ព័ត៌មានអន្ដរជាតិ

រុស្ស៊ីបង្កើនការវាយប្រហារដោយដ្រូន ស្របនឹងការរំពឹងទុកនៃការចរចា

បានផុស

៤ ខែ មុន

នៅ

ថ្ងៃសុក្រ ៣១ មករា ២០២៥

ដោយ

យ៉ាងហោចណាស់មនុស្ស៤នាក់បានស្លាប់ និង ៩នាក់ផ្សេងទៀតរងរបួស រួមទាំងកុមារ នៅក្នុងការវាយប្រហារដោយដ្រូនលើអគារផ្ទះល្វែងមួយក្នុងទីក្រុង Sumy ភាគឦសានប្រទេសអ៊ុយក្រែន ខណៈតំបន់ច្រើនទៀតក៏រងការវាយប្រហារដែរ។ យោងសារព័ត៌មាន Al Jazeera នៅថ្ងៃទី៣១ខែមករានេះ។

ការវាយប្រហារចុងក្រោយនេះកើតមាន ពេលមានការលើកឡើងអំពីលទ្ធភាពកាន់តែច្រើននៃការជួបចរចារកដំណោះស្រាយលើវិបត្តិសង្គ្រាមរុស្ស៊ីនិងអ៊ុយក្រែន ជាលក្ខណៈត្រីភាគី និងពហុភាគី ដោយសារមានការជំរុញពីរដ្ឋបាលរបស់ប្រធានាធិបតី ដូណាល់ ត្រាំ។

ប្រធានាធិបតីអ៊ុយក្រែន លោក Volodymyr Zelenskyy បានឲ្យដឹងថា រុស្ស៊ីបានកំណត់គោលដៅលើទីក្រុង Sumy ដោយប្រើប្រាស់យន្តហោះគ្មានមនុស្សបើក ប្រភេទ Shahed របស់អ៊ីរ៉ង់ សរុបចំនួន៨១គ្រឿងបើកការវាយប្រហារពេញមួយយប់ ធ្វើឱ្យខូចខាតដល់អាជីវកម្ម និងផ្ទះសម្បែងរាប់សិបខ្នង។

យោធាអ៊ុយក្រែន បាននិយាយថា យន្តហោះគ្មានមនុស្សបើកចំនួន៣៧គ្រឿងត្រូវបានបាញ់ទម្លាក់ រួមទាំងនៅ Sumy និងនៅជិតរដ្ឋធានី Kyiv ហើយ ៣៩ផ្សេងទៀតមិនបានទៅដល់គោលដៅរបស់ពួកគេទេ តែមិនបានបញ្ជាក់លម្អិតអំពីអ្វីដែលបានកើតឡើងចំពោះយន្តហោះគ្មានមនុស្សបើក៥គ្រឿងដែលនៅសល់នោះទេ។ អាជ្ញាធរមូលដ្ឋាន បានបន្ថែមថា ផ្ទះល្វែងចំនួនប្រាំ និងរថយន្តជាង២០គ្រឿងបានរងការខូចខាតនៅក្នុងការវាយប្រហារនេះ។

នៅកន្លែងផ្សេងទៀត ដូចជានៅតំបន់មាត់សមុទ្រ Odesa ភាគខាងត្បូងអ៊ុយក្រែន ក៏មានដ្រូនរបស់រុស្ស៊ីបានកំណត់គោលដៅទីក្រុងកំពង់ផែ Izmail បណ្ដាលឲ្យឃ្លាំងគ្រាប់ធញ្ញជាតិ មន្ទីរពេទ្យ និងលំនៅឋានពីររងការខូចខាត។

យ៉ាងណាមិញរដ្ឋមន្ត្រីការពារជាតិរុស្ស៊ីក៏បានរាយការណ៍ផងដែរថា ទីក្រុងមូស្គូបានប្រើដ្រូនរបស់ខ្លួនចំនួន១០៤គ្រឿងវាយប្រហារលើតំបន់ Kursk និង Bryansk របស់រុស្ស៊ីផងដែរ។

គួរបញ្ជាក់ថា ការវាយប្រហាររវាងភាគីទាំងពីរបានកើនឡើង ប៉ុន្មានសប្តាហ៍មុនខួបលើកទីបីនៃសង្គ្រាមនៅថ្ងៃទី២៤ខែកុម្ភៈនេះ៕

អត្ថបទ៖ ប៊ុន សុភាព