តួលេខមនុស្សស្លាប់ដោយសារព្យុះកំណាច Helene នៅអាមេរិក កើនដល់ជិត ១០០នាក់

ឥទ្ធិពលព្យុះសង្ឃរា Helene បានបង្កទុក្ខវេទនាខ្លាំងនៅសហរដ្ឋអាមេរិក ដោយគិតត្រឹមព្រឹកថ្ងៃចន្ទទី៣០ខែកញ្ញាឆ្នាំ២០២៤ តួលេខមនុស្សស្លាប់បានកើនឡើងដល់៩៣នាក់ហើយ ក្នុងរដ្ឋចំនួន៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមអ្នកស្លាប់, មាន៣៦នាក់ត្រូវបានរាយការណ៍នៅរដ្ឋ North Carolina ខណៈនៅ South Carolina មាន២៥នាក់, Georgia ១៧នាក់, Florida ១១នាក់, Virginia ២នាក់ និង Tennessee ២នាក់។

ក្រៅពីមនុស្សស្លាប់ ក៏មានសេចក្តីរាយការណ៍អំពីករណីដាច់ចរន្តអគ្គិសនីចំពោះពលរដ្ឋរាប់លាននាក់និងខូចខាតសំណង់ហេដ្ឋារចនាសម្ព័ន្ធរាប់រយផងដែរ។

ស្របពេលជាមួយគ្នានោះ តាមសេចក្តីរាយការណ៍របស់ CNN, រដ្ឋ North Carolina កំពុងប្រឈមមុខនឹងគ្រោះទឹកជំនន់អាក្រក់បំផុតក្នុងប្រវត្តិសាស្ត្ររបស់ខ្លួន ខណៈអភិបាល Roy Cooper និយាយថា ក្រុមជួយសង្គ្រោះ ត្រូវដឹកគ្រឿងផ្គត់ផ្គង់តាមឧទ្ធម្ភាគចក្រ ទៅកាន់តំបន់មួយចំនួន ដោយសារតែផ្លូវត្រូវទឹកជំនន់កាត់ផ្តាច់។

មិនត្រឹមប៉ុណ្ណឹង ភាគខាងលិចរដ្ឋនេះ ក៏ព្រមានអំពីគ្រោះទឹកជំនន់រហ័សផងដែរ ដោយសារហានិភ័យនៃការបាក់ទំនប់ទឹក។

ទោះបីជាយ៉ាងណាក៏ដោយ សេតវិមានប្រកាសថា លោកប្រធានាធិបតី ចូ បៃដិន បានអនុម័តជំនួយសហព័ន្ធសម្រាប់រដ្ឋមួយចំនួនរួចហើយ ថែមទាំងគ្រោងចុះទៅពិនិត្យតំបន់ដែលរងគ្រោះខ្លាំងបំផុតទៀតផង។

សូមបញ្ជាក់ជាថ្មី ព្យុះសង្ឃរាកំណាច Helene បានចាប់ផ្តើមវាយប្រហារដីគោករដ្ឋ Florida ក្នុងនាមជាព្យុះប្រភេទទី៤ កាលពីល្ងាចថ្ងៃទី២៦ខែកញ្ញា ជាមួយកម្លាំងខ្យល់២២៥គីឡូម៉ែត្រក្នុងមួយម៉ោង ដោយសម្លាប់មនុស្សនិងបង្កការបំផ្លិចបំផ្លាញធំធេងជាបន្តបន្ទាប់៕

អត្ថបទ៖ សុខ សុវណ្ណ

ចុចអាន៖ ព្យុះ Helene នៅ​អាមេរិក បណ្ដាល​ឲ្យ​ស្លាប់​៩០​នាក់ និង​ការ​ខូចខាតអាច​ដល់​១០០​ពាន់​លានដុល្លារ