អគ្គិភ័យយ៉ាងសន្ធោសន្ធៅឆាបឆេះឃ្លាំងស្តុកទំនិញដ៏ធំជាង ១១ លានមុខក្នុងប្រទេសកូរ៉េខាងត្បូង

អគ្គិភ័យយ៉ាងសន្ធោសន្ធៅបានឆាបឆេះបំផ្លាញស្ទើរទាំងស្រុងនូវឃ្លាំងស្តុកទំនិញ ដ៏ធំសម្បើមមួយហៅថា E-Land fashion logistics center ក្នុងទីក្រុង Cheonan ប្រទេសកូរ៉េខាងត្បូង។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៧ខែវិច្ឆិការ។

អគ្គិភ័យដ៏សម្បើមនេះបានកើតឡើងកាលពីថ្ងៃសៅរ៍ នៅម៉ោងប្រហែល ៦ ព្រឹកនៅជាន់ទីបួនរបស់ឃ្លាំង ហើយបានរាលដាលយ៉ាងឆាប់រហ័ស ដោយសារតែអគារនេះពោរពេញទៅដោយសម្លៀកបំពាក់ និងស្បែកជើងជាង ១១ លានមុខទំនិញឯនោះ។ ឃ្លាំងនេះមានទំហំធំណាស់ មានទំហំប្រហែល ២៧ទីលានបាល់ទាត់។ ទោះយ៉ាងណាជាសំណាងល្អ គ្មាននរណាម្នាក់រងរបួសទេ ដោយសារអគ្គិភ័យបានចាប់ផ្តើមមុនពេលកម្មករមកធ្វើការ។

ដើម្បីទប់ស្កាត់ អ្នកពន្លត់អគ្គិភ័យជាង ៤៣០ នាក់ រថយន្តពន្លត់អគ្គិភ័យ ១៥០ គ្រឿង និងឧទ្ធម្ភាគចក្រ ១១ គ្រឿងត្រូវបានបញ្ជូនទៅពន្លត់អណ្តាតភ្លើង។ ពួកគេក៏បានប្រើកាណុងបាញ់ទឹកដែលមានថាមពលខ្ពស់ពិសេស ជារថយន្តមានតែមួយគត់នៅក្នុងប្រទេស ដើម្បីជួយពន្លត់ភ្លើងផងដែរ។

ប្រតិបត្តិការនេះ បានចំណាយពេលជាងប្រាំបួនម៉ោង ហើយផ្នែកខ្លះនៃអគារបានដួលរលំដោយសារកម្ដៅ។ ក្រុមពន្លត់អគ្គិភ័យក៏បានបន្តធ្វើការពេញមួយយប់បន្ថែមទៀត ដើម្បីបញ្ឈប់អគ្គិភ័យតូចៗ។

មូលហេតុនៃអគ្គិភ័យនេះ នៅតែមិនទាន់ដឹងនៅឡើយ។ ទោះបីឃ្លាំងដដែលនេះមានអគ្គិភ័យតូចមួយកាលពីប្រាំបួនថ្ងៃមុន ប៉ុន្តែក្រុមហ៊ុននិយាយថាឧប្បត្តិហេតុទាំងពីរនេះមិនមានទំនាក់ទំនងគ្នាទេ។

គួរបញ្ជាក់ថាឃ្លាំងដែលឆេះ​បាន​បើក​ដំណើរការ​ក្នុង​ឆ្នាំ ២០១៤ បាន​បញ្ចូនទំនិញ​រហូត​ដល់ ៥ លាន​កញ្ចប់​ជា​រៀងរាល់​ឆ្នាំ។ ឥឡូវនេះ វាត្រូវបានបំផ្លាញស្ទើរតែទាំងស្រុងទៅហើយ៕

អត្ថបទ៖ ប៊ុន សុភាព