កូរ៉េ​ខាង​ជើង ចែង​ក្នុង​រដ្ឋធម្មនុញ្ញ​ខ្លួន​ថា កូរ៉េ​ខាង​ត្បូង ជា «រដ្ឋ​សត្រូវ»

បើ​​តាម​​ទីភ្នាក់ងារ​ព័ត៌មាន​រដ្ឋ​ KCNA នៅ​ថ្ងៃ​ទី១៧​ខែតុលា កូរ៉េខាងជើងបាន​ចាត់​ទុក​ប្រទេសកូរ៉េខាងត្បូង​ថា​ជា «រដ្ឋសត្រូវ» របស់​ខ្លួន បន្ទាប់​ពី​សភាជាតិ​ក្រុង​ព្យុងយ៉ាង​បានធ្វើវិសោធនកម្មរដ្ឋធម្មនុញ្ញ​។

KCNA បាន​ផ្សាយ​ថា៖ «នេះគឺជាវិធានការជៀសមិនរួច និងស្របច្បាប់ដែលបានធ្វើឡើងស្របតាមតម្រូវការនៃរដ្ឋធម្មនុញ្ញកូរ៉េខាងជើង ដែលកំណត់យ៉ាងច្បាស់ថា កូរ៉េខាងត្បូងជារដ្ឋអរិភាព»។

KCNA បានរាយការណ៍​ទៀត​ថា ការតភ្ជាប់ផ្លូវថ្នល់ និងផ្លូវដែកជាមួយកូរ៉េខាងត្បូងឥឡូវនេះត្រូវបានបិទទាំងស្រុង បន្ទាប់ពី​ការ​​បំផ្ទុះកាលពីថ្ងៃអង្គារ ដោយ​ប​ន្ថែម​​ថា វា​ជា «ការបំបែកទឹកដីរបស់ខ្លួនជាដំណាក់កាល» ពីភាគខាងត្បូង ហើយ​ត្រូវ​បាន​ធ្វើ​ឡើង​ដោយ​សកម្មភាពស្របច្បាប់​ប្រឆាំងនឹងរដ្ឋអរិភាព ដូចដែលបានកំណត់ដោយរដ្ឋធម្មនុញ្ញ។

លោកស្រី Meredith Shaw ដែលជាអ្នកវិទ្យាសាស្ត្រនយោបាយដែលផ្តោតលើសក្ដានុពលក្នុងតំបន់អាស៊ីបូព៌ា បានកត់សម្គាល់ឃើញថា កូរ៉េខាងជើង​ធ្លាប់​បានបំផ្ទុះរចនាសម្ព័ន្ធផ្សេងៗ​​ទៀតកាលពីមុន​​។ លោកស្រីបានផ្តល់ឧទាហរណ៍នៃការិយាល័យទំនាក់ទំនងដែលត្រូវបានបង្កើតឡើងនៅក្នុងឆ្នាំ២០១៨ ដែលទីក្រុងព្យុងយ៉ាងបាន​បំផ្ទុះ​​នៅ​ឆ្នាំ​២០២០ ខណៈ​​ដែលទំនាក់ទំនងរវាង​កូរ៉េ​ទាំង​ពីរ​កាន់តែ​ល្អក់កករ​។ លោកស្រី​ បន្ត​ថា នៅ​ឆ្នាំ​ដើម​ឆ្នាំ​២០២៤​នេះ ក្រុង​ព្យុងយ៉ាង​ក៏​បាន​បំផ្ទុះ​និមិត្តរូបនៃការបង្រួបបង្រួម​កូរ៉េ «Arch of Reunification» ផង​ដែរ។

កូរ៉េខាងត្បូង បាននិយាយថា គោលនយោបាយរបស់ខ្លួនគឺ​នៅ​តែ​បន្តការបង្រួបបង្រួមជាតិ ប៉ុន្តែ​​ខ្លួន​ក៏​នឹង​​​ប្រើ​ប្រាស់​​កង​កម្លាំង​ផង​ដែរ​​​ បើកូរ៉េខាងជើងបង្កើនការឈ្លានពានណាមួយនោះ៕

ដោយ៖ ឈាង