្លៀសមនុស្សប្រមាណ ៥៥ ០០០នាក់ជាបន្ទាន់ ដោយសារតែទឹកទន្លេ Hoang Long ហក់ឡើងខ្ពស់ បង្កហានិភ័យគ្រោះទឹកជំនន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express កាលពីថ្ងៃព្រហស្បតិ៍ទី១២ខែកញ្ញាឆ្នាំ២០២៤, អ្នកដែលត្រូវជម្លៀសទាំងនោះគឺស្ថិតនៅក្នុងតំបន់វាលទំនាបនៃស្រុកGia Vien និង Nho Quan ខណៈកម្ពស់ទឹកទន្លេ Hoang Long ឡើងផុត៤.៩ម៉ែត្រទៅហើយ។

រឿងនេះកើតឡើងស្របពេលវៀតណាម បញ្ជាក់ពីការសម្លាប់មនុស្សចំនួន២៣៣នាក់ ដោយ​សារតែទឹកជំនន់និងបំណាក់ដី ដែលបណ្តាលមកពីឥទ្ធពិលនៃព្យុះទីហ្វុងកំណាច យ៉ាកជី។

យោងតាមអង្គការ UNICEF, ព្យុះទីហ្វុងនេះ ក៏បានបំផ្លាញផ្ទះជាង ១៤០ ០០០ខ្នង នៅក្នុងខេត្តចំនួន២៦ នៃប្រទេសវៀតណាមផងដែរ។

លើសពីនេះ ក្រសួងកសិកម្មវៀតណាមបញ្ជាក់ថា ទឹកជំនន់ ថែមទាំងបានបំផ្លិចបំផ្លាញដំណាំជាង ២៥០ ០០០ហិកតា និងសត្វពាហនៈដ៏ច្រើនសន្ធឹកសន្ធាប់ទៀតផង ខណៈដីស្រែចម្ការជុំវិញទីក្រុងហាណូយ ត្រូវប៉ះពាល់យ៉ាងខ្លាំង៕

អត្ថបទ៖ សុខ សុវណ្ណ

ចុចអាន៖ សប្តាហ៍ក្រោយ ភ្លៀងធ្លាក់ខ្លាំងនឹងវាយប្រហារទីក្រុង ហូជីមិញ វិញម្តង អាចបង្កជាជំនន់