យោធា​ចិន​​​​បណ្ដេញ​យន្តហោះ​ហ្វីលីពីនចេញពី​ប្រជុំ​កោះ Spratly

យោធាចិនបាន​​បណ្តេញយន្តហោះហ្វីលីពីនចំនួនបីគ្រឿងដែល​ខ្លួន​ចោទ​​ថា បាន​រំលោភបំពានដោយខុសច្បាប់ចូលទៅក្នុងដែនអាកាសក្បែរប្រជុំកោះ Spratly កាលពីថ្ងៃព្រហស្បតិ៍ថ្ងៃទី២០ខែកុម្ភៈ។ នេះបើយោងតាមការចេញផ្សាយរបស់សារព័ត៌មានCNAនៅថ្ងៃទី២១ខែកុម្ភៈ។

បញ្ជាការកងទ័ពជើងទឹកភាគខាងត្បូងរបស់ប្រទេសចិនបានចោទប្រកាន់ភាគីហ្វីលីពីនថា បានព្យាយាម លួចបន្លំការទាមទារខុសច្បាប់របស់ខ្លួន តាមរយៈការបង្កហេតុ ហើយបានព្រមានថា​ឧបាយកលមិនសមហេតុសមផលទាំងនេះនឹងបរាជ័យ។ ទោះយ៉ាងណាមិនមានការអត្ថាធិប្បាយភ្លាមៗពីស្ថានទូតហ្វីលីពីនក្នុងទីក្រុងប៉េកាំងនោះទេ។

បើតាមប្រទេសហ្វីលីពីនបានអះអាងកាលពីថ្ងៃព្រហស្បតិ៍ថា ឆ្មាំឆ្នេរសមុទ្រ និងការិយាល័យជលផលរបស់ខ្លួនបានរួមគ្នាអនុវត្តការហោះហើរការយល់ដឹងអំពីដែនសមុទ្រនៅលើកោះ Kalayaan ដែលជាឈ្មោះហ្វីលីពីនសម្រាប់ហៅកោះ Spratly ។ បេសកកម្មនេះគឺដើម្បីអះអាងអធិបតេយ្យភាព សិទ្ធិអធិបតេយ្យភាព និងយុត្តាធិការដែនសមុទ្ររបស់ប្រទេសហ្វីលីពីននៅសមុទ្រហ្វីលីពីនខាងលិចប៉ុណ្ណោះ។

ប្រទេសចិនបានទាមទារអធិបតេយ្យភាពស្ទើរតែទាំងស្រុងនៃសមុទ្រចិនខាងត្បូង ដែលជាផ្លូវទឹកដ៏សំខាន់សម្រាប់ពាណិជ្ជកម្មប្រចាំឆ្នាំ​តម្លៃ​​ជាង៣ទ្រីលានដុល្លារអាមេរិក ដែល​​ធ្វើ​ឲ្យ​មាន​ទំនាស់​​ជាមួយ​ប្រទេស​ប្រ៊ុយណេ ឥណ្ឌូណេ​ស៊ី ម៉ាឡេស៊ី ហ្វីលីពីន និងវៀតណាម។ សេចក្តីសម្រេចអាជ្ញាកណ្តាលឆ្នាំ ២០១៦ បានធ្វើឲ្យការអះអាងរបស់ប្រទេសចិនមានសុពលភាព ប៉ុន្តែទីក្រុងប៉េកាំងមិនទទួលស្គាល់ការសម្រេចចិត្តនេះទេ។

ការប្រឈមមុខដាក់គ្នាចុងក្រោយនេះកើតឡើងបន្ទាប់ពីឆ្មាំឆ្នេរសមុទ្រហ្វីលីពីនបានចោទប្រកាន់កងទ័ពជើងទឹកចិនថាបានធ្វើសមយុទ្ធហោះហើរដ៏គ្រោះថ្នាក់កាលពីដើមសប្តាហ៍នេះ ដែលបានហោះទៅជិតយន្តហោះរដ្ឋាភិបាលហ្វីលីពីនដែលកំពុងល្បាតនៅតំបន់ Scarborough Shoal ក្នុងសមុទ្រចិនខាងត្បូង៕

អត្ថបទ៖ ប៊ុន សុភាព