ភាគពាយព្យរុស្ស៊ី ជម្លៀសប្រជាជនជាបន្ទាន់ ដោយសារអ៊ុយក្រែន វាយប្រហារទ្រង់ទ្រាយធំ

តាមការចុះផ្សាយរបស់ RT នៅថ្ងៃពុធទី១៨ខែកញ្ញាឆ្នាំ២០២៤, តំបន់ Tver ភាពពាយព្យប្រទេសរុស្ស៊ី បានចេញបញ្ជាឲ្យជម្លៀសប្រជាជនជាបន្ទាន់ដោយសារតែ អ៊ុយក្រែន បើកការវាយប្រហារដ្រូនទ្រង់ទ្រាយធំ បង្កជាអគ្គិភ័យឆាបឆេះយ៉ាងសន្ធោសន្ធៅនៅទីនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅទីប្រជុំជន Toropets, បំណែកដ្រូនដែលធ្លាក់ បានបង្កជាអគ្កិភ័យ ប៉ុន្តែលោក Igor Rudenya ជាអភិបាលតំបន់នោះ មិនបញ្ជាក់ឡើយថាតើមានមនុស្សស្លាប់និងរបួសឬអត់។

ទីប្រជុំជន Toropets ស្ថិតនៅចម្ងាយប្រហែល ៣៨០គីឡូម៉ែត្រ ភាគពាយព្យរដ្ឋធានី មូស្គូ និងមានចម្ងាយប្រហែល ៤៧០គីឡូម៉ែត្រ ភាគខាងជើងព្រំដែនជាមួយអ៊ុយក្រែន។

ជុំវិញបញ្ហានេះដែរ ក្រសូងការពារជាតិនៅទីក្រុងមូស្គូ បានចេញរបាយការណ៍ថា អ៊ុយក្រែន បានបញ្ជូនដ្រូន ៥៤គ្រឿងនិងបាញ់មីស៊ីល២គ្រាប់ វាយប្រហារតំបន់រុស្ស៊ីចំនួន៥ ប៉ុន្តែមិនបញ្ចេញតួលេខឡើយថាតើ មានមនុស្សប៉ុន្មាននាក់ត្រូវជម្លៀស ដោយគ្រាន់តែគេឃើញមានរថយន្តក្រុងជាច្រើនគ្រឿង ដឹកប្រជាជនជម្លៀសខ្លួនប៉ុណ្ណោះ។

ក្រៅពីការជម្លៀសមនុស្ស តំបន់ទាំងនេះ ក៏បិទសាលារៀនផងដែរ ហើយមិនដឹងពេលណា ទើបស្ថានការណ៍វិលមករកសភាពដូចធម្មតាវិញឡើយ។

សូមបញ្ជាក់ថា ប៉ុន្មានថ្មីៗនេះ អ៊ុយក្រែន បានបង្កើនការវាយប្រហារយ៉ាងញឹកញាប់ចូលដីរុស្ស៊ី ដោយកំណត់គោលដៅជាចម្បងលើរោងចក្រថាមពល ប៉ុន្តែក៏បាញ់លើតំបន់មានប្រជាជនរស់នៅផងដែរ។

ជាក់ស្តែងកាលពីដើមខែនេះ យន្តហោះគ្មានមនុស្សបើករបស់អ៊ុយក្រែន បានវាយប្រហារអាផាតមិន៣កន្លែងក្នុងទីក្រុង Ramenskoye ជិតរដ្ឋធានីមូស្គូ ដោយសម្លាប់មនុស្សម្នាក់និងបណ្តាលឲ្យរបួស៣នាក់ទៀត៕

អត្ថបទ៖ សុខ សុវណ្ណ

ចុចអាន៖ រុស្ស៊ី ទម្លាក់​គ្រាប់បែក​នៅ​ទីក្រុង Kharkiv សម្លាប់​មនុស្ស​ម្នាក់ និង​របួស​៤២​នាក់