UN នឹងចុះកិច្ចព្រមព្រៀងឧក្រិដ្ឋកម្មតាមអ៊ីនធឺណិតដ៏សំខាន់ នៅហាណូយ ក្នុងសប្តាហ៍នេះ

អង្គការសហប្រជាជាតិ (UN) នឹងចុះហត្ថលេខាលើកិច្ចព្រមព្រៀងដ៏សំខាន់មួយស្តីពី ឧក្រិដ្ឋកម្មតាមអ៊ីនធឺណិត ក្នុងទីក្រុង ហាណូយ នៃប្រទេសវៀតណាម នៅចុងសប្តាហ៍នេះ ជាមួយគោលបំណងទប់ស្កាត់បទល្មើសដែលបង្កការខាតបង់សេដ្ឋកិច្ចសកល ក្នុងទំហំទឹកប្រាក់រាប់កោដិដុល្លារជារៀងរាល់ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Reuters នៅថ្ងៃពុធទី២២ ខែតុលាឆ្នាំ២០២៥ កិច្ចព្រមព្រៀងនេះតម្រូវឲ្យមានការផ្តល់សច្ចាប័នពី៤០ប្រទេសទើបអាចចូលជាធរមានបាន។

ដ្បិតតែវានឹងក្លាយជាអាវុធដ៏ខ្លាំងប្រយុទ្ធជាមួយឧក្រិដ្ឋកម្មតាមអ៊ីនធឺណិតក៏ពិតមែន ប៉ុន្តែកិច្ចព្រមព្រៀងនេះក៏ត្រូវបានក្រុមអ្នករិះគន់ រួមទាំងបណ្តាអង្គការសិទ្ធិមនុស្សនិងក្រុមហ៊ុនបច្ចេកវិទ្យាធំៗ ព្រមានថាដែរថា ភាសាមិនច្បាស់លាស់ដែលដាក់បញ្ចូលក្នុងកិច្ចព្រមព្រៀងនេះ អាចឈានទៅដល់ការរំលោភសិទ្ធិមនុស្សនិងជួយសម្រួលដល់សកម្មភាពខុសច្បាប់ ជាជាងការទប់ស្កាត់ទៅវិញ។

មិនត្រឹមប៉ុណ្ណឹង ក៏មានក្តីបារម្ភជុំវិញការរឹតត្បិត សេរីភាពនៃការបញ្ចេញមតិ ការធ្វើទុក្ខបុកម្នេញផ្នែកនយោបាយ និងការដាក់ទោសទណ្ឌលើ Hacker ដែលធ្វើការតាមផ្លូវល្អផងដែរ។

លើសពីនេះ សូម្បីតែការយកវៀតណាមធ្វើជាម្ចាស់ផ្ទះក៏ត្រូវបានគេរិះគន់ដែរ។ ប្រទេសនេះត្រូវគេរិះគន់ដោយសារ កំណត់ត្រាសិទ្ធិមនុស្សមិនល្អ រួមទាំងការរឹតត្បិតលើសេរីភាពតាមអ៊ីនធឺណិតផងដែរ។

ជាក់ស្តែងមនុស្សយ៉ាងតិច៤០នាក់ត្រូវបានចាប់ខ្លួននៅឆ្នាំនេះ ពីបទចោទប្រកាន់ឧក្រិដ្ឋកម្មតាមអ៊ីនធឺណិតប្រឆាំងនឹងរដ្ឋ។ មន្ត្រីវៀតណាមយល់ឃើញថា កិច្ចព្រមព្រៀងនេះគឺជាឧបករណ៍មួយដើម្បីបង្កើនការការពារតាមអ៊ីនធឺណិតរបស់ខ្លួន នៅចំពេលការរវាយប្រហារតាមអ៊ីនធឺណិតកំពុងកើនឡើង។

សូមជម្រាបថា អគ្គលេខាធិការ UN លោក Antonio Guterres នឹងចូលរួមពិធីចុះហត្ថលេខានៅថ្ងៃទី២៥ខែតុលា ខណៈសហភាពអឺរ៉ុប និង កាណាដា ក៏ត្រូវបានគេរំពឹងថានឹងចុះហត្ថលេខាដែរ ទោះការចូលរួមរបស់សហរដ្ឋអាមេរិកមិនទាន់ច្បាស់ការណ៍ក៏ដោយ៕

អត្ថបទ៖ សុខ សុវណ្ណ

ចុចអាន៖ ថៃ ខំប្រឹងដោះសា ករណីតារាម៉ូដែលបេឡារុស ត្រូវគេសម្លាប់វះយកគ្រឿងក្នុង