ប្រភព៖ លោក ត្រាំ អញ្ជើញលោកស៊ី ឲ្យចូលរួមពិធីស្បថចូលកាន់តំណែង នៅវ៉ាស៊ីនតោន

សារព័ត៌មានអាមេរិក បានចុះផ្សាយព្រោងព្រាតថា ប្រធានាធិបតីជាប់ឆ្នោតអាមេរិកលោក ដូណាល់ ត្រាំ បានអញ្ជើញមេដឹកនាំចិន លោក ស៊ី ជីនពីង ឲ្យមកចូលរួមក្នុងពិធីស្បថចូលកាន់តំណែងរបស់លោកនៅរដ្ឋធានីវ៉ាស៊ីនតោន ប៉ុន្តែគេមិនទាន់ដឹងច្បាស់ឡើយថាតើ ប្រមុខរដ្ឋាភិបាលទីក្រុងប៉េកាំង ព្រមទទួលការអញ្ជើញនេះដែរឬក៏អត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដកស្រង់ប្រភពពីមន្ត្រីអាមេរិកប៉ុន្តែសុំមិនបញ្ចេញឈ្មោះ សារព័ត៌មាន Newsweek បានចុះផ្សាយនៅថ្ងៃព្រហស្បតិ៍ទី១២ខែធ្នូឆ្នាំ២០២៤ថា លោក ត្រាំ បានអញ្ជើញលោក ស៊ី មកចូលរួមពិធីនៅថ្ងៃទី២០ខែមករាឆ្នាំ២០២៥ ហើយក្រុមការងាររបស់លោក ត្រាំ ក៏គ្រោងអញ្ជើញមេដឹកនាំពិភពលោកផ្សេងទៀតដូចជានាយករដ្ឋមន្ត្រីហុងគ្រី វីកទ័រ អ័របេន ឲ្យចូលរួមផងដែរ។

ទោះបីជាយ៉ាងណាក៏ដោយ ព័ត៌មាននេះមិនទាន់មានការបញ្ជាក់ជាផ្លូវការទេ ប៉ុន្តែលោកស្រី Karoline Leavitt ដែលជាអ្នកនាំពាក្យក្រុមផ្ទេរអំណាចរបស់លោក ត្រាំ បានសង្កត់ធ្ងន់ថា ជាការពិត បណ្តាមេដឹកនាំពិភពលោក មានបំណងជួបលោកប្រធានាធិបតី ត្រាំ ព្រោះគេដឹងថា គាត់នឹងត្រលប់មកវិញក្នុងពេលឆាប់ៗ ហើយនឹងស្តារសន្តិភាពឡើងវិញតាមរយៈកម្លាំងរបស់អាមេរិកនៅជុំវិញពិភពលោក។

ជុំវិញរឿងនេះដែរ ភាគីចិន ក៏មិនទាន់ចេញមុខបញ្ជាក់ច្បាស់ដូចគ្នា។

ក្នុងរដ្ឋបាលថ្មីរបស់លោកត្រាំ, បុគ្គលជាច្រើនរូបដែលមានចិត្តគំនិតប្រឆាំងចិន ត្រូវបានតែងតាំងឲ្យចូលកាន់តំណែងធំៗ ហើយជាពិសេសថ្មីៗនេះ លោក ត្រាំ ថែមទាំងប្រកាសយកពន្ធខ្ពស់លើទំនិញនាំចូលរបស់ចិនទៀតផង ធ្វើឲ្យទំនាក់ទំនងរវាងមហាអំណាចសេដ្ឋកិច្ចទាំងពីរ កាន់តែដាំក្បាលចុះក្រោម។

ម្យ៉ាងវិញទៀត ក្នុងកិច្ចសម្ភាសជាមួយទូរទស្សន៍ NBC កាលពីថ្ងៃអាទិត្យ លោក ត្រាំ ថែមទាំងព្រលយពាក្យចង់ជួបប្រជុំជាមួយលោក ស៊ី ទៀតផង ដើម្បីពិភាក្សាគ្នារកដំណោះស្រាយលើបញ្ហាធំៗមួយចំនួន ក្នុងនោះក៏មានទាំងបញ្ហាគ្រឿងញៀនផងដែរ៕

អត្ថបទ៖ សុខ សុវណ្ណ

ចុចអាន៖ ត្រាំ ប្រកាសមិនយកប្រាក់ខែប្រធានាធិបតី នៅអាណត្តិថ្មីនេះ