កំពូលព្យុះទីហ្វុង កងរី ទៅដល់តៃវ៉ាន់ភ្លាម បណ្តាលឲ្យមានមនុស្សស្លាប់ភ្លែត

នៅរសៀលថ្ងៃព្រហស្បតិ៍ទី៣១ខែតុលាឆ្នាំ២០២៤ កំពូលព្យុះទីហ្វុង កងរី (Kong-rey) បានចូលដល់តៃវ៉ាន់ ដោយវាយប្រហារកោះនេះយ៉ាងពេញទំហឹង ហើយថែមទាំងបណ្តាលឲ្យមនុស្សម្នាក់ស្លាប់និង៧៣នាក់រងរបួសទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាព្យុះខ្លាំងកម្រិតទី៤, កងរី បានវាយប្រហារភាគខាងកើតកោះតៃវ៉ាន់ ជាមួយកម្លាំងខ្យល់១៨៤គីឡូម៉ែត្រក្នុងមួយម៉ោង ហើយមនុស្សម្នាក់ដែលស្លាប់នោះ គឺដោយសារដើមឈើបាក់សង្កត់លើរថយន្តរបស់គាត់នៅក្នុងតំបន់ Nantou។

ទីក្រុងតៃប៉ិ ក៏ប្រកាសអាសន្នរួចហើយដែរ និងថែមទាំងដាក់ពង្រាយកងកម្លាំងជិត ៣៥ ០០០នាក់ ឲ្យឈរជើងត្រៀមជួយសង្គ្រោះពលរដ្ឋក្នុងករណីចាំបាច់ទៀតផង។

កន្លែងធ្វើការនិងសាលារៀនជាច្រើននៅទូទាំងកោះតៃវ៉ាន់ ត្រូវបិទនៅថ្ងៃព្រហស្បតិ៍ ខណៈជើងហោះហើរក្នុងស្រុកនិងអន្តរជាតិជាង៤០០ជើង ត្រូវលុបចោល រីឯសេវាដឹកជញ្ជូនតាមជើ​ងទឹក ក៏ផ្អាកសិនដែរ។ លើសពីនេះ ផ្ទះជិត ១០ម៉ឺនខ្នង គឺមិនមានអគ្គិសនីប្រើប្រាស់ឡើយ។

សូមបញ្ជាក់ថា កងរី គឺជាព្យុះមានឥទ្ធិពលបំផុតដែលវាយប្រហារតៃវ៉ាន់ ក្នុងរយៈពេល៣០ឆ្នាំ ហើយក្រោយចាកចេញពីកោះនេះ កងរី នឹងបន្តបោកបក់លើ​​​​​ឆ្នេរ​សមុទ្រ​​នៃ​ខេត្ត Fujian ប្រទេស​ចិន នៅ​ព្រឹក​ថ្ងៃ​សុក្រ៕

អត្ថបទ៖ សុខ សុវណ្ណ

ចុចអាន៖ តៃវ៉ាន់ បិទ​រាល់​សកម្មភាព​ទាំង​អស់ ត្រៀមខ្លួន​ទប់ទល់ព្យុះ កងរី ដែល​មិនធ្លាប់​មាន​ក្នុង​ពេល​៣០ឆ្នាំ