យន្ត​ហោះឈ្លប​យក​ការណ៍​របស់​​អាមេរិក​ធ្លាក់​​នៅភាគខាងត្បូងហ្វីលីពីន​

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៧ខែកុម្ភៈនេះ សមាជិកកងទ័ពអាមេរិកម្នាក់ និងបុគ្គលិកបច្ចេកទេសការពារជាតិបីនាក់ បានស្លាប់ក្នុងហេតុការណ៍ធ្លាក់យន្តហោះក្នុងវាលស្រែមួយនៅភាគខាងត្បូងប្រទេសហ្វីលីពីន។

ទីបញ្ជាការឥណ្ឌូ-ប៉ាស៊ីហ្វិក របស់សហរដ្ឋអាមេរិកបាននិយាយនៅក្នុងសេចក្តីថ្លែងការណ៍មួយថា យន្តហោះនេះកំពុងធ្វើបេសកកម្មជាប្រចាំ ដើម្បី​​​ផ្តល់ជំនួយ​ក្នុង​ការស៊ើបការណ៍ ការឃ្លាំមើល និងការឈ្លបយកការណ៍តាមសំណើរបស់សម្ព័ន្ធមិត្តហ្វីលីពីន​។ មន្ត្រី​អាមេរិក​កំពុង​​ស្រាវជ្រាវរក​មូលហេតុនៃការធ្លាក់នេះ។

អាជ្ញាធរអាកាសចរណ៍ស៊ីវិលហ្វីលីពីនក៏បានបញ្ជាក់ថា យន្តនេះជាយន្តហោះធុនស្រាល ធ្លាក់ចូលក្នុងវាលស្រែមួយក្នុងខេត្ត Maguindanao ខណៈសាកសពមនុស្សទាំង៤នាក់ ត្រូវបានគេទាញចេញពីបំណែកយន្តហោះ។

សាក្សីដែលជាអ្នកស្រុកបានឲ្យដឹងថាពួកគេបានឃើញផ្សែងចេញពីយន្តហោះ ហើយបានឮសំឡេងផ្ទុះ មុនពេលយន្តហោះធ្លាក់ដល់ដីតិចជាងមួយគីឡូម៉ែត្រពីកសិដ្ឋានមួយ។ គ្មានមនុស្សណាម្នាក់ត្រូវបានរាយការណ៍ថារងរបួសពីការធ្លាក់នោះទេ តែមានសត្វក្របីមួយក្បាលបានងាប់ដោយសារយន្តហោះធ្លាក់ចំ។

គួរបញ្ជាក់ថាកងកម្លាំងសហរដ្ឋអាមេរិកត្រូវបានដាក់ពង្រាយនៅក្នុងជំរុំយោធាហ្វីលីពីននៅភាគខាងត្បូងនៃប្រទេសអស់រយៈពេលជាច្រើនទសវត្សរ៍មកហើយ ដើម្បីជួយផ្តល់ការណែនាំ និងការបណ្តុះបណ្តាលដល់កងកម្លាំងហ្វីលីពីនដែលកំពុងប្រយុទ្ធនឹងពួកសកម្មប្រយុទ្ធមូស្លីម ខណៈតំបន់នេះគឺជាស្រុកកំណើតរបស់ជនជាតិភាគតិចមូស្លីមនៅក្នុងប្រជាជាតិរ៉ូម៉ាំងកាតូលិកភាគច្រើន៕

អត្ថបទ៖ ប៊ុន សុភាព