កូរ៉េ​ខាង​ជើង​​ថា ខ្លួន​​រក​ឃើញ​ដ្រូន​យោធា​កូរ៉េ​ខាង​ត្បូង​ដែល​​ធ្លាក់ក្នុងដីខ្លួន​​

កូរ៉េខាងជើងថា ខ្លួនបានរកឃើញគ្រោងយន្តហោះគ្មានមនុស្សបើករបស់យោធាកូរ៉េខាងត្បូងដែលបានធ្លាក់មកវិញ ខណៈវាជាបញ្ហាដែលប្រទេសទាំងពីរកំពុងប្រឈមមុខដាក់គ្នាចុងក្រោយពាក់ព័ន្ធនឹងដ្រូនហោះហើរឆ្លងកាត់ព្រំដែន។ នេះបើយោងតាមការចេញផ្សាយរបស់សារព័ត៌មាន​ CNA នៅថ្ងៃទី២០ខែតុលានេះ។

កូរ៉េខាងជើងបានឲ្យដឹងថាដោយមើលទៅលើរូបរាងរបស់យន្តហោះគ្មានមនុស្សបើក រយៈកាលនៃការហោះហើរ ប្រអប់ដាក់ខិត្តប័ណ្ណដែលបានជួសជុលនៅផ្នែកខាងក្រោមនៃដ្រូនជាដើម វាទំនងជាថាដ្រូនដែលពង្រាយខិត្តប័ណ្ណនៅកណ្តាលក្រុងព្យុងយ៉ាង ប៉ុន្តែ​ការ​សន្និដ្ឋាន​មិន​ទាន់​ត្រូវ​បាន​បញ្ជាក់ថាវាជាការពិតនៅឡើយនោះទេ។

រដ្ឋាភិបាលកូរ៉េខាងត្បូងបានបដិសេធនិយាយថាតើដ្រូនបែបនេះត្រូវបានខ្លួនជាអ្នកបង្ហោះឬជនស៊ីវិលជាអ្នកបង្ហោះនោះទេ។ ដើម្បីធ្វើអត្ថាធិប្បាយលើការអះអាងរបស់កូរ៉េខាងជើង កូរ៉េខាងត្បូងកំពុងធ្វើការស្វែងរកការពិត ពីក្រោយការរកឃើញនេះ។

ជាមួយគ្នានេះក្រសួងការពារជាតិកូរ៉េខាងត្បូង បាននិយាយនៅក្នុងសេចក្តីថ្លែងការណ៍មួយថា៖​«ការ​អះអាងតែម្ខាងរបស់កូរ៉េខាងជើងមិនសមនឹងការផ្ទៀងផ្ទាត់ទេ ហើយក៏មិនសមនឹងការឆ្លើយតបដែរ»។

ទោះយ៉ាងណាសមាជិកសភាកូរ៉េខាងត្បូងលោក Yu Yong-weon បានប្រាប់រ៉យទ័រថា យន្តហោះគ្មានមនុស្សបើកនៅក្នុងរូបថតរបស់កូរ៉េខាងជើងគឺ «ស្រដៀងគ្នា»ទៅនឹងយន្តហោះគ្មានមនុស្សបើកដែលផលិតដោយក្រុមហ៊ុនកូរ៉េខាងត្បូង Sungwoo Engineering និងផ្គត់ផ្គង់ដល់យោធាកូរ៉េខាងត្បូងក្នុងឆ្នាំ ២០២៣។

បើយោងតាមក្រុមហ៊ុន Sungwoo និយាយនៅលើគេហទំព័ររបស់ខ្លួនថា ខ្លួនបានផ្គត់ផ្គង់យន្តហោះគ្មានមនុស្សបើក S-Bat ចំនួន១០០ គ្រឿង ដែលមានរយៈពេលហោះហើរអតិបរមា ៤ ម៉ោង និងល្បឿនអតិបរមា ១៤០ គីឡូម៉ែត្រក្នុងមួយម៉ោង ដល់យោធាកូរ៉េខាងត្បូង។

ខណៈបើតាមសារព័ត៌មាន CNA របស់កូរ៉េខាងជើងបានឲ្យដឹងថា ប្រសិនបើការរំលោភលើទឹកដី ដែនអាកាស និងដែនទឹករបស់កូរ៉េខាងជើង ដោយមធ្យោបាយយោធារបស់កូរ៉េខាងត្បូង ត្រូវបានរកឃើញ និងបញ្ជាក់ម្តងទៀត វានឹងចាត់ទុកថាជាការញុះញង់ដោយយោធាយ៉ាងធ្ងន់ធ្ងរប្រឆាំងនឹងអធិបតេយ្យភាពរបស់កូរ៉េខាងជើង ហើយកូរ៉េខាងជើងនឹងប្រកាសសង្រ្គាមវាយប្រហារសងសឹកភ្លាមៗ។

គួរបញ្ជាក់ថាភាពតានតឹងរវាងប្រទេសកូរ៉េទាំងពីរបានកើនឡើងចាប់តាំងពីកូរ៉េខាងជើងបានចាប់ផ្តើមបង្ហោះប៉េងប៉ោងដឹកសំរាមឆ្លងព្រំដែនទៅកាន់ភាគខាងត្បូងកាលពីចុងខែឧសភា ដោយទីក្រុងសេអ៊ូលបានឆ្លើយតបការការផ្សាយតាមរយៈឧបករណ៍បំពងសម្លេងដែលធ្វើឲ្យទីក្រុងព្យុងយ៉ាងខឹងសម្បារយ៉ាងខ្លាំង។

បញ្ហាទាំងអស់នេះបានធ្វើឲ្យកូរ៉េខាងជើងបានបង្កើនវោហាសាស្ត្រអរិភាពរបស់ខ្លួនក្នុងរយៈពេលប៉ុន្មានថ្ងៃថ្មីៗនេះ ដោយចោទប្រកាន់យោធាកូរ៉េខាងត្បូងថាបានបង្ហោះយន្តហោះគ្មានមនុស្សបើកឆ្លងកាត់រដ្ឋធានីរបស់ខ្លួនក្នុងរយៈពេលបីថ្ងៃក្នុងខែនេះ និងគំរាមកំហែងតបតវិញយ៉ាងធ្ងន់ធ្ងរ ប្រសិនបើខ្លួនរកឃើញដ្រូនមួយទៀតនៅលើដែនអាកាសរបស់ខ្លួន៕

អត្ថបទ៖ ប៊ុន​ សុភាព