ព័ត៌មានអន្ដរជាតិ

ចំនួនអ្នករត់ចោលប្រទេសកូរ៉េខាងជើង កើនឡើង២០% នៅឆ្នាំ២០២៤

បានផុស

១ year មុន

នៅ

ថ្ងៃពុធ ៥ កុម្ភៈ ២០២៥

ដោយ

Chheang

យោងតាមរបាយការណ៍ក្រសួងបង្រួបបង្រួមកូរ៉េខាងត្បូងកាលពីថ្ងៃអង្គារទី៤ខែកុម្ភៈ ជនជាតិកូរ៉េខាងជើងដែលរត់ចោលប្រទេសរបស់ខ្លួន បានកើនឡើងចំនួន ២០% នៅក្នុងឆ្នាំ២០២៤ បើធៀបនឹងឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឆ្នាំ២០២៤ អ្នករត់ចោលប្រទេសកូរ៉េខាងជើង មានចំនួនសរុប ២៣៦នាក់ ក្នុងនោះមានស្ត្រី ២១០នាក់ បើធៀបនឹងឆ្នាំ២០២៣ មានត្រឹម ១៩៦នាក់។ ជារួម ប្រជាជនកូរ៉េខាងជើង ដែលរត់ចូលក្នុងទឹកដីកូរ៉េខាងត្បូង មានចំនួនសរុប ៣៤ ៣១៤នាក់ ហើយក្នុងនោះមានស្ត្រី ២៤ ៧៤៦នាក់។

ក្នុងចំណោមអ្នកដែលបានភៀសខ្លួនទៅកូរ៉េខាងត្បូងកាលពីឆ្នាំមុន មានតែ៣នាក់ប៉ុណ្ណោះដែលបានឆ្លងកាត់ព្រំដែនអន្តរកូរ៉េ ខណៈដែលអ្នកផ្សេងទៀតភាគច្រើនស្នាក់នៅក្នុងប្រទេសទី៣ មុនពេលហោះហើរទៅកាន់កូរ៉េខាងត្បូង។

បើតាមក្រសួងកូរ៉េខាងត្បូង ការកើនឡើងនៃតួលេខនេះក្នុងឆ្នាំ២០២៤ អាចបណ្តាលមកពីការដកការរឹតបន្តឹងព្រំដែនពាក់ព័ន្ធនឹងជំងឺកូវីដ១៩ ដែលសម្រួលដល់លំហូរចូលនៃជនភៀសខ្លួនកូរ៉េខាងជើង ដែលបានស្នាក់នៅក្នុងប្រទេសទី៣ក្នុងរយៈពេលយូរជាងមុន។

ក្នុងចំណោមអ្នករត់ចោលប្រទេសកូរ៉េខាងជើងឆ្នាំ២០២៤ ក៏មានទាំងមន្ត្រីជាន់ខ្ពស់ជាច្រើននាក់ផងដែរ។ យ៉ាងណា ក្រសួងកូរ៉េខាងត្បូងមិនបានផ្តល់ព័ត៌មានលម្អិតបន្ថែមទេ ដោយសារតែហានិភ័យសន្តិសុខផ្ទាល់ខ្លួនរបស់ពួកគេ។

មូលហេតុដែលស្ត្រីមានចំនួនច្រើនជាងបុរសនៅក្នុងការរត់ចោលស្រុក គឺដោយសារតែបុរសនៅក្នុងប្រទេសកូរ៉េខាងជើង ជារឿយៗត្រូវបានចងភ្ជាប់យ៉ាងតឹងរ៉ឹងដោយអង្គការនានា ហើយត្រូវតែបង្ហាញមុខសម្រាប់ការងារប្រចាំថ្ងៃ ខណៈដែលស្ត្រីមិនសូវជាប់នឹងតម្រូវការទាំងនេះទេ៕

ដោយ៖ ឈាង

Related Topics:ប្រទេសកូរ៉េខាងជើង