ទោះមានបទឈប់បាញ់ តែអ៊ីស្រាអែល ប្រកាសរក្សាសិទ្ធិវាយប្រហារក្រុមហេសបូឡា 

បទឈប់បាញ់រវាងអ៊ីស្រាអែលនិងក្រុមហេសបូឡា ដែលសម្របសម្រួលដោយសហរដ្ឋអាមេរិកនិងបារាំង បានចូលជាធរមានហើយនៅម៉ោង៤ព្រឹក ថ្ងៃពុធទី២៧ខែវិច្ឆិកាឆ្នាំ២០២៤ ប៉ុន្តែទោះមានកិច្ចព្រមព្រៀងក៏ដោយ ក៏កងកម្លាំងរបស់លោក Benjamin Netanyahu ប្រកាសថា ​ខ្លួនសូមរក្សាសិទ្ធិវាយប្រហារចលនាសកម្មប្រយុទ្ធលីបង់ដដែល ហើយព្រមានដល់ជនស៊ីវិលដែលភៀសខ្លួនចេញពីភាគខាងត្បូងប្រទេសលីបង់ថា កុំទាន់វិលត្រឡប់ទៅផ្ទះវិញឲ្យសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ក្នុងបទឈប់បាញ់នេះ កងទ័ពអ៊ីស្រាអែល នឹងត្រូវដកចេញពីភាគខាងត្បូងប្រទេ​សលីបង់ ហើយក្រុមហេសបូឡា ក៏នឹងដកថយចេញពីភាគខាងជើងនៃទន្លេ Litani ដូចគ្នា។

កិច្ចព្រមព្រៀង​នេះ​គូសបញ្ជាក់​ថា ក្រុមហេសបូឡានិង​អ៊ីស្រាអែល​ ​មាន​ពេល៦០ថ្ងៃ​ដើម្បី​ដក​កងកម្លាំងនិង​សព្វាវុធ​ចេញពី​តំបន់និង​ខ្សែបន្ទាត់​ខៀវ «Blue Line» ដែលគេស្គាល់ថា ជា​ព្រំដែន​ក្រៅ​ផ្លូវការ​រវាង​ប្រទេស​លីបង់និង​អ៊ីស្រាអែល។ លើសពីនេះ លីបង់ នឹងដាក់ពង្រាយកងទ័ព ៥ ០០០នាក់ទៅភាគខាងត្បូងប្រទេស។

គ្រាន់តែបទឈប់បាញ់នេះចូលជាធរមានភ្លាម គេឃើញមានរថយន្តជាច្រើនគ្រឿង ដឹកជនភៀសខ្លួនរាប់ពាន់នាក់ ឆ្ពោះទៅកាន់ភាគខាងត្បូងប្រទេសលីបង់វិញ។ អ្នកទាំងនោះបានរត់គេចពីការវាយប្រហាររបស់អ៊ីស្រាអែល កាលពីប៉ុន្មានខែមុន ប៉ុន្តែទោះយ៉ាងណា កងកម្លាំងការពារអ៊ីស្រាអែល «IDF» ព្រមានពួកគេកុំឲ្យវិលត្រឡប់ទៅផ្ទះវិញឲ្យសោះ។

អ្នកនាំពាក្យ IDF លោក Avichay Adraee បានបង្ហោះសារលើបណ្តាញសង្គម X ដោយព្រមានពលរដ្ឋលីបង់ថា វាលឿនពេកហើយដែលជនភៀសខ្លួន ត្រូវវិលត្រឡប់ទៅផ្ទះរបស់ពួកគេវិញ ព្រោះពេលនេះ ភាគខាងត្បូងប្រទេសលីបង់ មិនទាន់មានសុវត្ថិភាពពេញលេញនៅឡើយទេ។ 

ស្របពេលជាមួយគ្នានោះដែរ នាយក​រដ្ឋមន្ត្រីអ៊ីស្រាអែលលោក Netanyahu ក៏ប្រកាសដែរ​ថា អ៊ីស្រាអែល ប្រាប់អាមេរិករួចហើយថា ខ្លួននៅតែមានសិទ្ធិ​ធ្វើសកម្មភាព​យោធានៅ​ក្នុង​ប្រទេស​លីបង់ បើក្រុមហេសបូឡា នៅតែព្យាយាមបំពាក់អាវុធ កសាងហេដ្ឋារចនាសម្ព័ន្ធឡើងវិញ ឬប្រើប្រាស់គ្រាប់រ៉ុកកែតជាលេសដើម្បីវាយប្រហារ។

សូមបញ្ជាក់ថា កិច្ចព្រមព្រៀងនេះ គឺជាក្តីសង្ឃឹមឈានឆ្ពោះទៅរកការបញ្ចប់អំពើហិង្សារយៈពេលជាងមួយឆ្នាំ ដែលផ្តើមឡើងនៅពេលក្រុមហេសបូឡា បើកការវាយប្រហារលើអ៊ីស្រាអែលកាលពីថ្ងៃទី៨ខែតុលាឆ្នាំ២០២៣ ដើម្បីបង្ហាញពីសាមគ្គីភាពជាមួយក្រុមហាម៉ាស នៅតំបន់ហ្គាហ្សា។

គិតចាប់តាំងពីខែតុលាឆ្នាំ២០២៣មក អ៊ីស្រាអែលបានសម្លាប់ប្រជាជនលីបង់ចំនួន ៣ ៧៦៨នាក់ និងបង្ខំឲ្យ១.២លាននាក់ទៀតត្រូវជម្លៀសខ្លួន៕

អត្ថបទ៖ សុខ សុវណ្ណ

ចុចអាន៖ ទីបំផុត អ៊ីស្រាអែល យល់ព្រមលើបទឈប់បាញ់ជាមួយ ក្រុមហេសបូឡា