រុស្ស៊ី ពេញចិត្តខ្លាំងដែលអាមេរិក ផ្អាកជំនួយទៅអ៊ុយក្រែន

ក្រោយប្រធានាធិបតីអាមេរិក Donald Trump បញ្ជាឲ្យផ្អាកជំនួយទាំងអស់ទៅអ៊ុយក្រែននោះ រុស្ស៊ីហាក់ពេញចិត្តខ្លាំងណាស់ ដោយអ្នកពាក្យវិមានក្រឹមឡាំងលោក Dmitry Peskov និយាយថា ការធ្វើបែបនេះ នឹងអាចដោះស្រាយឈានទៅរកការបញ្ចប់ជម្លោះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ទូរទស្សន៍ Rossiya 1 កាលពីថ្ងៃអង្គារទី៤ខែមីនាឆ្នាំ២០២៥, លោក Peskov និយាយថា ដ្បិតរឿងរ៉ាវនៃការផ្អាកជំនួយនេះ មិនទាន់មានការលាតត្រដាងឲ្យលម្អិតខ្លាំងក៏ពិតមែនប៉ុន្តែជាក់ស្តែង វិធានការនេះនឹងឈានទៅរកការបន្ថូរបន្ថយភាពតានតឹង និងបញ្ចប់សង្គ្រាម។ 

យោងតាមលោក Peskov, អាមេរិក ជាម្ចាស់ជំនួយយោធាធំបំផុតរបស់អ៊ុយក្រែន ហើយបើសិនអាមេរិកលែងខ្វាយខ្វល់និងដកដៃផ្អាកការផ្អត់ផ្គង់មែននោះ វានឹងក្លាយជាការរួមចំណែកដ៏ល្អបំផុតដល់បុព្វហេតុសន្តិភាព។ អ៊ុយក្រែន នឹងលែងសូវសម្បូរគ្រាប់ដូចមុន ព្រមទាំងខ្វះគ្រឿងសឹកនិងផ្នែកចារកម្ម ដូច្នេះពួកគេនឹងងាកមករកដំណោះស្រាយស្ថានការណ៍ដោយសន្តិវិធី។ 

សូមជម្រាបជាថ្មី លោក ត្រាំ បានបញ្ជាឲ្យក្រសួងការពារជាតិផ្អាកជំនួយទាំងអស់ទៅអ៊ុយក្រែន ក្រោយការឈ្លោះប្រកែកគ្នាបែកផ្សែងនៅសេតវិមាន កាលពីចុងសប្តាហ៍មុន ហើយការផ្អាកជំនួយនេះទៀតសោត ក៏រួមបញ្ចូលទាំងសព្វាវុធដែលត្រៀមដឹកជញ្ជូនឆ្លងកាត់និងនៅក្នុងប្រទេសប៉ូឡូញ ផងដែរ។

ទន្ទឹមនោះ កាសែត Washington Post រាយការណ៍ថា ក្រៅពីបញ្ឈប់ការដឹកជញ្ជូនសព្វាវុធទៅឲ្យទីក្រុងកៀវហើយនោះ អាមេរិកក៏កំពុងពិចារណាលែងចែករំលែកព័ត៌មានសម្ងាត់ និងការបណ្តុះបណ្តាលសម្រាប់កងទ័ពនិងអាកាសយានិកអ៊ុយក្រែនផងដែរ។

ច្បាស់ណាស់ វិធានការនេះគឺជាបញ្ហាប្រឈមដ៏ធំនិងជាកង្វល់យ៉ាងខ្លាំងចំពោះអ៊ុយក្រែន ព្រោះថាទីក្រុងកៀវ បានពឹងផ្អែកស្ទើរតែទាំងស្រុងលើជំនួយលោកខាងលិច ក្នុងសង្គ្រាមរបស់ខ្លួនជាមួយរុស្ស៊ី។

យ៉ាងណា មួយរយៈចុងក្រោយនេះ គេឃើញថា សម្ព័ន្ធមិត្តអឺរ៉ុបមិនឱបដៃឈរមើលឡើយ និងថែមទាំងព្យាយាមជួយអ៊ុយក្រែនតាមលទ្ធភាពផងដែរ ខណៈប្រទេសដែលចេញមុខចេញមាត់ជាងគេគឺអង់គ្លេសនិងបារាំង៕

អត្ថបទ៖ សុខ សុវណ្ណ

ចុចអាន៖ ប្រតិកម្ម​អន្តរជាតិ ក្រោយអាមេរិក​ផ្អាក​ជំនួយ​​ដល់​អ៊ុយក្រែន