រុស្ស៊ី អះអាងបាញ់ទម្លាក់ MiG-29 និងសម្លាប់ទ័ពអ៊ុយក្រែន ជាង៤០០នាក់ នៅតំបន់ Kursk

តាមការចុះផ្សាយរបស់ Newsweek កាលពីថ្ងៃអាទិត្យទី៥ខែមករាឆ្នាំ២០២៥, ក្រសួងការពារជាតិរុស្ស៊ី បានប្រកាសពីការបាញ់ទម្លាក់យន្តហោះចម្បាំង MiG-29 មួយគ្រឿងរបស់អ៊ុយក្រែន និងសម្លាប់ទាហាន ៤១០នាក់ ស្របពេលទីក្រុងកៀវ បើកការវាយលុកថ្មីនៅតំបន់ Kursk។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះចម្បាំង MiG-29 ជាច្រើនគ្រឿងត្រូវបានខ្នងបង្អែក EU ប្រគល់ឲ្យអ៊ុយក្រែន ដើម្បីយកមកតទល់ជាមួយរុស្ស៊ីក្នុងសង្គ្រាមដ៏ក្តៅគគុក ចាប់តាំងពីឆ្នាំ២០២២មក។ យ៉ាងណា ក្រសួងការពារជាតិរុស្ស៊ី បានឲ្យដឹងថា យន្តហោះនេះត្រូវបានបាញ់ទម្លាក់ ហើយមិនត្រឹមប៉ុណ្ណឹង ទីក្រុងមូស្គូ ថែមទាំងបានវាយបកចំពោះការវាយលុកចំនួន១៧លើកពីសំណាក់កងកម្លាំងអ៊ុយក្រែន ដោយសម្លាប់ទាហាន៤១០នាក់ផងដែរ។

ក្នុងសេចក្តីប្រកាសដដែលនោះ ក្រសួងបញ្ជាក់ថា ក្រៅពីបាញ់ទម្លាក់ MiG-29 ហើយនោះ ខ្លួនបានកម្ទេចគ្រឿងសព្វាវុធដែលលោកខាងលិចជួយដល់អ៊ុយក្រែនជាច្រើនទៀត ជាពិសេសគឺរថក្រោះ Leopard ដែលផលិតនៅអាល្លឺម៉ង់ ចំនួន២គ្រឿងតែម្តង។

សូមបញ្ជាក់ថា ដំបូងឡើយអ៊ុយក្រែនបានបើកការវាយលុកនៅតំបន់ Kursk កាលពីខែសីហាឆ្នាំមុន ដោយដណ្តើមបានទឹកដីខ្លះៗ ប៉ុន្តែមួយរយៈចុងក្រោយ រុស្ស៊ីក៏វាយបណ្តេញពួកគេចេញវិញ។

កាល​ពី​ខែ​វិច្ឆិកា អ៊ុយក្រែន​ក៏​រាយការណ៍ដែរ​ថា កងទ័ព​របស់​ខ្លួន​បានបើកឆាក​ប្រយុទ្ធគ្នា​ជាមួយ​ទាហាន​កូរ៉េ​ខាង​ជើង​នៅ​ក្នុង​តំបន់ Kursk នេះឯង។

ការបង្ហាញវត្តមានរបស់ទាហានកូរ៉េខាងជើងនេះ គឺដើម្បីឆ្លើយតបទៅនឹងការវាយប្រហារឆ្លងដែនដ៏គួរឲ្យភ្ញាក់ផ្អើល ពីសំណាក់ទាហានអ៊ុយក្រែនកាលពីខែសីហា ដោយកាលនោះបានសម្រុកចូលដីរុស្ស៊ីដល់ទៅចម្ងាយ៣០គីឡូម៉ែត្រ៕

អត្ថបទ៖ សុខ សុវណ្ណ

ចុចអាន៖ រុស្ស៊ី​ប្រកាស​ថា​នឹង​សងសឹក ក្រោយ​អ៊ុយក្រែន​បាញ់​មីស៊ីល ATACMS ចូល​ទឹក​ដី​ខ្លួន