ព្យុះ Milton សម្លាប់មនុស្ស ២៣នាក់នៅអាមេរិក និងអាចខាតបង់សេដ្ឋកិច្ចដល់ ១៦០ពាន់លានដុល្លារ

តួលេខមនុស្សស្លាប់ដោយសារព្យុះសង្ឃរា Milton នៅសហរដ្ឋអាមេរិក បានកើនឡើងដល់២៣នាក់ហើយ គិតត្រឹមថ្ងៃអាទិត្យទី១៣ខែតុលាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីមន្ត្រីក្នុងតំបន់ មនុស្សស្លាប់ភាគច្រើនគឺដោយសារខ្យល់កូច ហើយត្បិតតែព្យុះនេះបានកន្លងផុតទៅហើយក៏ពិតមែន ប៉ុន្តែវាមិនទាន់អស់ចំហាយទេ ពោលគឺនៅតែជះឥទ្ធិពលខ្លាំងគួសម ដោយបង្កទុកលំបាកដល់ប្រជាជនដដែល។

ស្របពេលជាមួយគ្នានោះ ​​Fox Weather រាយការណ៍ថា ខ្យល់ព្យុះដ៏សាហាវនេះ ក៏នៅតែបណ្តាលឲ្យមនុស្សជិត៤លាននាក់គ្មានអគ្គិសនីប្រើប្រាស់ ក្នុងរដ្ឋឆ្នេរសមុទ្រនៃសហរដ្ឋអាមេរិកមួយនេះដែរ។

លើសពីនេះទៀត ការដាច់ចរន្តអគ្គិសនី ក៏ប៉ះពាល់ដល់ការចែកចាយប្រេងឥន្ធនៈនៅកំពង់ផែជុំវិញទីក្រុង Tampa Bay ផងដែរ ខណៈមានរបាយការណ៍ថា ស្ថានីយ៍ប្រេងឥន្ធនៈរហូតដល់ទៅ ៧៥% នៅតែបន្តបិទឬគ្មានប្រេងឥន្ធនៈគិតត្រឹមថ្ងៃសៅរ៍។

យោងតាមការប៉ាន់ស្មានពី AccuWeather, រដ្ឋ Florida បានទទួលការខូចខាតយ៉ាងដំណំ ដោយសារព្យុះកំណាច Milton ហើយក្រោយការគណនា គេវាយតម្លៃថា រដ្ឋនេះនឹងខាតបង់ប្រាក់អស់ចំនួន ១៦០ពាន់លានដុល្លារអាមេរិក។

សូមបញ្ជាក់ថា Milton គឺជាព្យុះសង្ឃរាអាត្លង់ទិកខ្លាំងបំផុតទីប្រាំ នៅក្នុងកំណត់ត្រា។ វាបានវាយប្រហាររដ្ឋ Florida កាលពីថ្ងៃព្រហស្បតិ៍ទី១០ខែតុលា ក្នុងនាមជាព្យុះកម្រិតទី៣ ជាមួយកម្លាំងខ្យល់២០៩គីឡូម៉ែត្រក្នុងមួយម៉ោង៕

អត្ថបទ៖ សុខ សុវណ្ណ

ចុចអាន៖ រកឃើញមនុស្សស្លាប់បន្ថែមទៀត នៅរដ្ឋ Florida ដោយសារព្យុះ Milton