អ៊ីស្រាអែល ប្រកាសក្តែងៗថា ខ្លួនវាយប្រហារកន្លែងណាក៏បានដែរ នៅមជ្ឈិមបូព៌ា

មេទ័ពអ៊ីស្រាអែល បានប្រកាសក្តែងៗថា ប្រទេសរបស់ខ្លួន មានសមត្ថភាពអាចវាយប្រហារកន្លែងណាក៏បានដែរ នៅក្នុងតំបន់មជ្ឈិមបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់សារព័ត៌មាន Times of Israel កាលពីថ្ងៃពុធទី២ខែតុលាឆ្នាំ២០២៤, ឧត្តមសេនីយ Herzi Halevi អគ្គសេនាធិការ IDF ព្រមានថា អ៊ីស្រាអែលនឹងឆ្លើយតបទៅការវាយប្រហារមីស៊ីលរបស់អ៊ីរ៉ង់ ហើយកងទ័ពរបស់លោក អាចវាយប្រហារបានគ្រប់កន្លែងទាំងអស់នៅក្នុងតំបន់មជ្ឈិមបូព៌ា។

លោកបាននិយាយក្នុងវីដេអូអំឡុងដំណើរទស្សនកិច្ចទៅកាន់មូលដ្ឋានអាកាស Tel Nof ថា «សត្រូវរបស់យើង មិនទាន់ដឹងអំពីរឿងនេះទេ មកទល់ពេលឥឡូវ ហើយឆាប់ៗ ពួកគេនឹងយល់ច្បាស់។ អ៊ីរ៉ង់​បាន​បាញ់មីស៊ីល​ប្រហែល ២០០ គ្រាប់​ទៅ​លើ​រដ្ឋ​អ៊ីស្រាអែល​កាលពី​ម្សិលមិញ។ អ៊ីរ៉ង់​បាន​វាយ​ប្រហារ​តំបន់​ជន​ស៊ីវិល និង​បង្ក​គ្រោះថ្នាក់​ដល់​អាយុ​ជីវិត​ជន​ស៊ីវិល​ជា​ច្រើននាក់។ យើង​នឹង​ឆ្លើយ​តប យើង​ដឹង​ពី​របៀប​កំណត់​ទីតាំង​គោលដៅ​សំខាន់ៗ និង​របៀប​វាយ​ប្រហារ​ច្បាស់ណាស់»។

ក្រោយការព្រមាននេះប៉ុន្មានម៉ោងផង អ៊ីស្រាអែល ក៏បើកការវាយប្រហារអាកាសលើទីក្រុង បេរូត សម្លាប់ពលរដ្ឋលីបង់ចំនួន៦នាក់។

ចំណែកទីក្រុង Dahieh ដែលជាបន្ទាយរឹងមាំរបស់ក្រុមហេសបូឡា នៅភាគខាងត្បូងទីក្រុង បេរូត ក៏ត្រូវវាយប្រហារផងដែរ ខណៈនៅភាគខាងត្បូងប្រទេសលីបង់ឯណោះ យោធាអ៊ីស្រាអែលបានព្រមាននៅព្រឹកថ្ងៃព្រហស្បតិ៍ថា ការវាយប្រហារតាមអាកាសនឹងបន្តទៀត។

សូមបញ្ជាក់ជាថ្មី អ៊ីរ៉ង់​​បាន​​បាញ់​​មីស៊ីល​ផ្លោង​​​រាប់រយ​គ្រាប់​ដាក់​អ៊ីស្រាអែល ចំពេល​ការ​ប្រយុទ្ធ​គ្នា​រវាង​​ក្រុម​សកម្ម​ប្រយុទ្ធ​​​ហេសបូឡា​ដែលខ្លួន​គាំទ្រ​នៅ​លីបង់និង​អ៊ីស្រាអែល ក៏កំពុងពុះកញ្ជ្រោលដែរ។

ក្នុង​ចំណោម​មីស៊ីល​ផ្លោង​ទាំងនោះ​ មីស៊ីលភាគ​ច្រើនត្រូវស្ទាក់ចាប់បាននៅកណ្តាលអាកាស ប៉ុន្តែខ្លះបានទម្លាយសំណាញ់​ការពារ៕

អត្ថបទ៖ សុខ សុវណ្ណ

ចុចអាន៖ ប្រមុខ UN ថ្កោលទោសអ៊ីរ៉ង់ ក្រោយអ៊ីស្រាអែល ដាក់សម្ពាធខ្លាំងពេក