ហេតុផលម្យ៉ាងគត់ ដែលលោក Trudeau សុខចិត្តចុះចេញពីតំណែង 

កាលពីថ្ងៃចន្ទទី៦ខែមករាឆ្នាំ២០២៥ លោក Justin Trudeau បានប្រកាសលាលែងពីតំណែងជានាយករដ្ឋមន្ត្រីកាណាដានិងប្រធានគណបក្សសេរីភាព យ៉ាងភ្ញាក់ផ្អើលជាទីបំផុត ដោយហេតុផលតែម្យ៉ាងគត់គឺថា «មានជម្លោះផ្ទៃក្នុងគណបក្ស»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មួយរយៈចុងក្រោយនេះ ស្ថានភាពនយោបាយក្នុងប្រទេសកាណាដាហាក់មានភាពវឹកវរ ជាពិ​សេសគឺការទាស់សម្តីនិងខ្វែងគំនិតគ្នា លើបញ្ហាមួយចំនួនក្នុងគណបក្សកាន់អំណាចតែម្តង ហើយឈានដល់ការលាលែងតំណែងរបស់អតីតរដ្ឋមន្ត្រីក្រសួងហិរញ្ញវត្ថុនិងជាឧបនាយករដ្ឋមន្ត្រីអ្នកស្រី Chrystia Freeland ទៀតផង។

ប្រកាសចេញពីវិមាន Rideau Cottage, លោក Trudeau កត់សម្គាល់ថា «ប្រទេសនេះសមតែទទួលបានជម្រើសយ៉ាងពិតប្រាកដមួយនៅក្នុងការបោះឆ្នោតលើកក្រោយ ហើយសម្រាប់ខ្ញុំ! ​បើខ្ញុំប្រយុទ្ធក្នុងទំនាស់ផ្ទៃក្នុង ខ្ញុំមិនអាចជាជម្រើសល្អនៅក្នុងការបោះឆ្នោតនោះបានទេ»។

សេចក្តីប្រកាសនេះកើតឡើង ខណៈប្រទេសកាណាដា នឹងត្រូវរៀបចំការបោះឆ្នោតសកលនៅថ្ងៃឬមុនថ្ងៃទី២០ខែតុលាឆ្នាំនេះ ស្របពេលការស្ទង់មតិចុងក្រោយបំផុត បង្ហាញថា សំឡេងគាំទ្រគណបក្សកំពុងធ្លាក់ចុះ អាចឈានដល់បរាជ័យក្នុងការបោះឆ្នោត។

សូមបញ្ជាក់ថា លោក Trudeau ឡើងកាន់អំណាចក្នុងឆ្នាំ២០១៥ ហើយដឹកនាំគណបក្សសេរីភាពឲ្យទទួលបានជ័យជម្នះក្នុងនោះឆ្នោត២លើកនៅឆ្នាំ២០១៩និង២០២១។

ក្នុងពីរអាណត្តិដំបូងរបស់គាត់ជានាយករដ្ឋមន្ត្រី, លោក Trudeau បានកែទម្រង់ព្រឹទ្ធសភា ដោយចុះហត្ថលេខាលើកិច្ចព្រមព្រៀងពាណិជ្ជកម្មថ្មីមួយជាមួយសហរដ្ឋអាមេរិក។

លោកក៏ប្រែក្លាយកញ្ឆាឲ្យក្លាយជារឿងស្របច្បាប់ បើកការស៊ើបអង្កេតជាសាធារណៈលើការបាត់ខ្លួននិងសម្លាប់ស្ត្រីជនជាតិដើមភាគតិច និងអនុម័តច្បាប់បើកភ្លើងខៀវឲ្យធ្វើអត្តឃាតតាមផ្នែកវេជ្ជសាស្រ្តផងដែរ។

ទោះបីជាយ៉ាងណាក៏ដោយ ប្រជាប្រិយរបស់លោក បានធ្លាក់ចុះយ៉ាងខ្លាំង ដោយសារគោលនយោបាយជាបន្តបន្ទាប់ រាប់ចាប់ពីពន្ធកាបូន និងការធ្វើអន្តោប្រវេសន៍ទ្រង់ទ្រាយធំ រហូតដល់វិធានការរឹតត្បិតតឹងរ៉ឹង អំឡុងពេលផ្ទុះជំងឺរាតត្បាតកូវីដ-១៩ Covid-19 និងការបង្រ្កាបរបស់រដ្ឋាភិបាលលើបាតុកម្ម «Feedom convoy»។

លោកក៏ធ្វើឲ្យប្រជាជនកាណាដាជាច្រើននាក់មិនសប្បាយចិត្ត ចំពោះបញ្ហាអ្នកស្រឡាញ់ភេទដូចគ្នាផងដែរ រហូតដល់ធ្វើឲ្យអ្នករិះគន់ ស្តីបន្ទោសថា លោកជាអ្នករើសអើងជាតិសាសន៍៕

អត្ថបទ៖ សុខ សុវណ្ណ

ចុចអាន៖ លោក Zelenskiy ស្នើ​កាណាដា ជួយបញ្ចុះបញ្ចូល​លោកខាង​លិច​ឲ្យ​​អ៊ុយក្រែន​អាច​វាយ​ចូល​ជ្រៅ​​នៅ​រុស្ស៊ី