ព័ត៌មានអន្ដរជាតិ

ចិន ដាក់ទណ្ឌកម្មក្រុមហ៊ុនអាមេរិកចំនួន៩ ដែលលក់អាវុធឲ្យតៃវ៉ាន់

បានផុស

២ years មុន

នៅ

ថ្ងៃព្រហស្បតិ៍ ១៩ កញ្ញា ២០២៤

ដោយ

Chheang

ក្រសួងការបរទេសចិន បានប្រកាសកាលពីថ្ងៃពុធថា រដ្ឋាភិបាលក្រុងប៉េកាំងបានសម្រេចដាក់ទណ្ឌកម្មលើក្រុមហ៊ុនអាមេរិកចំនួន៩ ជុំវិញរឿងជួញដូរសម្ភារៈយោធាទៅកាន់កោះតៃវ៉ាន់។

វិធានការនេះ ធ្វើឡើងខណៈដែលចិនបន្តដាក់សម្ពាធលើតៃវ៉ាន់ និងទាមទារឲ្យសហរដ្ឋអាមេរិកបញ្ឈប់ការគាំទ្រការប្រកាសឯករាជ្យភាពរបស់ដែនកោះមួយនេះ។ ក្រសួងការបរទេសចិន បាននិយាយថា ក្រុងប៉េកាំងបានបង្កកទ្រព្យសម្បត្តិក្រុមហ៊ុនអាមេរិកទាំង៩ដែលមានមូលដ្ឋាននៅលើទឹកដីរបស់ខ្លួន ហើយបានហាមឃាត់នូវរាល់ប្រតិបត្តិការទាំងអស់របស់ក្រុមហ៊ុនទាំងនោះជាមួយប្រជាជន ឬក្រុមហ៊ុនផ្សេងៗដែលមានទីតាំងនៅក្នុងប្រទេសចិន។ ការដាក់ទណ្ឌកម្មនេះ ត្រូវបានអនុវត្តភ្លាមៗបន្ទាប់ពីការប្រកាស។

លោក Lin Jian អ្នកនាំពាក្យក្រសួងការបរទេស បានរៀបរាប់ថា ការលក់អាវុធរបស់អាមេរិកឲ្យទៅតៃវ៉ាន់ បានបំពានយ៉ាងធ្ងន់ធ្ងរលើគោលការណ៍ចិនតែមួយ ហើយរំលោភលើអធិបតេយ្យភាព និងផលប្រយោជន៍សន្តិសុខរបស់ចិន និងធ្វើឲ្យខូចដល់ទំនាក់ទំនងចិន-អាមេរិក។

លោក Lin បាននិយាយទៀតថា ទីក្រុងប៉េកាំងកំពុងចាត់វិធានការយ៉ាងម៉ឺងម៉ាត់ប្រឆាំងនឹងក្រុមហ៊ុនអាមេរិកទាំងនោះ។ បន្ថែមពីនេះ លោក Lin បានទាមទារឲ្យសហរដ្ឋអាមេរិក «ឈប់ប្រកាន់យក និងគាំទ្រឯករាជ្យភាពតៃវ៉ាន់ ហើយឈប់ធ្វើឲ្យខូចសន្តិភាព និងស្ថិរភាពនៅច្រកសមុទ្រតៃវ៉ាន់»។

ក្រុមហ៊ុនដែលរងទណ្ឌកម្មចិន មានដូចជា Sierra Nevada Corporation, Stick Rudder Enterprises, Cubic Corporation, S3 Aerospace, TCOM Ltd Partnership, TextOre, Planate Management Group, ACT1 Federal និង Exovera ។

សូមរំឭកថា កាលពីថ្ងៃចន្ទ ក្រសួងការបរទេសអាមេរិកបានអនុម័តការលក់គ្រឿងបន្លាស់យោធាឲ្យទៅតៃវ៉ាន់ដែលមានតម្លៃប្រហែល ២២៨លានដុល្លារ។ ក្រសួងការពារជាតិរបស់តៃវ៉ាន់ បានប្រកាសថា ការលក់សម្ភារៈយោធាដែលនឹងជួយរក្សា «ការត្រៀមខ្លួនប្រយុទ្ធ» នឹង «មានប្រសិទ្ធភាព» ក្នុងរយៈពេលមួយខែ៕

ដោយ៖ ឈាង