ព័ត៌មានអន្ដរជាតិ

វិនាសកម្មនៅ Los Angeles ផ្អែកតាមសុភាសិតខ្មែរ «សូវស្លាប់បា កុំឱ្យស្លាប់មេ លិចទូកកណ្តាលទន្លេ កុំឱ្យតែភ្លើងឆេះផ្ទះ»

បានផុស

៣ ខែ មុន

នៅ

ថ្ងៃសៅរ៍ ១១ មករា ២០២៥

ដោយ

ត្រឹមរយៈពេល៤ថ្ងៃ តំបន់ដែលគ្របដណ្តប់ដោយព្រៃឈើពណ៌បៃតងស្រស់ស្អាត មានការរចនានិងតុបតែងស្រស់ត្រកាល តំបន់រស់នៅដោយបណ្តុំអភិជន អ្នកជំនួញ អ្នកនយោបាយ តារាសម្តែងលំដាប់ពិភពលោកល្បីៗជាច្រើនរូប និងជាតំបន់ដែលមានហេដ្ឋារចនាសម្ព័ន្ធស្រស់ស្អាត ប្រណីតនៅក្នុងប្រទេសដ៏ស៊ីវិល័យលើលោក បានក្លាយជាវាលរហោឋាន ដោយសារកម្លាំងអគ្គី (ភ្លើង)ដែលផ្តើមពីចំណុចដ៏តូចមួយ និងរុញច្រានល្បឿនដោយកម្លាំងខ្យល់ដ៏ខ្លាំង។

ទិដ្ឋភាពហាងទំនើបនៅកែងផ្លូវ សល់តែគ្រោងឆ្អឹងអគារប៉ុណ្ណោះ។ reuter

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្ទៃដីព្រៃលាយឡំដោយលំនៅឋានប្រណីតៗ ដែលមានទំហំចូលម៉ឹនហិកតា ត្រូវបានបំផ្លាញត្រឹមមួយប៉ប្រិចភ្នែក ដោយបន្សល់ទុកនូវវិនាសកម្មធម្មជាតិ និងក្តីសោកសង្រេងនិងការសោកស្តាយធនធានដែលខិតខំកសាងបន្តិចម្តងៗ ពីមនុស្សមួយជំនាន់ទៅមនុស្សមួយជំនាន់។

ប្រតិបត្តិការទប់ស្កាត់ការរីករាលដាលមិនទទួលបានជោគជ័យដូចការរំពឹងទុក ដោយសារកម្លាំងខ្យល់បកដ៏ខ្លាំង ជំរុញល្បឿននៃការឆេះរាលដាលកាន់តែខ្លាំងស្របពេលអាកាសធាតុស្ងួតហែងរយៈពេលយូរ បានជំរុញឲ្យការរាលដាលនេះកាន់តែឆាប់ និងបង្កវិនាសកម្មធ្ងន់ធ្ងរមិនធ្លាប់មិក្នុងប្រវត្តិសាស្ត្រសហរដ្ឋអាមេរិក។

តាមការវាយតម្លៃបឋម ទំហំនៃការខាតបង់ក្នុងអគ្គីភ័យមិនដល់១សប្តាហ៍នេះ មានទំហំដល់ទៅរាប់សិបពាន់លានដុល្លារ ដែលនឹងត្រូវប្រើពេលយូររហូតដល់រាប់សិបឆ្នាំដើម្បីស្តារស្ថានភាពនោះឡើងវិញ។

ខាងក្រោមនេះ ជាទិដ្ឋភាពខ្លះក្រោយភ្លើងឆេះនៅទីក្រុង Los Angeles រដ្ឋ កាលីហ្វ័រញ៉ា សហរដ្ឋអាមេរិក ជាទីដែលអគ្គីភ័យបានចាប់ផ្តើមឆេះកាលពីថ្ងៃអង្គារ៕

ដោយ រ៉ាន់ រើយ