ព័ត៌មានអន្ដរជាតិ

ចិន ថា មេដឹកនាំតៃវ៉ាន់ មានចេតនាអាក្រក់និយាយនាំភ្លើង

បានផុស

៦ ខែ មុន

នៅ

ថ្ងៃពុធ ៩ តុលា ២០២៤

ដោយ

Chheang

រដ្ឋាភិបាលក្រុងប៉េកាំង បានអះអាងថា លោក Lai Ching-te មានចេតនាអាក្រក់ បង្កើតជាការកើនឡើងនៃភាពតានតឹង។ ការប្រកាសបែបនេះរបស់ចិន ធ្វើឡើងនៅមុនពេលកោះតៃវ៉ាន់ត្រៀមរៀបចំថ្ងៃបុណ្យជាតិនាថ្ងៃទី១០ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចិនក៏បានបញ្ជាក់ទៀតដែរថា ការថ្លែងសន្ទរកថារបស់លោក Lai នៅថ្ងៃព្រហស្បតិ៍សប្ដាហ៍នេះ នឹងកំណត់នូវការឆ្លើយតបយោធាណាមួយពីក្រុងប៉េកាំង។

ចិន បានសម្ដែងការមិនពេញចិត្តជាខ្លាំងចំពោះលោក Lai ដែលចូលកាន់តំណែងកាលពីខែឧសភា បន្ទាប់ពីឈ្នះការបោះឆ្នោតកាលពីខែមករា។ ចិនបានហៅមេដឹកនាំតៃវ៉ាន់ថ្មីថាជា «អ្នកផ្ដាច់ខ្លួននិយម» ហើយអះអាងថា ដែនកោះមួយនេះគឺជាទឹកដីរបស់ខ្លួន។

លោក Lai បាននិយាយកាលពីចុងសប្តាហ៍មុនអំពីរបៀបដែលវា «មិនអាចទៅរួចទេ» សម្រាប់សាធារណរដ្ឋប្រជាមានិតចិនក្នុងការក្លាយម្ចាស់គ្រប់គ្រង់តៃវ៉ាន់ ដោយសារតែកោះតៃវ៉ាន់មានឫសគល់នយោបាយចំណាស់ជាង។ យ៉ាងណាមិញ ការិយាល័យកិច្ចការតៃវ៉ាន់របស់ប្រទេសចិន បានបញ្ជាក់ថា ការលើកឡើងរបស់លោក Lai គឺជាការយល់ខុសពីការពិត។

ចិន បានបន្ថែមថា៖ «ភាពមិនប្រាកដប្រជានៃឯករាជ្យភាពតៃវ៉ាន់របស់លោក Lai Ching-te គឺគ្រាន់តែជាស្រាចាស់ដាក់នៅក្នុងដបថ្មីប៉ុណ្ណោះ ហើយជាថ្មីម្តងទៀតបានបង្ហាញពីជំហររឹងរូសរបស់លោកចំពោះឯករាជ្យភាពតៃវ៉ាន់ និងចេតនាដ៏អាក្រក់របស់លោកក្នុងការបង្កើនអរិភាព និងការប្រឈមមុខដាក់គ្នា»។

មេដឹកនាំតៃវ៉ាន់ នឹងថ្លែងសុន្ទរកថានៅថ្ងៃបុណ្យជាតិដ៏សំខាន់របស់ខ្លួននៅថ្ងៃព្រហស្បតិ៍ ដែលបង្ហាញពីការដួលរលំនៃរាជវង្សចិនចុងក្រោយក្នុងឆ្នាំ១៩១១ និងការចាប់កំណើតនៃសាធារណរដ្ឋចិន។

ក្រោយចាញ់សង្គ្រាមស៊ីវិលជាមួយបក្សកុម្មុយនិស្តរបស់លោក ម៉ៅ សេទុង រដ្ឋាភិបាលសាធារណរដ្ឋចិនបានរត់ភៀសខ្លួនទៅគ្រប់គ្រងនៅកោះតៃវ៉ាន់មកទល់នឹងសព្វថ្ងៃនេះ។ សាធារណរដ្ឋចិននៅតែប្រើជាឈ្មោះផ្លូវការរបស់តៃវ៉ាន់៕

ដោយ៖ ឈាង