តៃវ៉ាន់ ត្រៀមខ្លួន ខណៈព្យុះទីហ្វុងក្រាតធន នឹងវាយប្រហារចំតំបន់មានប្រជាជនច្រើន

តាមសេចក្តីរាយការណ៍របស់ Reuters នៅថ្ងៃចន្ទទី៣០ខែកញ្ញាឆ្នាំ២០២៤, តៃវ៉ាន់ កំពុងប្រុងប្រៀបខ្លួននិងចេញការព្រមានអំពីព្យុះទីហ្វុង ក្រាតធន (Krathon) ដែលបោះពួយមកវាយប្រហារចំតំបន់មានប្រជាជនរស់នៅច្រើន លើឆ្នេរភាគខាងលិចកោះមួយនេះ។

រដ្ឋបាលអាកាសធាតុកណ្តាលតៃវ៉ាន់ (CWA) ប្រកាសថា ដោយនាំមកជាមួយខ្យល់បក់ល្បឿន២២០គីឡូម៉ែត្រក្នុងមួយម៉ោង, ព្យុះទីហ្វុងក្រាតធន នឹងវាយប្រហារទីក្រុងកំពង់ផែ Kaohsiung ដែលមានប្រជាជន ២ ៧៣៧ ៦៦០នាក់នៅព្រឹកថ្ងៃពុធ រួចក៏ឆ្លងកាត់ភាគកណ្តាលកោះតៃវ៉ាន់ ឆ្ពោះទៅទិសឦសាន ហើយចូលទៅក្នុងសមុទ្រចិនខាងកើត។

លោក Gene Huang អ្នកព្យាករនៅ CWA បានប្រាប់ឲ្យដឹងថា «ផលប៉ះពាល់កាន់តែធំទៅៗ វាជារឿងកម្របំផុតដែលព្យុះទីហ្វុងដ៏ខ្លាំងបែបនេះ បោះពួយមកវាយប្រហារចំដោយផ្ទាល់ទៅលើតំបន់ទំនាបភាគខាងលិចកោះតៃវ៉ាន់»។

ជាការប្រុងប្រៀបខ្លួន អាជ្ញាធរតៃវ៉ាន់បានដាក់ពង្រាយទូកជាង១ ០០០គ្រឿងនិងទាហាន ​២ ២០០នាក់ ដើម្បីឈរជើងត្រៀមជួយសង្គ្រោះ រួមទាំងនៅឆ្នេរសមុទ្រភាគខាងកើតផងដែរ។

លើសពីនេះ សេវាស្រឡាងដឹកអ្នកដំណើរនិងរថភ្លើងក៏ត្រូវផ្អាកសិនផងដែរ ខណៈជើងហោះហើរក្នុងស្រុកមួយចំនួន ក៏ត្រូវរំខានដូចគ្នា ប៉ុន្តែជើងហោះហើរអន្តរជាតិ មិនទាន់ប៉ះពាល់ទេ។

មិនមែនតែតៃវ៉ាន់ឡើយ ព្យុះក្រាតធន ក៏នឹងជះឥទ្ធិពលលើប្រទេសកម្ពុជាផងដែរ ពោលគឺចាប់ពីថ្ងៃទី៣០ខែកញ្ញា ដល់ថ្ងៃទី២ខែតុលាឆ្នាំ២០២៤, តំបន់វាលទំនាប នឹងមានសីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៤°C។

ខ្យល់បក់មកពីទិសនីរតី និងបស្ចិម មានល្បឿនមធ្យម២,៥ម៉ែត្រ វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងភ្នំពេញ អាចមានភ្លៀងធ្លាក់ជាមួយផ្គររន្ទះ នឹងខ្យល់កន្ត្រាក់គ្របដណ្តប់លើផ្ទៃ ដី៣៥%។

តំបន់ខ្ពង់រាប មានសីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៣°C។ ខ្យល់បក់មក ពីទិសនិរតី និងពាយព្យមានល្បឿនមធ្យម ៣ម៉ែត្រ/វិនាទី។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមាន ភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្តប់លើផ្ទៃដី២៥%។

តំបន់មាត់សមុទ្រ មានសីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៣°C ។ ខ្យល់បក់ មកពីទិសនិរតី មានល្បឿន មធ្យម ២,៥ម៉ែត្រ វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្តប់លើផ្ទៃដី១០%។ រលកសមុទ្រមានកម្ពស់មធ្យមអប្បបរមា​០,៥០ម៉ែត្រ និងកម្ពស់មធ្យមអតិបរមា១,២៥ម៉ែត្រ៕

អត្ថបទ៖ សុខ សុវណ្ណ

ចុចអាន៖ ព្យុះចំនួន២ នឹងជះឥទ្ធិពលលើកម្ពុជាក្នុងពេលតែមួយចាប់ពីថ្ងៃនេះ ដល់ថ្ងៃទី២តុលា