ព័ត៌មានអន្ដរជាតិ

ស្លាប់៤០នាក់ ក្រោយយោធាមីយ៉ាន់ម៉ាវាយប្រហារតាមអាកាសលើភូមិមួយកន្លែង

បានផុស

១ year មុន

នៅ

ថ្ងៃសុក្រ ១០ មករា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន AP ការវាយប្រហារតាមអាកាសរបស់យោធាមីយ៉ាន់ម៉ាទៅលើភូមិមួយដែលស្ថិតនៅក្រោមការគ្រប់គ្រងរបស់ក្រុមប្រដាប់អាវុធជនជាតិភាគតិច បានសម្លាប់មនុស្សប្រហែល ៤០នាក់ និងយ៉ាងហោចណាស់ ២០ នាក់ផ្សេងទៀតរងរបួស ខណៈផ្ទះរាប់រយខ្នងបានឆាបឆេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះ បានកើតឡើងកាលពីថ្ងៃពុធទី៨ខែមករាឆ្នាំ២០២៥នៅក្នុងភូមិ Kyauk Ni Maw លើកោះ Ramree ចម្ងាយ ៣៤០គីឡូម៉ែត្រ ភាគពាយព្យនៃទីក្រុង Yangon និងជាតំបន់គ្រប់គ្រងដោយកងទ័ពជនជាតិភាគតិច Arakan នៅភាគខាងលិចរដ្ឋរ៉ាឃីន។

លោក Khaing Thukha អ្នកនាំពាក្យកងទ័ព Arakan បានប្រាប់សារព័ត៌មាន AP ថា៖ « មានថយន្តហោះចម្បាំងមួយគ្រឿងបានទម្លាក់គ្រាប់បែកលើភូមិនេះកាលពីរសៀលថ្ងៃពុធ ដោយបានសម្លាប់ជនស៊ីវិល ៤០ នាក់ និងជាង ២០ នាក់ផ្សេងទៀតរងរបួស។ អ្នកស្លាប់ទាំងអស់គឺជាជនស៊ីវិល ក្នុងចំណោមអ្នកស្លាប់ និងរបួសមានស្ត្រី និងកុមារ ហើយអគ្គិភ័យបានរាលដាលពេញភូមិបំផ្លាញផ្ទះជាង ៥០០ខ្នង»។

ស្ថានភាពនៅក្នុងភូមិមិនអាចបញ្ជាក់ដោយឯករាជ្យបានទេ ដោយសារការប្រើប្រាស់អ៊ីនធឺណិត និងសេវាទូរសព្ទចល័តនៅក្នុងតំបន់ភាគច្រើនត្រូវបានកាត់ផ្តាច់។ ជាមួយគ្នានេះ គេមិនដឹងថាហេតុអ្វីបានជាភូមិនេះត្រូវបានគេកំណត់គោលដៅនោះទេ ខណៈដែលយោធាមិនបានប្រកាសពីការវាយប្រហារណាមួយនោះទេ។

គួរបញ្ជាក់ថា ប្រទេសមីយ៉ាន់ម៉ារងការវាយប្រហាដោយអំពើហិង្សាចាប់តាំងពីរដ្ឋប្រហារទម្លាក់លោកស្រី អ៊ុងសាន ស៊ូជី នៅក្នុងខែកុម្ភៈឆ្នាំ២០២១។ បន្ទាប់ពីនោះមក យោធាបានប្រើប្រាស់កម្លាំងដ៍សាហាវដើម្បីបង្ក្រាបបាតុកម្ម និងក្រុមគូប្រជែងដណ្ដើមទឹកដី ហើយមកដល់ពេលនេះទឹកដីមួយចំនួនធំនៃប្រទេសជាប់គាំងក្នុងជម្លោះនៅឡើយ។

រដ្ឋាភិបាលយោធាបានបង្កើនការវាយប្រហារតាមអាកាសក្នុងរយៈពេល ៣ ឆ្នាំចុងក្រោយនេះទៅលើក្រុមគាំទ្រលទ្ធិប្រជាធិបតេយ្យប្រដាប់អាវុធដែលត្រូវបានគេស្គាល់ថាជាកងកម្លាំងការពារប្រជាជន និងលើក្រុមប្រដាប់អាវុធជនជាតិភាគតិចដែលបានប្រយុទ្ធអស់រយៈពេលជាច្រើនទសវត្សរ៍ដើម្បីឯករាជ្យភាព។ ក្រុមទាំងពីរនេះ ពេលខ្លះក៏ធ្វើប្រតិបត្តិការរួមគ្នាប្រឆាំងនឹងយោធាផងដែរ៕