នាវាកងទ័ពជើងទឹកឥណ្ឌាបុកសាឡាងដឹកអ្នកដំណើរស្លាប់មនុស្ស១៣នាក់

យ៉ាងហោចណាស់មនុស្ស​១៣នាក់បានស្លាប់ដោយសារនាវាកងទ័ពជើងទឹកឥណ្ឌាបានបុកសាឡាងដឹកអ្នកដំណើរបណ្ដាលឲ្យលិចនៅឆ្នេរសមុទ្រក្នុងរដ្ឋធានី Mumbai​។ នេះបើយោងតាមការចេញផ្សាយរបស់សារព័ត៌មាន​AP។

បើតាមមន្ត្រីក្នុងតំបន់បានឲ្យដឹងថា មនុស្សជាង១០០​នាក់ ត្រូវបានជួយសង្គ្រោះ ខណៈកិច្ចខិតខំប្រឹងប្រែងស្វែងរក និងជួយសង្គ្រោះកំពុងបន្ត។

នៅពេលកើតហេតុនាវាកងទ័ពជើងទឹកឥណ្ឌាមួយគ្រឿងបានបាត់បង់ការគ្រប់គ្រង ខណៈពេលដែលកំពុងធ្វើការសាក​ល្បង​ម៉ាស៊ីននៅកំពង់ផែ Mumbai ដោយសារបញ្ហាម៉ាស៊ីន បានបណ្ដាលឲ្យទៅបុកជាមួយសាឡាងដឹកអ្នកដំណើរ បន្ទាប់មកបានក្រឡាប់លិចចូលទឹក។ សាឡាងដឹកអ្នកដំណើរឯកជននេះមានឈ្មោះថា Neelkamal កំពុងធ្វើដំណើរឆ្ពោះទៅកាន់រូងភ្នំ Elephanta ដែលជាគោលដៅទេសចរណ៍ដ៏ពេញនិយមមួយនៅឆ្នេរសមុទ្រ Mumbaiមុនពេលកើតហេតុ។

បើតាមកងទ័ពជើងទឹកបាននិយាយថា អ្នកស្លាប់ទាំង១៣​នាក់ រួមមានទាហានជើងទឹកម្នាក់ និងតំណាងពីរនាក់នៃក្រុមហ៊ុនផលិតឧបករណ៍ ដែលចូលរួមក្នុងការសាកល្បង។

ពាក់ព័ន្ធបញ្ហានេះលោក Modi ក៏បានប្រកាសផ្តល់ប្រាក់ឧបត្ថម្ភចំនួន ២០ម៉ឺន​រូពី (ស្មើនឹង ២៣៥៦.៦៣​ដុល្លារ) ពីមូល​និធិ​សង្គ្រោះជាតិរបស់នាយករដ្ឋមន្ត្រីសម្រាប់សាច់ញាតិបន្ទាប់របស់អ្នកស្លាប់ក្នុងឧបទ្ទវហេតុលិចទូកនេះ ហើយអ្នករបួសនឹងទទួលបាន ៥០០០០រូពី៕

អត្ថបទ៖ ប៊ុន សុភាព