ក្រុមហាម៉ាស៖ ឈ្លើយសឹក៣៣នាក់ត្រូវបានសម្លាប់នៅហ្គាហ្សា

ក្រុមហាម៉ាស់​ដែលចាប់​ឈ្លើយសឹក​២៤០​នាក់កាល​ថ្ងៃទី​៧ខែតុលា​ឆ្នាំ​២០២៣ ដែលនាំ​ទៅ​សង្គ្រាម​មកដល់​សព្វថ្ងៃនេះ បាន​ឲ្យដឹងថា ឈ្លើយសឹកចំនួន ៣៣នាក់ដែលត្រូវបានចាប់ខ្លួនដោយក្រុមខ្លួននៅតំបន់ហ្គាហ្សាត្រូវបានសម្លាប់ចាប់តាំង​ពី​ចាប់ផ្តើម​សង្រ្គាមជិត១៤ខែរបស់អ៊ីស្រាអែល។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី០៣ខែធ្នូនេះ។

ក្រុមនេះហាម៉ាស់បានចេញសេចក្តីថ្លែងការណ៍តាម​វីដេអូមួយកាលពីថ្ងៃចន្ទ ដោយនិយាយថា អ្នកចាប់ត្រូវបានសម្លាប់ «ដោយសារ​តែការរឹងចចេសរបស់ឧក្រិដ្ឋជនសង្គ្រាមរបស់នាយករដ្ឋមន្ត្រីអ៊ីស្រាអែល លោក Benjamin Netanyahu និង ការឈ្លានពានដែលកំពុងបន្តរបស់គាត់»។

យោងតាមវីដេអូរបស់ក្រុម ហាម៉ាស​ និងកាលបរិច្ឆេទនៃឧប្បត្តិហេតុក្រុមនេះបាននិយាយថាឈ្លើយសឹកត្រូវបានសម្លាប់។ ដែលភាគច្រើនដោយសារការវាយប្រហារតាមអាកាស។

លើសពីនេះ​ការ​ប៉ុនប៉ង​ជួយ​សង្គ្រោះ​ដោយ​យោធា​អ៊ីស្រាអែល​ក៏បណ្ដាលឲ្យមានឈ្លើយសឹកស្លាប់ផងដែរ។ យោងតាមក្រុមហាម៉ាស់ ឧបទ្ទវហេតុដំបូងគឺការវាយប្រហារតាមអាកាសរបស់អ៊ីស្រាអែល ដែលបានសម្លាប់ឈ្លើយសឹកបួននាក់កាលពីថ្ងៃទី ៩ ខែតុលា ឆ្នាំ ២០២៣។ ចុងក្រោយបំផុតគឺការសម្លាប់ឈ្លើយសឹកម្នាក់ក្នុងអំឡុងពេលប្រតិបត្តិការយោធាអ៊ីស្រាអែលនៅភាគខាងជើងហ្គាហ្សាកាលពីខែមុន។​

ស្របពេលជាមួយគ្នានេះរដ្ឋមន្ត្រីការបរទេសអេហ្ស៊ីបបាននិយាយកាលពីថ្ងៃចន្ទថា ក្នុងពេលជាមួយគ្នា គណៈប្រតិភូមកពីបក្សពួកប៉ាឡេស្ទីន និង ក្រុមហាម៉ាស បានជួបប្រជុំគ្នានៅទីក្រុងគែរ ដើម្បី «ឈានដល់ការយោគយល់គ្នាទៅវិញទៅមក «ស្តីពីការគ្រប់គ្រងរបស់អាជ្ញាធរប៉ាឡេស្ទីន នៅតំបន់ហ្គាហ្សា បន្ទាប់ពីបញ្ចប់សង្គ្រាមអ៊ីស្រាអែល។

លោក Netanyahu ពីមុនបានសម្តែងការប្រឆាំងចំពោះការអនុញ្ញាតឱ្យអាជ្ញាធរប៉ាឡេស្ទីន (PA) កាន់កាប់តំបន់ហ្គាហ្សា។ ទោះយ៉ាងណាក៏ដោយ សហរដ្ឋអាមេរិកនិយាយថា ខ្លួនចង់ឱ្យ PA «កែទម្រង់» ដើម្បីគ្រប់គ្រងតំបន់ប៉ាឡេស្ទីន។

តំបន់ហ្គាហ្សាខាងជើងត្រូវបានវាយលុកយ៉ាងធ្ងន់ធ្ងរ បន្ទាប់ពីអ៊ីស្រាអែលបានចាប់ផ្តើមឡោមព័ទ្ធវាកាលពី៦០ថ្ងៃមុន។ ការិយាល័យ​ប្រព័ន្ធផ្សព្វផ្សាយរដ្ឋាភិបាលរបស់ហ្គាហ្សាបាននិយាយថា យ៉ាងហោចណាស់មនុស្ស ៣៧០០នាក់ត្រូវបានសម្លាប់ ឬបាត់ខ្លួនចាប់តាំងពីពេលនោះមក។

ការវាយលុករបស់អ៊ីស្រាអែលនៅតំបន់ហ្គាហ្សា ដែលអ្នកជំនាញរបស់អង្គការសហប្រជាជាតិបានពិពណ៌នាថាជាអំពើប្រល័យពូជសាសន៍ បានសម្លាប់ជនជាតិប៉ាឡេស្ទីនយ៉ាងតិច ៤៤៤៦៦ នាក់ និងរបួស ១០៥៣៥៨ នាក់ ចាប់តាំងពីថ្ងៃទី ៧ ខែតុលា ឆ្នាំ២០២៣។

ចំណែកយ៉ាងហោចណាស់មនុស្ស ១១៣៩ នាក់ត្រូវបានសម្លាប់នៅក្នុងប្រទេសអ៊ីស្រាអែលក្នុងអំឡុងពេលការវាយប្រហារដែលដឹកនាំដោយក្រុមហាម៉ាសនៅថ្ងៃនោះ ហើយជាង ២០០ នាក់ត្រូវបានចាប់ខ្លួន៕

អត្ថបទ៖ ប៊ុន សុភាព