អ៊ីស្រាអែល បញ្ជាឲ្យពលរដ្ឋប៉ាឡេស្ទីន ជម្លៀសចេញពី ភាគខាងកើតហ្គាហ្សា ជាបន្ទាន់ សង្ស័យបើកការវាយប្រហារថែមទៀត

អ៊ីស្រាអែល បានបញ្ជាឲ្យពលរដ្ឋប៉ាឡេស្ទីន ត្រូវជម្លៀសជាបន្ទាន់ចេញពីភាគខាងកើតតំបន់ហ្គាហ្សា ឆ្ពោះទៅភាគខាងលិច ដែលនេះជាសញ្ញាថា កងកម្លាំងការពារអ៊ីស្រាអែល (IDF) នឹងបើកការវាយប្រហារពេញទំហឹងបន្ថែមទៀតក្នុងពេលឆាប់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Hindu, អ្នកនាំពាក្យ IDF បានបង្ហោះសេចក្តីប្រកាសលើបណ្តាញសង្គម X នៅថ្ងៃអង្គារទី១៨ខែមីនាឆ្នាំ២០២៥ថា ឥឡូវព្រំដែនហ្គាហ្សាទាំងមូលក្លាយជាតំបន់ក្រហមពោរពេញដោយគ្រោះថ្នាក់ហើយ។ ដូចនេះពលរដ្ឋប៉ាឡេស្ទីន សូមចាកចេញពី Beit Hanoun, Khuza’a Abasan al-Kabira និង al-Jadida ហើយត្រូវតែជម្លៀសទៅកាន់ទីក្រុងប៉ែកខាងលិចនិង Khan Younis។

បញ្ជានេះចេញភ្លាមៗបន្ទាប់ពីអ៊ីស្រាអែល បើកការវាយប្រហារអាកាសស្លាប់មនុស្សជាង ៣៣០នាក់ និងរបួសជាង ២៥០នាក់ ហើយក្នុងចំណោមមនុស្សស្លាប់ ក៏មានកុមារជាង៥០នាក់និងស្រ្តី២៨នាក់ ផងដែរ។  

នេះគឺជាការវាយប្រហារទ្រង់ទ្រាយធំបំផុត ចាប់តាំងពីមានបទឈប់បាញ់ថ្ងៃទី១៩ខែមករាឆ្នាំ២០២៥មក ខណៈអ៊ីស្រាអែល អះអាងថា ខ្លួនកំណត់គោលដៅលើមូលដ្ឋានយោធារបស់ក្រុមហាម៉ាស ហើយថែមទាំងបានសម្លាប់មេសន្តិសុខក្រុមហាម៉ាស និងឥស្សរជននយោបាយមួយចំនួនថែមទៀតផង ជាពិសេសលោក Mahmoud Abu Wafah ដែលជាឧបនាយករដ្ឋមន្ត្រីក្រសួងមហាផ្ទៃក្នុងតំបន់ហ្គាហ្សា។

តាមសេចក្តីថ្លែងការណ៍ពីការិយាល័យនាយករដ្ឋមន្ត្រីអ៊ីស្រាអែល Benjamin Netanyahu, ការវាយប្រហារនេះគឺធ្វើឡើងដោយសារតែក្រុមហាម៉ាស មិនព្រមដោះលែងចំណាប់ខ្មាំងនិងបដិសេធសំណើរបស់បេសកជនប្រធានាធិបតីអាមេរិក ដូណាល់ ត្រាំ គឺលោក Steve Witkoff និងសំណើពីអ្នកសម្របសម្រួលផ្សេងទៀត។ ចាប់ពីពេលនេះទៅ អ៊ីស្រាអែល នឹងប្រើធម៌ក្តៅលើក្រុមហាម៉ាស មិនបន្ធូរដៃឡើយ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល វាយប្រហារខ្នាតធំលើ ហ្គាហ្សា! ស្លាប់មនុស្ស៣៣០នាក់ ក្នុងនោះមានកុមារ៥០នាក់ និងស្រ្តី២៨នាក់