ព័ត៌មានអន្ដរជាតិ

លោក ស៊ី ព្រមានអាមេរិកកុំជ្រៀតចូលកិច្ចការនៅអាស៊ីប៉ាស៊ីហ្វីក

បានផុស

២ years មុន

នៅ

ថ្ងៃអាទិត្យ ១៧ វិច្ឆិកា ២០២៤

ដោយ

ប្រធានាធិបតីចិន បានព្រមានមេដឹកនាំអាមេរិកជាថ្មីទៀត កុំឲ្យលូកដៃជ្រៀតជ្រែកក្នុងកិច្ចអាស៊ីប៉ាស៊ីហ្វិកជាពិសេសក្នុងដែនដីជម្លោះតៃវ៉ាន់ និងបញ្ហាជម្លោះដែនកោះនៅក្នុងសមុទ្រចិនខាងត្បូង។

មេដឹកនាំចិនលោក ស៊ី ជីនភីង (Xi Jinping) បានព្រមានប្រធានាធិបតីជិតផុតអាណត្តិរបស់សហរដ្ឋអាមេរិក លោក ចូ បៃដិន (Joe Biden) នៅក្នុងកិច្ចប្រជុំមួយនៅខាងក្រៅកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) លើកទី៣១ នៅលីម៉ា ប្រទេសប៉េរូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Xinhua បានដកស្រង់សម្តីលោក ស៊ី ដូចបាននិយាយថា៖«ប្រទេសចិនរក្សាជំហររឹងមាំចំពោះអធិបតេយ្យភាពទឹកដី សិទ្ធិដែនសមុទ្រ និងផលប្រយោជន៍របស់ខ្លួននៅក្នុងសមុទ្រចិនខាងត្បូង»។

មេដឹកនាំចិនដ៏មានឥទ្ធិពលបំផុត បានបន្ថែមទៀតថា៖‍«ការសន្ទនា និងការពិគ្រោះយោបល់រវាងរដ្ឋដែលពាក់ព័ន្ធតែងតែជាមធ្យោបាយល្អបំផុតដើម្បីគ្រប់គ្រងភាពខុសគ្នានៅសមុទ្រចិនខាងត្បូង ហើយសហរដ្ឋអាមេរិកមិនគួរពាក់ព័ន្ធក្នុងជម្លោះទ្វេភាគីលើកោះ Nansha ហើយក៏មិនគួរផ្តល់ជំនួយឬបញ្ឈប់ការបំផុសគំនិតដើម្បីបង្ករឿងដែរ»។

បណ្តុំកោះ Nansha គឺស្ថិតនៅក្នុងសមុទ្រចិនខាងត្បូង ដែលចិនតែងតែមានអរិភាពជាមួយបណ្តាប្រទេសមួយចំនួនក្នុងអាស៊ីអាគ្នេយ៍។

លោក ស៊ី ជីនភីង បានសង្កត់ធ្ងន់ថា សកម្មភាពផ្តាច់ខ្លួននៅតៃវ៉ាន់ គឺមិនស៊ីគ្នានឹងសន្តិភាព និងស្ថិរភាពនៅច្រកសមុទ្រតៃវ៉ាន់។

ទីភ្នាក់ងារសារព័ត៌មាន Xinhua បានដកស្រង់សម្តីមេដឹកនាំចិនថា៖«ប្រសិនបើសហរដ្ឋអាមេរិកស្វែងរកការរក្សាសន្តិភាពនៅច្រកសមុទ្រតៃវ៉ាន់ វាគួរតែនាំយកបញ្ហាតៃវ៉ាន់ដោយប្រយ័ត្នប្រយែង និងប្រុងប្រយ័ត្ន ប្រឆាំងដាច់ខាតចំពោះឯករាជ្យភាពរបស់តៃវ៉ាន់ និងគាំទ្រការបង្រួបបង្រួមដោយសន្តិភាពនៃប្រទេសចិន»។

សហរដ្ឋអាមេរិកដែលជាមហាអំណាចលេខ១ តែងតែគាំទ្រតៃវ៉ាន់ចំពោះការដឹកនាំដែលមានលក្ខណៈឯករាជ្យដោយខ្លួនឯង ហើយ លក់អាវុធយ៉ាងច្រើនដល់តៃវ៉ាន់សម្រាប់ការពារខ្លួនពីការប្រើប្រាស់យោធារបស់ចិន។

សហរដ្ឋអាមេរិក ជាមួយសម្ព័ន្ធមួយចំនួនទៀតដូចជាជប៉ុន កូរ៉េខាងត្បូង និង ហ្វីលីពីន ជាដើម មើលឃើញបញ្ហានៅតៃវ៉ាន់ជាព្យាយាមពង្រីកឥទ្ធិពលរបស់ប្រទេសចិននៅក្នុងតំបន់។

មេដឹកនាំចិនបានបន្ថែមថា ក្រុងប៉េកាំងនឹងមិនអនុញ្ញាតឱ្យមានភាពចលាចលនៅលើឧបទ្វីបកូរ៉េនោះទេ ខណៈពេលដែលកូរ៉េខាងជើង និងកូរ៉េខាងត្បូងកំពុងតែគាំទ្រសម្ព័ន្ធមិត្តរៀងៗខ្លួនក្នុងជម្លោះរុស្ស៊ីនិងអ៊ុយក្រែន។

លោក ស៊ី បាននិយាយថា៖«ប្រទេសចិននឹងមិនអនុញ្ញាតឱ្យមានជម្លោះ និងភាពចលាចលកើតឡើងនៅលើឧបទ្វីបកូរ៉េឡើយ ហើយខ្លួននឹងមិនអង្គុយស្ងៀមនៅពេលដែលសន្តិសុខជាយុទ្ធសាស្ត្រ និងផលប្រយោជន៍ស្នូលរបស់ខ្លួនស្ថិតនៅក្រោមការគំរាមកំហែង»៕