ព័ត៌មានអន្ដរជាតិ

រុស្ស៊ី បាញ់មីស៊ីលពន្លិចកប៉ាល់ដឹកទំនិញមួយគ្រឿង សង្ស័យដឹកអាវុធអង់គ្លេស យកទៅឲ្យអ៊ុយក្រែន

បានផុស

១ year មុន

នៅ

ថ្ងៃចន្ទ ៣ មីនា ២០២៥

ដោយ

រុស្ស៊ីបាញ់មីស៊ីល Iskander-M ចំនួន២គ្រាប់ ពន្លិចកប៉ាល់ដឹកទំនិញមួយគ្រឿង ដោយចោទប្រកាន់ទាំងគ្មានព័ស្តុតាងថា កប៉ាល់នោះមានដឹកអាវុធរបស់អង់គ្លេស ចេញពីប្រទេសតួកគី យកទៅឲ្យអ៊ុយក្រែន។

មីស៊ីល Iskander-M (រូបថត៖ ក្រសួងការពាជាតិរុស្ស៊ី)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Sun, ការវាយប្រហារនេះកើតឡើងនៅម៉ោង៦ល្ងាច ថ្ងៃសៅរ៍ទី១ខែមីនាឆ្នាំ២០២៥ នៅកំពង់ផែ Odessa ខណៈកប៉ាល់នោះ មានឈ្មោះ MSC LEVANTE F ដែលគេជឿថា ជារបស់ស្វីស។

យោងតាមប្រភពពីប្រទេសរុស្ស៊ី, ពេលចតនៅប្រទេសតួកគី កប៉ាល់នេះមានដាក់ថែមទូកុងតឺន័រចំនួន២ មួយពណ៌ក្រហមនិងមួយទៀតពណ៌លឿង ដោយសង្ស័យជាដ្រូននិងអាវុធដែលយកចេញពីមូលដ្ឋានណាតូនៅតួកគី។ ការវាយប្រហារនោះ បានបណ្តាលឲ្យកម្មករកំពង់ផែ២នាក់របួស និងខូចខាតហេដ្ឋារចនាសម្ព័ន្ធនៅកំពង់ផែ Odessa។

កប៉ាល់ MSC LEVANTE F (រូបថត៖ Marine Traffic)

ទោះបីជាយ៉ាងណាក៏ដោយ ទីក្រុងកៀវចេញមុខបដិសេធរួចហើយ ដោយឧបនាយករដ្ឋមន្ត្រីអ៊ុយក្រែន Oleksii Kuleba អះអាងថា កប៉ាល់នេះគ្មានដឹកអាវុធអ្វីទេ ប៉ុន្តែដឹកទំនិញស៊ីវិលសុទ្ធសាធ។

សូមបញ្ជាក់ថា ការវាយប្រហារនោះកើតឡើងចំពេល ចក្រភពអង់គ្លេសបានបន្ថែមប្រាក់កម្ចីចំនួន ២.២៦ពាន់លានផោន (ស្មើនឹងប្រមាណ ២.៨៥ពាន់លានដុល្លារ) ដល់ទីក្រុងកៀវ សម្រាប់ការផលិតអាវុធក្នុងស្រុក។

លោក វ៉ុលឡូឌីមៀរ ហ្សេលេនស្គី និងលោក Keir Starmer (រូបថត៖ AP)

កិច្ចព្រមព្រៀងនេះ ត្រូវបានធ្វើឡើងជាផ្លូវការក្នុងអំឡុងកិច្ចប្រជុំរវាងប្រធានាធិបតីអ៊ុយក្រែនលោក វ៉ុលឡូឌីមៀរ ហ្សេលេនស្គី និងនាយករដ្ឋមន្ត្រីចក្រភពអង់គ្លេសលោក Keir Starmer ក្នុងទីក្រុងឡុងដ៍។

ប្រាក់កម្ចីនេះ ត្រូវបានរៀបចំឡើងដើម្បីសងវិញដោយប្រើចំណូលដែលបានមកពីទ្រព្យសកម្មរបស់រុស្ស៊ីដែលបានបង្កក ហើយវាគឺស្របតាមកិច្ចខិតខំប្រឹងប្រែងអន្តរជាតិដ៏ទូលំទូលាយ ដើម្បីរក្សាឲ្យរុស្ស៊ីទទួលខុសត្រូវផ្នែកហិរញ្ញវត្ថុសម្រាប់សកម្មភាពសង្គ្រាមលុកលុយរបស់ខ្លួននៅអ៊ុយក្រែន ក៏ដូចជាគាំទ្រដល់ការការពារជាតិ និងការកសាងឡើងវិញរបស់ទីក្រុងកៀវ៕

អត្ថបទ៖ សុខ សុវណ្ណ

ចុចអាន៖ អង់គ្លេស ថែមប្រាក់កម្ចីឲ្យអ៊ុយក្រែន ជិត៣ពាន់លានដុល្លារ សម្រាប់ផលិតកម្មអាវុធ